Amangʼana agha ömörööti
Yoona
Yoona araiköngʼërrya okongʼosa atakaakora emeremo ighya YEHOBHA Waryobha
1
Yaare-ho ömörööti uwöndë kare hayö,
ono yaabherekerwanga igha Yoona,
mura uwa Amitai.
a Urusikö urwöndë,
YEHOBHA Waryobha,
akamoherra amangʼana,
akamötëëbhya igha,
2 “Tanora ughende mu-mughi ghono ghokobherekerwa igha Ninaawi,
umughi omonene ghoora ghörëngë mu-kyaro ikya Asiria.
Obheehe bhököngʼu abhantö abha muyö,
ko bhoora obhoghogho ubhwabho bhono bhakokora,
bhoono bhwahëtirë.”
3 Kasi Yoona uyö akangʼosa ukurwa hayö,
okore aihëënëri-ho YEHOBHA Waryobha.
Yairikaini nakyo,
akangʼaaraara igho akahika mo-keghobho ikya Yafa.
Hano yaahikirë hayö,
akanyoora-ho iryato reno ryaaghyanga Tarishishi.
b Hano yaamarrë okohaka enauri,
akariina-mo,
okore ahinane hamwë na abhaghöbhya bhayö mu-kyaro ikya Tarishishi,
okore aihëënëri-ho YEHOBHA Waryobha.
Ghano ghaanyöörrë Yoona mu-bhuribha
4 Mbe,
YEHOBHA Waryobha akatoma rikama rirörö kai,
ku-nyansha kuyö.
Inyansha ekaghoghoha bhököngʼu,
iryato reno bhaare-mo rekahona okosareka.
5 Abhaghöbhya bhakoobhoha bhököngʼu,
kera ömöntö akasaasaama risambwa iryabho.
Hano bhaarööshë ghaabhataamëri,
bhakarekera imirigho mu-nyansha,
okore iryato rehohe bhatakaaghwererra.
Kasi enkaagha iyö waanyöörrë Yoona we ashoronkaini ukughya mu-ryato mönsë,
araayë igho kora taana agha ikyaro hë,
n-seetero isyene akuhuuta.
6 Omonene uwa iryato riyö akaghya ku-Yoona,
akamutura,
akamöbhöörya igha,
“Kana n-kë obhaayë?
Ndarra n-seetero isyene ukuhuuta hano?
Bhooka osaasaame risambwa irya wëënyu,
hanga rekaatwabhera tötööribhwi totakaaghwererra.”
7 Mbe,
abhaghöbhya bhayö bhakashumaasha abheene ko bheene igha,
“Muushe tokore ekekoobhwe,
okore tomanyërri ikibhuno ikya inyanko eno tunyöörrë.”
Bhakakora ekekoobhwe,
kekaghoota Yoona.
8 Ku bhuyö bhakamöbhöörya igha,
“Ötötëëbhi n-kwakë tukunyoora inyanko yangʼana hano.
M-meremo kë okokora?
N-kyaro kë urwërëëyë?
Ötötëëbhi m-moona uwa abhantö kë örë?
Na ne-ngʼana kë eno ökörrë,
ighirrë amangʼana amaghogho ghano ghatunyöörrë?”
9 Yoona akabhahonshora igha,
“Öni nu-Mwëbhuraania ndë.
Nkosengerra ndë YEHOBHA,
Waryobha ono akotongera ibhya mu-ryobha.
We yaabhömbirë inyansha na rirobha.”
10 Mbe,
Yoona akaghëndërrya okobhatëëbhya igha,
“Bhoono öni hano,
nkongʼosa ndë emeremo ighya YEHOBHA Waryobha,
gheno yaantömirë igha nkore!”
Hano abhaghöbhya bhaaighuurë engʼana iyö,
bhakoobhoha bhököngʼu,
bhakamöbhöörya igha,
“N-kwakë ökörrë igho?”
11 Enkaagha iyö yonswe igho waanyöörrë inyansha eraghëndërrya okoghoghoha.
Mbe,
bhakamöbhöörya igha,
“Iyakë tokaakokora okore inyansha etendeere?”
12 Yoona akabhahonshora igha,
“Bhëënyu mondekere mu-nyansha ho eraatendeere.
Ko bhoora nemanyirë igha,
nö-öni ikibhuno ikya bhëënyu ukunyoora inyanko eno iya rikama.”
13 Nokaanyoora Yoona yaabhatëëbhëri igho,
kasi abheene bhakaiköngʼërrya okore bhakyöri iryato mo-keghobho.
Kasi tebhaatörrë hë,
ko bhoora inyansha yaaghöghöhirë bhököngʼu okokera urwa mbere.
14 Ho bhaakörëëyë YEHOBHA Waryobha,
bhakasaasaama igha,
“Ore YEHOBHA,
Waryobha uwëëtö,
ömöntö ono atakaaghira tughwererre mu-nyansha,
otakaatomaaha bhoghogho ko amaanyinga aghaaye,
ko bhoora uwe nökörrë bhono ukutuna.”
15 Mbe,
ho bhaaghëghirë Yoona,
bhakamorekera mu-nyansha,
bhuyö yaatöönyirë-mo igho,
inyansha ekatendeera.
16 Hano bhaarööshë igho,
bhakoobhoha YEHOBHA Waryobha bhököngʼu.
Bhakakora ikimwenso,
bharaihiimirrya igha,
mbaaraakorenga amangʼana ghonswe igho bharamwitengʼera.
17 Kasi YEHOBHA Waryobha akasëëmya ughuswë mu-nyansha muyö,
ghokamera Yoona.
Yoona akabha mo-nda iya ughuswë ghuyö sinsikö isatö ubhutikö na omobhasö.