Bhamura bhaabho Yusufu bharakyora Miisiri
43
Ko-nkaagha iyö,
inshara ëndörö kai,
ekaghëndërrya ku-kyaro ikya Kaanaani.
2 Hano ibhyakorya bheera bhamura abha Yaakobho bhaaruusiri Miisiri bhyaahööyë,
Yaakobho akatëëbhya bhamura abhaaye igha,
“Mukyore Miisiri motonde ghwiki ibhyakorya ibhyëndë.”
3 Kasi Yuuda akatëëbhya suwaabho igha,
“Ömötöngi uwa Miisiri yaatötëëbhëri igha,
‘Hano muryanga ukuusha na mura uwëënyu omoke,
temoremaahana na öni hë.’
4 Twikërëëyi ukughya okotonda ibhyakorya,
kasi ni-igha wikërri tuhinane na Bhenjamini.
5 Hano oraange igha atakaahinana na bhëëtö,
bhëëtö bhonswe tituughi-yo hë,
ko bhoora ömötöngi uwa Miisiri yaatötëëbhya igha,
‘Hano muryanga ukuusha na mura uwëënyu omoke,
temoremaahana na öni hë.’”
6 Yaakobhoa akamohonshora igha,
“N-kwakë möndëëtëëyë inyanko eno kö ökömötëëbhya igha,
moona mura uwëënyu omoke ono arëngë ka eno?”
7 Bhakamötëëbhya igha,
“Ömötöngi uyö,
yaatöbhörërrëëyi bhököngʼu,
amangʼana agha bhahiiri bhëëtö,
kora akatöbhöörya igha,
‘Suwëënyu ho akërë?
Moona mura uwëënyu uwöndë?’
Na bhëëtö tokamohonshora ko okorengʼaana na bhuyö yaatöbhöörri.
Bhoono iyakë tokaamanyirë igha,
nakaatötëëbhëri igha hano turikyora-yo tuhinane na mura uwëëtö uyö?”
8 Yuuda akatëëbhya suwaabho uyö igha,
“Uwe otatigha nhinane nawe,
toghende totonde ibhyakorya,
okore totakaaramboka na umweko,
bhëëtö,
uwe na abhaana abhëëtö.
9 Öni nendaamonaghi,
nkyore nawe hano.
Hano ndyanga ukukyora nawe,
ommaahe igha m-mosarya ndë ku-uwe sinsikö syonswe igho.
10 Singa totaitëghëtya,
singa twamara ukughya na ukukyora-yo urwa kabhërë.”
11 Mbe,
suwaabho akabhahonshora igha,
“Nyoore ni-igho,
mogheghe amaghuta agha amasisi make igho,
öbhöökë,
ëkörösö,
amaghuta ghano ghakurumbaasa,
sikungu na sëröözi.
Mogheghe imituho ighya ku-kyaro ikyëtö kono,
motoore mu-mifuko ighyënyu momoherre.
12 Mogheghe na seehera isya okotondera ibhyakorya na seera mwaanyöörrë sërëngë mo-maghonera ghëënyu.
Eratora okobha igha mbaasyëbhirë-mo.
13 Mogheghe na mura uwëënyu,
muhinane nawe kö-möntö uyö.
14 Waryobha uwa obhotoro bhwonswe igho,
abhasakëri,
okore ömötöngi uyö,
abhe na ikyabhera kö-bhëënyu,
aruusi mura uwëënyu mo-kebhohe,
na Bhenjamini wonswe mukyore nawe ka hano.
Nyoore nkukwerwa na abhaana,
tigha nkwerwe.”
Bhamura bhaabho Yusufu bharahinana na Bhenjamini Miisiri
15 Bhamura abha Yaakobho,
bhakaghegha imituho ghiyö bhaatëëbhiibhwi,
bhakaghegha seehera isya okotonda ibhyakorya,
na seera bhaanyöörrë mo-maghonera,
bhakaghegha na Bhenjamini,
bhakahinana nawe Miisiri.
Hano bhaahikirë Miisiri,
bhakaghya ku-Yusufu,
bhakeemerra mbere iyaaye.
16 Hano Yusufu yaarööshë Bhenjamini araasha na bhamura bhaabho,
akatëëbhya umwimërërri uwa waaye ka igha,
“Ghegha abhaghëni bhayö,
obhahire waane ka.
Obhaghooghere itugho,
ösëëmi amangʼana bhuuya,
ko bhoora nendaashe korya nabho ibhyakorya ibhya omobhasö.”
17 Umwimërërri uyö,
akakora kya bhono yaatëëbhiibhwi,
akahira abhaghëni bhayö ka wa Yusufu.
