Yusufu yeeka wa Pötifa
39
Mbe,
hano Abhaishimaëri bhaara bhahikirë ku-kyaro ikya Miisiri hamwë na Yusufu,
bhakamöghörya kö-mötöngi Umumiisiri ono yaabherekerwanga igha Pötifa.
Pötifa uyö,
m-motangati omonene yaarë uwa abhasirikare abharëndi abha Farao.
2 YEHOBHA Waryobha n-hamwë yaarë na Yusufu,
ku bhuyö akasaghatërya.
Yaamënyirë mu-nyumba iya omonene uwaaye Umumiisiri.
3 Pötifa akamaaha YEHOBHA Waryobha n-hamwë arë na Yusufu,
we yaamohaayë obhotoro ubhwa ëbhëntö bhyonswe igho bheno yaakörrë.
4 Yusufu yaaikërribhwi mbere iya Pötifa omonene uwaaye.
Pötifa akamokora Yusufu abhe umwimërërri uwa inyumba iyaaye na ëbhëntö ibhyaye bhyonswe igho.
5 Ukurwa hano Pötifa yaakörrë Yusufu abhe umwimërërri uwa inyumba iyaaye na ëbhëntö ibhyaye bhyonswe igho,
YEHOBHA Waryobha akangʼoora umughi ughwa Pötifa,
ko okoghera iya Yusufu.
Obhongʼoore ubhwa Waryobha,
bhokabha kö-bhëntö bhyonswe igho ibhya yeeka na kö-möghöndö.
6 Pötifa akahaana Yusufu ubhwera kö-bhëntö ibhyaye ibhyëndë,
kasi umwene,
akabha arakora emeremo ighya ibhyakorya ibhyaye umwene.
Yusufu na mokaa Pötifa
Yusufu m-mohentani muuya yaarë,
yaatëghëryanga mo-maiso.
7 Hano sinsikö syaahëtirë-ho,
mokaa Pötifa akaighomba Yusufu,
akamötëëbhya igha,
“Nshö oraare na öni.”
8 Kasi Yusufu akaanga,
akatëëbhya omokari uyö igha,
“Otaighwa nkötëëbhi,
omonene uwaane,
yaangʼaana ubhwera kö-bhëntö bhyaye bhyonswe igho ka hano,
bhyonswe igho bheno aanabhyo,
yabhetoora mo-mabhoko aghaane.
9 Yeeka kono,
taaho omonene konkera,
na tiyankaania okokora kyokyonswe igho ka hano,
kutigha uwe umwene,
ko bhoora uwe m-mokaaye örë.
Iyakë ndaatore okokora amangʼana amaghogho ghayö,
nsarri Waryobha?”
10 Omokari uyö akabha arahooyera Yusufu kera rusikö,
okore aikërri araare nawe.
Kasi Yusufu tiyaikërëëyi okokora nawe amaigha,
handë okobha nawe haangʼë hë.
11 Urusikö öröndë,
Yusufu yaasöhirë mu-nyumba okokora emeremo ighyaye kya bhoora yaanarrë.
Enkaagha iyö,
tiyaare-ho ömököri uwa emeremo wowonswe igho mu-nyumba muyö.
12 Mokaa Pötifa akaghoota ingibho iya Yusufu,
akamötëëbhya igha,
“Bhoono ni-igha oraare na öni!”
Kasi Yusufu akakoromoka,
akatigha ingibho mo-mabhoko aghaaye,
akangʼosera kebhara.
13 Hano omokari uyö yaarööshë igha Yusufu atighirë ingibho iyaaye mo-mabhoko ghaaye,
angʼösirë ukughya kebhara,
14 akabherekera abhaköri abha emeremo abhandë,
akabhatëëbhya igha,
“Momaahe ömököri uwa emeremo uwa Ikiëbhuraania ono moghaaka uwaane yatoreetera ka hano,
nkötösöökya arë!
Asöhirë mwane aratuna igha araare na öni.
Kasi nkakuura ikuuratë.
15 Hano yaaighuurë ndakuura ikuuratë,
akakoromoka ukughya kebhara,
akatigha ingibho iyaaye mbareka yaane hayö.”
16 Mbe,
omokari uyö akabheeka ingibho iyö,
okohekera hano umushaasha uwaaye yaakyörrë ka.
17 Hano yaahikirë,
omokari akasimya ökömötëëbhya amangʼana ghayö igha,
“Ömököri uwa emeremo uwa Ikiëbhuraania ono waatoreetera ka hano,
atunirë okonkorra agha sënsöni!
18 Kasi hano naakurrë ikuuratë,
akatigha ingibho iyaaye mo-mabhoko ghaane,
akangʼosera kebhara!”
19 Hano Pötifa yaaighuurë amangʼana agha mokaaye,
igha ni-igho ömököri uwa emeremo uwaaye amökörëëyë,
Pötifa akarerra bhököngʼu.
20 Akaghoota Yusufu,
akamotoora mo-kebhohe,
mono abhabhohe abhandë abha omokama bhaarë,
Yusufu akabha mo-kebhohe muyö.
Yusufu mu-nyumba iya ekebhohe
21 Kasi YEHOBHA Waryobha akabha hamwë na Yusufu,
akamwimererra,
kora akamokora omonene uwa abhabhohe aikërri Yusufu.
22 Omonene uyö akakora Yusufu abhe umwimërërri uwa abhabhohe bhonswe igho.
Ëbhëntö bhyonswe igho bheno bhyaakorwanga muyö,
mbyaakorwanga ku ubhwera ubhwa Yusufu.
23 Omonene uwa abhabhohe,
we tiyakuniri ghwiki omoremo ghwoghwonswe igho ghono yaahaayë Yusufu,
ko bhoora YEHOBHA Waryobha n-hamwë yaarë na Yusufu,
akamötöörrya ko amangʼana ghaaye ghonswe igho.