Bhamura bhaabho Yusufu bharaasha okotonda Miisiri
42
Mbe,
hano Yaakobho yaaighuurë amangʼana igha ibhyakorya nkotooka bhërë Miisiri,
akatëëbhya bhamura abhaaye igha,
“N-kwakë mwikaayë hano bhosa igho,
motaana moremo?
2 Nighuurë igha ibhyakorya nkotooka bhërë Miisiri,
ku bhuyö moghende mototondere ibhyakorya,
okore totakaaraamboka na umweko.”
3 Mbe,
bhamura abhaabho Yusufu ikömi,
bhakangʼaaraara,
bhakaghya Miisiri,
okore bhatonde-yo ibhyakorya.
4 Kasi Yaakobho akaangera Bhenjamini mura waabho Yusufu igha,
atakaahinana nabho,
okore atakaasha ukunyoorwa-yo na engʼana ngogho.
5 Bhamura abha Yaakobhoa bhakaghootana-ko na abhantö abhandë bhano bhaaghyanga Miisiri okotonda ibhyakorya,
ko bhoora ikyaro ikya Kaanaani kyaarë na inshara.
Yusufu arashaashya bhawamwabho
6 Enkaagha iyö,
Yusufu m-mötöngi omonene yaarë ku-kyaro ikya Miisiri.
We yaaghörryanga abhantö bhonswe igho ibhyakorya.
Urusikö nyabhorebhe,
bhawamwabho Yusufu bhakaasha,
bhakamwihenyerra,
ubhusyö ubhwabho bhokahika hansë.
7 Hano Yusufu yaarööshë bhamura abhaabho,
akabhamanya,
kasi akaikora igha tabhamanyirë hë,
akashumaasha nabho kwa bhörrö.
Akabhabhöörya igha,
“Bhëënyu hai muruurë?”
Bhakamohonshora igha,
“N-Kaanaani turwërëëyë,
ni-bhyakorya twishirë okotonda.”
8 Yusufu yaamanyirë bhamura abhaabho,
kasi bho tebhaamomanyirë hë.
9 Akahiita ebherooto bheera yaabharooteranga,
ku bhuyö akabhatëëbhya igha,
“Bhëënyu m-bashamishi mörë,
mmwishirë ukwitaaha ikyaro ikyëtö,
okore momanye öbhötëntëëru ubhwako.”
10 Bhakamohonshora igha,
“Te-bhashamishi törë hë,
omonene uwëëtö,
bhëëtö abhaghorwa abhaaho,
ni-bhyakorya twishirë okotonda.
11 Bhëëtö bhonswe igho,
m-baana abha moghaaka ömwë törë,
tëtörëngë abhashamishi hë,
m-bantö abha heene törë.”
12 Yusufu akabhahonshora igha,
“A a,
bhëënyu mwishirë ukushamishya ikyaro ikyëtö,
okore momanye öbhötëntëëru ubhwëtö.”
13 Bhakamohonshora igha,
“Bhëëtö abhaghorwa abhaaho,
ntwaarenga abhamura ikömi na bhabhërë abha omoghaaka ömwë.
Nku-kyaro ikya Kaanaani tweebhorrwa.
Mura uwëëtö omoke,
we atighaayë yeeka ko-taata,
mura uwëëtö uwöndë,
yaakwa.”
14 Yusufu akabhatëëbhya igha,
“M-maheene ngambirë igha,
‘Bhëënyu m-bashamishi mörë!’
15 Enshera eno yo araaghere momanyekane nyoore ghayö mokoghamba m-maheene.
Ndatyana ku ubhwera ubhwa Farao igha,
timuurwe hano hë,
okohekera hano mura uwëënyu omoke uyö,
ariisha.
16 Motome ömwë uwëënyu,
aghende areete hano mura uwëënyu omoke uyö,
enkaagha iyö,
abhandë mbaraatighare bharëngë mo-kebhohe.
Hayö ho eraamanyekane igha,
m-maheene mokoghamba.
Hano etaabhe igho,
ndatyana ku bhwera ubhwa Farao igha,
bhëënyu,
m-bashamishi mörë!”
17 Mbe,
akabhaseekera mo-kebhohe sinsikö isatö.
18 Urusikö urwa akatatö Yusufu akabhatëëbhya igha,
“Ko bhoora öni nö-möntö ono nkwighwera Waryobha,
mokore bhuyö ndaabhatëëbhi,
okore mohone.
19 Nyoore m-bantö abha heene mörë,
ömwë uwëënyu atighare mo-kebhohe mono,
abhandë moghende ka,
moherre abhantö abhëënyu ibhyakorya bhatakaaghëndërrya kunyahaareka na umweko.
20 Hano moraamare,
moreete omoke uwëënyu hano.
Hano eraamaahekane igha m-boheene mokoghamba,
hayö ho motaitwe.”
Bhakaikërrya okokora bhuyö yaabhatëëbhëri.
21 Mbe,
bhakatëëbhania igha,
m-maheene bhëëtö ntwaasarrya omoke uwëëtö Yusufu,
ntwaarööshë bhono yaabhaabhayëëyë,
na bhono yaatosaasaamanga,
kasi bhëëtö,
twaarööshë igha te-ngʼana hë.
Bhoono inyanko eno ikutunyoora,
n-ko okoghera iya engʼana iyö twaakora.
