Yaakobho arangʼaanyera Miisiri na abhantö abhaaye
46
Mbe,
Yaakobhoa akeemoka ukughya Miisiri,
akaghegha abhantö abhaaye na ëbhëntö bhyonswe igho bheno yaarë nabhyo.
Hano yaahikirë Bhëëri-sheebha,
akamwensera Waryobha uwa Isaaka,
suwaabho Yaakobho.
2 Hano ubhutikö bhwaahikirë,
Waryobha akashumaasha na Yaakobho mo-kerooto,
akamobherekera igha,
“Yaakobho,
Yaakobho!”
Yaakobho akaitabha igha,
“Hano ndë.”
3 Waryobha akamötëëbhya igha,
“Nö-öni Waryobha uwa suwëënyu.
Otakoobhoha ukughya Miisiri,
ko bhoora nendaakokore obhe umwibhöri uwa abhantö abhaaru iyö.
4 Öni nendaahinane na uwe Miisiri iyö,
nendemara nkukyöri Kaanaani.
Mo-mabhoko agha Yusufu urikwera.”
5 Mbe,
Yaakobho akarwa Bhëëri-sheebha hayö.
Bhamura abhaaye bhakamoghegha,
umwene,
abhaana bhaabho abhake,
hamwë na bhakaabho,
bhakabhatoora mo-sematoka siyö Farao yaahirrë-yo,
okore semogheghe.
6 Bhakaghegha situgho na ëbhëntö ibhyëndë bhyonswe igho,
bheno bhaarë nabhyo Kaanaani iyö.
Mbe,
Yaakobho akangʼaanyera Miisiri na urwebhoro urwaye rwonswe igho.
7 Akaghegha abhaana abhaaye,
abha ekekari na ikishaasha,
abhöshökörö abhaaye,
abha ekekari na abha ikishaasha,
na urwebhoro urwaye,
bhonswe igho bhakaghya Miisiri.
Abheebhorwa abha Yaakobho
8 Ghano hano,
ngo amariina agha bhano bhaaghëëyë Miisiri,
abha urwebhoro urwa Isiraëri,
ono iriina iryaye iryëndë ni-igha Yaakobho.
Ruubhëëni,
uyö we yaarë omotangi uwa Yaakobho.
9 Abhaana abha Ruubhëëni,
m-baabho Hanoki,
Paru,
Hesironi na Karimi.
10 Abhaana abha Simeoni,
m-baabho Yemuëri,
Yamini,
Ohadi,
Yakini,
Sohaari na Shauri,
omoona uwa Nyabhakaanaani.
11 Abhaana abha Raawi,
m-baabho Gherishoni,
Kohati na Merari.
12 Abhaana abha Yuuda,
m-baabho Ëri,
Onaani,
Sheera,
Përëësi,
na Zeera.
Kasi Ëri na Onaani,
mbaakwërëëyë ku-kyaro ikya Kaanaani.
Abhaana abha Përëësi,
m-baabho Hëzirööni na Hamuri.
13 Abhaana abha Isakaari,
m-baabho Tora,
Puva,
Yashubhu na Shimuröni.
14 Abhaana abha Zabhurööni,
m-baabho Seredi,
Ërööni na Yareeri.
15 Bhayö mbo abhamura bhano Yaakobho yaaibhööyë na mokaaye Rea ku-kyaro ikya Padani-aramu.
Na Diina wonswe n-hayöhayö yaamwibhörëëyë,
ko-mokari uyöuyö.
Abhaana abha Yaakobho na abhöshökörö abhaaye,
mbaarë merongo etatö na bhatatö.
16 Abhaana abha Ghaadi,
m-baabho Sefoni,
Haghi,
Shuni,
Esibhoni,
Ëri,
Arodi na Arëri.
17 Abhaana abha Asheeri,
m-baabho Imuna,
Ishiva,
Ishivi,
Bhëria,
na Sera mohara uwaabho.
Abhaana abha Bhëria,
m-baabho Hëbhëri na Marikieri.
