Yusufu arahonyorrwa imbumbure iya ebherooto ibhya abhabhohe bhabhërë
40
Hano sinsikö nyabhorebhe syaahëtërë-ho,
abhaimërërri abhahënshëri abhanene bhabhërë abha omokama uwa Miisiri,
ömösëëmya uwa emekaate,
na ömösëëmya uwa ibhya ukunywebhwa,
bhakasarrya Farao,
omokama uwa Miisiri.
2 Farao akarererra abhaköri abha emeremo abhaaye abhanene bhayö.
3 Akabhahira mo-kebhohe,
mo-mabhoko agha omonene uwa abhasirikare abharëndi abha Farao,
mono Yusufu yaabhöhirwë-mo.
4 Omonene uwa abharëndi uyö,
akashaaghora Yusufu igha,
abhasërëëninga.
Bhakatighara,
ku-ribhagha ryonswe igho riyö bhaaikaayë mo-kebhohe muyö.
5 Ubhutikö ubhwa urusikö nyabhorebhe,
enkaagha eno bhaarenga mo-kebhohe,
ömösëëmya uwa ibhya ukunywebhwa bhaana ömösëëmya uwa emekaate uwa omokama,
bhakaroota.
Kera ömöntö akaroota ekerooto ikyaye,
na kera ekerooto nkyaarë na ensonga iyaakyo.
6 Hano bhwaakëëyë,
Yusufu akaghya kobhaitaaha,
akanyoora mbabhaabhayëëyë.
7 Ku bhuyö Yusufu akabhöörya abhaköri abha emeremo bha Farao bhano yaarë nabho mo-kebhohe yeeka wa omonene uwaaye igha,
“Ndarra mobhaabhayëëyë?”
8 Bhakamötëëbhya igha,
“Twaröötirë ebherooto,
kasi ömöntö uwa okosobhoora ebherooto bhiyö,
taaho hë.”
Yusufu akabhatëëbhya igha,
“Möntëëbhi ebherooto ibhyënyu bhiyö.
Waryobha ono amanyirë amangʼana ghonswe igho,
naraandaghërri ensonga iya ebherooto ibhyënyu bhiyö.”
9 Omonene uwa ökösëëmya ibhya ukunywebhwa,
akatëëbhya Yusufu ekerooto ikyaye,
akamötëëbhya igha,
“Naarë ndööshë omozabhibhu ghörëngë mbere iyaane,
10 ghoona amasagharya amake igho atatö,
amatö aghaako ghakasebhoka,
ëbhëmörë bhekasaghaatërya,
kora ghokaama sezabhibhu sëntöbhu.
11 Naarë na ekekombe ikya Farao mo-kobhoko kwane,
nkaghegha sezabhibhu,
nkasemetera mo-kekombe kiyö,
nkahaana Farao mo-kobhoko ukwaye.”
12 Yusufu akamötëëbhya igha,
“Esobhooro iya ekerooto ikyaho kiyö ërëngë igha,
amasagharya atatö ghayö,
n-sinsikö isatö.
13 Hano sinsikö isatö seraahete,
Farao naraakuruusi mo-kebhohe akukyöri ko-meremo ighyaho.
Noraahaanenga Farao ekekombe mo-mabhoko aghaaye,
kya bhono waamösëëmëryanga ibhya ukunywebhwa.
14 Kasi hano amangʼana ghaaho gharaaghi bhuuya,
unhiitoke-ko,
kora ongambenga bhuuya ko-Farao,
okore öni wonswe,
ndwe-ko mo-kebhohe mono.
15 Öni mmu-kyaro ikya Abhaëbhuraania naaruusiibhwi ntahanshirë,
hano nehano,
tenasarya engʼana yoyonswe igho,
iya okoghera mbohwe.”
16 Hano ömösëëmya omonene uwa emekaate ighya Farao uyö yaaighuurë esobhooro iyö igha nerengeraini bhuuya,
wonswe akatëëbhya Yusufu igha,
“Kora öni wonswe,
naaröötirë.
Nkaroota igha,
niitëëkirë sehongo isatö isya emekaate ko-motwe ughwane,
17 ko-rohongo urwa ighörö,
bhyaare-ko ibhyakorya ibhya Farao ibhya seteemo syonswe igho,
kasi ibhinyönyi,
bhekarya ibhyakorya bhiyö naarë niitëëkirë.”
18 Yusufu akamötëëbhya igha,
“Esobhooro iya ekerooto ikyaho kiyö ni-igha,
sehongo isatö seera,
n-sinsikö isatö.
19 Hano sinsikö isatö siyö seraahete,
Farao naraakuruusi mo-kebhohe,
akobhotore omotwe ughwaho,
akusunge kö-mötë,
na ömöbhërë ughwaho,
ghoreebhwe na amanyönyi.”
20 Urusikö urwa katatö,
nu-rusikö urwa inyangi iya ukwebhorwa ukwa Farao rwaarë.
Farao akakorra inyangi abhaköri abha emeremo abhaaye bhonswe igho.
Akaruusya mo-kebhohe ömösëëmya uwa emekaate na ömösëëmya omonene uwa ibhya ukunywebhwa,
akabhatoora mbere iya abhatangati abha obhokama ubhwaye.
21 Mbe,
ömösëëmya omonene uwa ibhya ukunywebhwa,
akakyöribhwa ko-meremo ighyaye ighya okohaana Farao ekekombe.
22 Kasi ömösëëmya omonene uwa emekaate oora,
we akasungwa kö-mötë.
Ku bhuyö yaabhaayë kya bhoora Yusufu yaamötëëbhëri enkaagha eno yaabhasöbhörrëyë ebherooto ibhyabho.
23 Kasi ömösëëmya omonene uwa ibhya ukunywebhwa uyö,
akeebha Yusufu,
tiyaamuhiitökirë ghwiki hë.