22 Ruubhëëni akabhatëëbhya igha,
“Naabhakaanëri igha,
motakaakora bhoghogho wamwëtö,
kasi bhëënyu mokaanga kunnyighwa.
Bhoono amaanyinga agha wamwëtö,
ngo ghakokora torasyanya igho.”
23 Hano bhaashumaashanga igho,
tebhaamanyirë igha,
Yusufu nkobhaighwa arë.
Ko bhoora yaashumaashanga nabho,
okohetera kö-mösësöri uwa ekeghambo ikyabho.
24 Hano Yusufu yaaighuurë amangʼana ghayö,
akaihëënia ukurwa hayö,
akaghya mbareka akakuura.
Hano yaamarrë ukukuura,
akakyora ukushumaasha nabho.
Akatëëbhya abhaköri abha emeremo igha,
bhaghoote Simeoni bhamobhohe sipingu bhamuhire mo-kebhohe.
Bhakakora igho bhawamwabho bharamaaherra.
Bhamura bhaabho Yusufu bharakyora Kaanaani
25 Hano ghayö ghahööyë,
Yusufu akaraghërrya abhaköri abha emeremo abhaaye igha,
bhaishöri ibhyakorya mo-maghonera agha bhamura bhaabho Yusufu,
na seehera isyabho siyö bhaishirë nasyo okotonda ibhyakorya,
bhasetoore mo-maghonera aghaabho.
Kora bhabhahaane ibhyakorya ibhya okorya ko-roghendo.
Abhaköri abha emeremo bhayö,
bhakakora bhuyö bhaatëëbhiibhwi.
26 Bhamura bhaabho Yusufu bhakabhërëkya sitikërë imirigho,
bhakatanora.
27 Hano bhaahikirë ahasë aha okoraara,
ömwë uwaabho akatashora reghonera iryaye,
okore ahaane itikërë iyaaye ibhyakorya,
akanyoora mwi-ghonera iryaye,
seehera isyaye seera sërëngë kighörö hayö igho,
akaroghoora.
28 Akatëëbhya bhamura bhaabho igha,
“Bhankyörëëyi seehera isyane!
Maaha n-seseno mwi-ghonera n-kighörö hano sërë.”
Hano bhamura bhaabho bhaaighuurë amangʼana ghayö,
situukya sekabhairremoka.
Bhakamaaherrana ko-maiso,
bhakarighita.
Bhakabhoorania igha,
“Kana eno ne-ngʼana kë,
eno Waryobha atökörëëyë?”
29 Hano bhaahikirë Kaanaani ku-suwaabho,
bhakamötëëbhya ghonswe igho,
ghano ghaabhanyöörrë iyö.
30 Bhakamötëëbhya igha,
“Ömötöngi uwa ikyaro ikya Miisiri,
yaarë kushumaasha na bhëëtö kwa bhörrö,
kora yaarë kokanya igha,
bhëëtö m-bashamishi törë.
31 Kasi bhëëtö tokabhatëëbhya igha,
bhëëtö m-bantö abha heene törë,
tëtörëngë abhashamishi hë.
32 Tokamötëëbhya igha,
‘Bhëëtö ntweebhorwa abhaana ikömi na bhabhërë,
ko-moghaaka ömwë,
kasi ömwë yaakwa,
na omoke uwëëtö,
atighaayë yeeka na taata ku-kyaro ikya Kaanaani.’
33 Mbe,
ömötöngi uwa ikyaro ikya Miisiri akatötëëbhya igha,
‘Enshera eno yo eraaghere mmanye igha,
m-maheene,
bhëënyu m-bantö abha heene mörë.
Mutighe hano mura uwëënyu ömwë,
abhandë mogheghe ibhyakorya muhire ka,
ko-bhantö abhëënyu bhano bhakunyahaareka na umweko.
34 Kasi bhano moraaghi ka,
hano murikyora,
moreete mura uwëënyu omoke,
hayö ho ndemanya igha,
bhëënyu m-bantö abha heene mörë,
tëmörëngë abhashamishi hë.
Kora hayö ho ndehaatera mura uwëënyu,
na bhëënyu moraaikërërribhwi okokora ibhyashara ku-kyaro kono.’”
35 Mbe,
enkaagha eno bhaaruusyanga ibhyakorya mo-maghonera,
bhakanyoora-mo imifuko ighya seehera isyabho,
bhakaitakya,
bhakoobhoha bhwonswe igho,
kora na suwaabho.
36 Yaakobho umwibhöri uwaabho akabhatëëbhya igha,
“Temokomanya igha mwaantabhotera abhaana abhaane hë!
Yusufu,
taaho hë,
Simeoni,
taaho hë,
ghwiki moratuna igha mogheghe kora Bhenjamini.
Amangʼana ghayö ghonswe igho,
nö-öni ghakunyoora.”
37 Ruubhëëni akatëëbhya suwaabho igha,
“Ngʼaana Bhenjamini mo-mabhoko aghaane,
nindimukyorya ku-uwe.
Hano ntarikyora na Bhenjamini,
wite abhamura abhaane bhabhërë.”
38 Kasi Yaakobho akamohonshora igha,
“Omoona uwaane taahinane na bhëënyu hë.
Mura uwaabho yaakwa,
ono we umwene yaatighara-ho.
Hano engʼana engogho eraamunyoore ko-roghendo iyö,
mmoraaghere niighwe bhoghogho nkwe.
Momanye igha öni naaghota.”