Yusufu araitobhora ko-bhamura abhaabho
45
Mbe,
hayö bhoono Yusufu akakerwa ököghömërrya,
ku bhuyö,
akakuura mbere iya abhantö bhonswe igho bhano bhaaimërëëyë haangʼë nawe hayö.
Akabhatëëbhya igha,
“Murishoke kebhara.”
Akatama umwene na bhamura abhaabho.
Akaitobhora ko-bhamura abhaabho,
2 akakuura bhököngʼu,
kora abhaghorwa bhano bhaarenga kebhara bhakaighwa.
Amangʼana ghayö,
ghakahika ko-Farao,
na ko-bhantö abhaaye bhonswe igho.
3 Yusufu akatëëbhya bhamura abhaabho igha,
“Nö-öni Yusufu!
Taata m-möhöru akërë?”
Bhamura bhaabho bhakatongʼaara,
tebhamumurri hë.
4 Yusufu akabhatëëbhya igha,
“Musuntare ku-öni hano.”
Hano bhaamusuntarëëyë,
akabhatëëbhya igha,
“Öni nö-öni mura uwëënyu omoke ono mwaangorri ko-Bhamiisiri.
5 Motakoobhoha,
handë ukwiyighwa bhoghogho igha,
n-kwakë mwaangorri,
ko bhoora Waryobha we yaaghërrë nkabhatangatera ukuusha eno,
okore abhantö bhahone.
6 Omooka ghono nu-ghwa kabhërë,
kerengera hano inshara yaasöhirë ku-kyaro,
kasi ghekeeyo imyoka etaano,
gheno abhantö bhatarerema handë okoghesa.
7 Waryobha we yaaghërrë nkabhatangatera ukuusha eno,
ko bhono yaatunanga mbahöni bhëënyu na abhaana abhëënyu,
kö-bhöhönia ubhurito bhono,
okore möghëndërri kobhaho ko-kebhara kono.
8 Ku bhuyö momanye igha,
të-bhëënyu mwaandëëtirë eno hë,
Waryobha we yaandëëtirë eno.
Yaankora mbe ömöntö uwa okoraghërrya Farao,
na nö-öni omonene uwa abhantö abha eka iyaaye,
na ko-bhantö bhonswe igho abha ikyaro kyonswe igho ikya Miisiri.
9 “Mokorre këmwë moghende mötëëbhi taata igha,
‘Mura uwaaho Yusufu aghambirë igha,
Waryobha yaankora okobha omonene uwa ikyaro kyonswe igho ikya Miisiri,
ku bhuyö otakaategheta ukuusha ku-öni hano.
10 Uwe na abhaana abhaaho,
abhaishökörö abhaaho,
ëbhëntö ibhyaho na situgho isyaho syonswe igho,
moraamenye haangʼë na öni,
ahasë hano hakobherekerwa igha Ghöshëni.
11 Hano oraashe Ghöshëni hano,
nendaakutughe uwe,
bhahiiri abhaaho na situgho isyaho,
okore motakaaramboka na umweko,
ko bhoora ghekeeyo imyoka etaano ighya inshara.’”
12 Ghwiki Yusufu akabhatëëbhya igha,
“Bhëënyu abheene mörööshë,
kora mura uwëëtö Bhenjamini wonswe nkomaaha arë igha,
nö-öni nkoghamba amangʼana ghayö.
13 Moghende mötëëbhi taata igha,
neena obhotoro,
na umweya omonene ku-kyaro ikya Miisiri kyonswe igho.
Mömötëëbhi amangʼana ghonswe igho ghano mörööshë hano.
Hano moraamare ökömötëëbhya amangʼana ghayö,
momoreete hano bhöngö.”
14 Mbe,
Yusufu akaibhaara Bhenjamini,
mura uwaabho omoke,
bhakakuura bhonswe igho.
15 Hano Yusufu akomara,
akaibhaara bhamura bhaabho na eno arakuura.
Bhamura abhaabho bhakashumaasha nawe.
Farao arabherekera Yaakobho aashe komenya Miisiri
16 Hano amangʼana ghaahëkërëëyë Farao igha,
bhawaabho Yusufu bhaishirë,
akashomerwa,
abhaköri abha emeremo abhaaye bhonswe bhakashomerwa.
17 Farao akatëëbhya Yusufu igha,
“Ötëëbhi bhamura bhëënyu bhayö igha,
bhatoore imirigho ghyabho ku-sitikërë,
bhakyore Kaanaani.
18 Bhaghende bhareete suwëënyu na bhahiiri bhëënyu bhonswe igho,
öni nembahaana ahasë ahaiya Miisiri hano,
aha rirobha rinöru,
bhamenye-ho bhashömëëywë.
19 Bhatëëbhi igha,
‘Mogheghe sematoka isya ukurutwa na sefaraasi Miisiri hano,
ko okoghera iya abhaana abhëënyu na bhakëënyu,
motakaatigha ukuusha na suwëënyu.
20 Motakaaitegherra amangʼana agha ëbhëntö ibhyënyu,
ko bhoora ubhuuya bhonswe igho ubhwa Miisiri,
nu-bhwënyu bhoraabhe.’”
21 Mbe,
bhamura abha Yaakobho bhakakora bhuyö bhaatëëbhiibhwi.
Yusufu akabhahaana sematoka isya ukurutwa na sefaraasi kya bhono Farao yaaghambirë,
akabhahaana na ibhyakorya ibhya ko-nshera.
22 Akabhahaana singibho isya ukusyörya bhonswe igho,
kasi Bhenjamini we akamohaana seehera amaghana atatö,
na singibho isaano isya ukusyörya.
23 Akatomera suwaabho sitikërë ikömi seno syaaghëghirë ëbhëntö ibhiiya ibhya Miisiri,
na sitikërë senkari ikömi,
seno syaaghëghirë engano,
emekaate na ibhyakorya ibhya suwaabho bheno akaarëëyë ko-nshera.
24 Hano Yusufu akomara,
akaraghana na bhamura bhaabho.
Hano bheemokanga,
akabhatëëbhya igha,
“Motakaabhehana ko-nshera.”
25 Mbe,
bhamura bhaabho bhayö,
bhakeemoka ukurwa Miisiri,
bhakakyora Kaanaani ku-Yaakobho,
suwaabho.
26 Hano bhaahikirë ku-suwaabho,
bhakamötëëbhya igha,
“Yusufu ho arë m-möhöru!
We ömötöngi uwa ikyaro ikya Miisiri kyonswe igho!”
Akatongʼaara,
tiyaikërëëyi amangʼana ghayö hë.