YEHOBHA Waryobha aröörökya eteemo iyaaye iya amaabhë
4
Hano Waryobha yaakubhiri ësëëmya iyaaye eno yaarë nayo iya ukusikya abhantö abha Ninaawi,
Yoona akarerra bhököngʼu.
2 Yoona akaibhëmbëërya ku-YEHOBHA Waryobha igha,
“YEHOBHA Waryobha,
ghayö ngo naitëghërrëëyë hano naarë mu-kyaro ikya wëëtö eera.
Kiyö nkyo kyaaghërrë nkangʼosera Tarishishi,
ko bhoora naamanyirë igha,
uwe nu-uwa righonshe örë,
na noona amaabhë,
tokorerra bhöngö hë,
m-moheene örë.
Amangʼana aghandë uwe nkomerra örë mo-nkoro.
3 Mbe,
bhoono ore YEHOBHA Waryobha,
otaanyita këmwë,
nyakara nkwe nduho.”
4 Kasi YEHOBHA Waryobha akamohonshora igha,
“Bhoono uwe nkokanya örë igha m-buuya okokora okondererra?”
5 Hano Yoona yaahökirë ukurwa mu-mughi ghuyö,
akabhata orobhareka urwa röghörö.
Akahaghaasha-yo akaghutu,
akaikara mu-kiiriiri ikyako,
akabha araghanyera-ho okore amaahe amangʼana ghano ghakaanyöörrë abhantö abha umughi ughwa Ninaawi.
6 YEHOBHA Waryobha akaghera rirandoora rekamera,
rekakiina,
rekakorra Yoona ikiiriiri,
okore atakaanyoora inyanko iya okobharrwa na omobhasö.
Engʼana iyö ekashomera Yoona bhököngʼu.
7 Kasi nyinkyo iyaako,
mö-röghörö,
Waryobha akasëëmya rikonde reno renga riise,
rekaraaghera imiri ighya rirandoora riyö rekooma törö.
8 Hano iryobha ryaatörrë,
omobhasö ghokasamba Yoona ko-motwe.
Waryobha akatoma rikama irya emaaho ukurwa röghörö,
rekamuhuuta,
kora akatuna okoghereka.
Yoona akaghamba igha,
“Nyakara nkwe nduho.”
9 Kasi Waryobha akabhöörya Yoona igha,
“Bhoono uwe nkokanya örë igha m-buuya okokora,
okorererra rirandoora riyö ryömirë?”
Yoona akahonshora igha,
“Yëë m-buuya nkokora,
nëndërëëyë bhököngʼu,
kora nyakara nkwe nduho.”
10 Kasi YEHOBHA Waryobha akamötëëbhya igha,
“Uwe oraighwera öbhörrö rirandoora iryene igho,
kora tuwaaryëmëri hë,
na kora tewarekaraabherra hë.
Nu-rusikö römwë igho ryaimërri,
rekakiina na urwa kabhërë rekooma.
11 Kasi mu-mughi ughwa Ninaawi bhaamo abhantö okoheteera ëbhëkwë righana imwë na merongo ëbhërë na situgho sinsharu seno otaatore okosebhara.
Abhantö bhano bhatamanyirë ukwahora engʼana engogho na inshiiya.
N-kwakë öni wonswe ntabhaighwere öbhörrö mbaabhere?”