18 Abhamura bhano Yaakobho yaaibhööyë na Ziripa,
omoghorwa uwa ekekari uwa Rea,
ono Raabhaani yaahaayë mohara waaye Rea.
Abhaana na abhöshökörö abha Yaakobho ko-mokari uyö,
bhaarë ikömi na bhasansabha.
19 Abhaana bhano Yaakobho yaaibhööyë na Raahëëri,
n-Yusufu na Bhenjamini.
20 Abhaana abha Yusufu bhano yaaibhörëëyë Miisiri,
m-Manase na Efurahimu.
Abhaana bhayö,
yaabhaibhööyë ko-mokari ono yaabherekerwanga igha,
Asenati,
mohara wa Potifera ömösëngëri uwa umughi ughwa Öni.
21 Abhaana abha Bhenjamini,
m-baabho Bheera,
Bhëkëri,
Ashibhëri,
Ghera,
Naamani,
Ehi,
Roshi,
Mupimu,
Hupimu na Aridi.
22 Bhayö mbo abhaana bhano Yaakobho yaaibhööyë ko-Raahëëri.
Bhonswe igho hamwë na abhöshökörö mbaarë ikömi na bhane.
23 Omoona uwa Daani,
n-Hushimu.
24 Abhaana abha Nafutaari,
m-baabho Yaseeri,
Ghuni,
Yësëri na Shiremu.
25 Bhayö mbo abhamura bhano Yaakobho yaaibhööyë ku-Bhiriha omoghorwa uwa ekekari ono Raabhaani yaahaayë mohara waaye Raahëëri,
m-muhungatë bhaarë.
26 Abheebhorwa abha Yaakobho bhonswe igho bhano yaangʼaanyirë nabho ukughya mu-kyaro ikya Miisiri kutigha abhakaamoona bhaaye,
bhaarë merongo esansabha na bhasansabha.
27 Miisiri eera,
Yusufu yaarenga aibhööyë-yo abhaana bhabhërë.
Ku bhuyö Yaakobho na abheebhorwa abhaaye bhano bhaasöhirë Miisiri,
mbaarë abhantö merongo muhungatë.
Yaakobho arahika Miisiri
28 Yaakobho yaarenga atangatëri Yuuda ku-Yusufu,
okore amwörökërri enshera iya ukughya Ghöshëni hayö bhaamënyirë.
Ho bhoono Yaakobho na bhamura bhaabho,
bhakaghya igho bhakahika Ghöshëni.
29 Yusufu akasëëmya eghaari iyaaye iya ukurutwa na sefaraasi,
akaghya ukuturungʼana suwaabho Ghöshëni.
Hano Yusufu yaahikiri suwaabho Ghöshëni,
akamwibhaara,
akakuura ku-ribhagha ritambë.
30 Yaakobho akatëëbhya Yusufu igha,
“Nenkaakwa bhoono igho,
tigha nkwe,
ko bhoora nkörööshë na amaiso aghaane igha m-möhöru ökërë.”
31 Yusufu akatëëbhya bhawamwabho hamwë na abhantö bhonswe igho abha eka iya suwaabho igha,
“Nendaaghi ntëëbhi Farao igha,
bhawamwëtö na eka iya taata bhano bhaarenga Kaanaani,
bhaishirë ku-öni.
32 Abhantö bhayö,
m-batughi abha situgho,
ku bhuyö,
bhaishirë na amahisho agha sëmböri,
amangʼöndi,
sengʼombe na ëbhëntö ibhyabho bhyonswe igho bheno bhaarenga nabhyo iyö.
33 “Ku bhuyö hano Farao araabhabherekere abhabhööri amangʼana agha emeremo ighyënyu,
34 bhëënyu mömötëëbhi igha,
‘Bhëëtö abhaghorwa abhaaho,
m-batughi abha situgho törë,
bhëëtö bhonswe na abhaibhöri bhëëtö kurwa kare.’
Hayö ho moraaikërribhwi okomenya Ghöshëni,
ko bhoora umutughi uwa situgho,
uyö n-kinyënyëëri ko-Bhamiisiri.”