18 Hano abhaghëni bhayö,
bhaarööshë igha n-wa Yusufu bhakuhirwa,
bhakoobhoha.
Bhakaghamba igha,
“Nyoore n-ko okoghera iya seehera seera twaanyöörrë sëtöörrwë mo-maghonera ghëëtö urwa mbere.
Ku bhuyö mbaraatwitani na okotoghoota,
bhatokore tobhe abhaghorwa kora bhagheghe sitikërë isyëtö.”
19 Bhakasuntarra umwimërërri uwa ughunyumba ughwa Yusufu,
bhakashumaasha nawe bhakëërëngë mo-kesaku,
bhakamötëëbhya igha,
20 “Torakosaasaama utwabhere,
ko bhoora ekembere hano twaaishirë ntwaatöndirë ibhyakorya.
21 Hano tokomara tokakyora ka.
Hano twaahikirë ahasë aha okoraara enkaagha eno waanyöörrë tökërëngë ko-roghendo torakyora ka,
tokatashora amaghonera ghëëtö.
Hano twaaghatashööyë,
tokanyoora-mo seehera isyëtö sëtöörrwë mo-maghonera aghëëtö ighörö hayö igho,
ku bhuyö twishirë na seehera siyö.
22 Kasi tetomanyirë ömöntö ono yaasëtörrë-mo hë.
Kora ghwiki twishirë na seehera isyëndë isya okotonda ibhyakorya.”
23 Umwimërërri uyö akabhatëëbhya igha,
“Motakoobhoha,
ko bhoora,
Waryobha uwëënyu,
ono arëngë Waryobha uwa suwëënyu,
we yaatöörrë seehera siyö mo-maghonera ghëënyu.
Seehera siyö naasërööshë.”
Hano akomara,
akabhareetera Simeoni,
mura uwaabho ono yaarë mo-kebhohe.
24 Umwimërërri uyö,
akabhasërëënia mu-ghunyumba ughwa Yusufu,
akabhahaana amanshë agha ukwisaabha amaghörö.
Kora sitikërë isyabho syonswe,
akasehaana ibhyakorya.
25 Mbe,
ko bhoora bhaatëëbhiibhwi igha,
mbaraaraghere hamwë na Yusufu,
bhakasëëmya imituho ighya ukumutuha.
26 Hano Yusufu yaakyörrë ka,
bhakamohaana imituho ghiyö bhaarë naghyo,
bhakamwihenyerra ubhusyö ubhwabho bhokahika hansë,
ukwörökya igha,
mbamösöökirë.
27 Yusufu akabhakëërya.
Hano akomara,
akabhabhöörya igha,
“Suwëënyu ono mwaantëëbhëri igha yaaghota,
m-buuya arë?
M-möhöru akërë?”
28 Bhakamohonshora igha,
“Omoghorwa uwaaho taata uwëëtö,
m-möhöru.”
Bhakamwihenyerra ubhusyö ubhwabho bhokahika hansë,
ukwörökya igha,
mbamösöökirë.
29 Hano Yusufu yaaghörrökëri amaiso,
akamaaha mura uwaabho enda ëmwë,
akabhabhöörya igha,
“Ono we mura uwëënyu omoke ono mwaantëëbhëri amangʼana ghaaye?
Waryobha akongʼoore moona uwaane.”
30 Yusufu akabha na amaigha agha okomaahana na omoke uwaaye uyö bhököngʼu,
amaisöri ghakaheta,
akaihëënia bhöngöbhöngö,
akaghya akasoha mu-kinyumba ikyaye akakuura.
31 Hano yaamarrë ukukuura,
akaisaabha ubhusyö,
akarishoka,
akaiköngʼërrya,
akatëëbhya abhaghorwa abhaaye igha,
“Motoreetere ibhyakorya.”
32 Yusufu akareeterwa ibhyakorya ibhyaye umwene.
Na bhamura abhaabho bhakahaanwa ibhyakorya hagharë,
na Abhamiisiri bhonswe hagharë.
Yaakörrwë igho,
ko bhoora m-mughiro ghwaarë Abhamiisiri okosanga ibhyakora na Abhaëbhuraania.
33 Bhamura abhaabho Yusufu mbaaikariibhwi ko okorengʼaana na öbhöntö bhökörö,
ukusimirya omotangi,
okohekera kö-mököghöti.
Bhakamaaherrana,
bhakaroghoora.
34 Mbe,
bhakahaanwa ibhyakorya ukurwa ko-meeza iya Yusufu.
Kasi Bhenjamini umwene yaahaaywë hare kataano kokera bhonswe igho.
Bhakanywa,
bhakashomerwa hamwë na Yusufu.