Yuuda bhaana Tamaari
38
Enkaagha iyö,
Yuuda akatigha abhamura abhaabho,
akaghya ukwikara hamwë na ömöntö ömwë Umwaduraami,
ono yaabherekerwanga igha,
Hira.
2 Yuuda akamaaha-yo umwisëkë uwa Abhakaanaani,
akamoghegha abhe mokaaye,
akaraara nawe.
Suwaabho umwisëkë uyö,
yaabherekerwanga igha,
Shua.
3 Umwisëkë uyö,
akaimökya enda,
akeebhora omoona uwa ikishaasha,
Yuuda akamoroka igha Ëri.
4 Ghwiki akaimökya enda iyëndë,
akeebhora omoona uwöndë uwa ikishaasha,
akamoroka igha Onaani.
5 Ghwiki akeebhora omoona uwöndë uwa ikishaasha,
akamoroka igha Sheera.
Enkaagha iyö,
Yuuda yaarenga Kezibhu.
6 Hano enkaagha yaahikirë-ho,
Yuuda akatëtya Ëri omokari ono yaabherekerwanga igha,
Tamaari.
7 Kasi Ëri omotangi uwa Yuuda,
yaarë na eteemo engogho mbere iya YEHOBHA Waryobha,
ku bhuyö,
Waryobha akamwita.
8 Yuuda akatëëbhya Onaani igha,
“Oraaghere umwandö mokaa omonene uwaaho,
ko bhoora ni-igho ukutunwa okore.
Webhore,
wimërërri wamwënyu ikighiha.”
9 Kasi Onaani yaamanyirë igha,
abhaana bhano areebhore,
tebhaabhe abhaaye hë,
ku bhuyö hano yaaraayë na mokaa mura uwaabho,
akamarra kebhara,
okore atakeebhorra omonene uwaaye abhaana.
10 Engʼana eno Onaani yaakörrë,
ti-nshiiya yaarë ko-YEHOBHA Waryobha,
ku bhuyö,
Waryobha akamwita.
11 Yuuda akatëëbhya mokaamoona uwaaye Tamaari igha,
“Kyora oghende wikare wëënyu musinö igho,
okohekera hano Sheera uwaane arikiina ahere.”
Keno kyaaghërrë Yuuda akore igho,
n-ko bhoora yaakanyanga igha,
Sheera wonswe nakaakuurë kya bhoora abhanene abhaaye bhaakuurë.
Ku bhuyö Tamaari akakyora waabho ka ku-suwaabho.
12 Syaahëtirë sinsikö sinsharu,
mokaa Yuuda akakwa.
Hano Yuuda yaamarrë sinsikö isya uruku,
bhakeemoka ukughya Timuna na omosaani uwaaye Hira,
Umwaduraami.
Bhakaghya ko-bhantö bhano bhakokenga amashuurëërya agha amangʼöndi aghaaye.
13 Hano Tamaari yaaighuurë igha subhyara waabho nko-nshera arë araghya Timuna,
okokenga amashuurëërya agha amangʼöndi aghaaye,
14 akaruusya singibho isyaye isya ubhusinö,
akaikundikirya ikikundikiryö ku-bhusyö,
okore atakaamanyekana.
Akaikara mu-kihiita,
ahasë aha okosohera Enaimu,
haangʼë na enshera iya ukughya Timuna.
Yaakörrë igho,
ko bhoora yaarööshë igha,
Sheera yaahërrë,
kasi tiyaahaaywë abhe mushaasha waaye hë.
15 Hano Yuuda yaarööshë Tamaari aikundikiiyi singibho ku-bhusyö,
akakanya igha m-mokari moraaya.
16 Teyamanyirë igha,
m-mokaamoona uwaaye hë,
akaghya mbareka iya enshera haara Tamaari yaarë,
akamötëëbhya igha,
“Ndasabha wikërri ndaare na uwe.”
Tamaari akamöbhöörya igha,
“Hano ndaaikërri okoraara na uwe,
n-kë oraangʼaane?”
17 Yuuda akamohonshora igha,
“Nendaakohaane isubhëëni iya ëmböri ukurwa mwi-hisho iryane.”
Tamaari akamötëëbhya igha,
“Toora-ho ëkëntö ikya ukwörökya igha nondeetera isubhëëni iyö.”
18 Yuuda akamöbhöörya igha,
“N-këntö kë ukutuna nkohaane kebhe ekemanyërryö?”
Akamohonshora igha,
“Ngʼaana omosanga ughwaho ughwa umuhuri,
hamwë na inyimbo iyö öghöötërrëyë.”
Yuuda akamohaana ëbhëntö bhiyö,
akaraara nawe,
Tamaari akaimökya enda.
19 Tamaari akakyora waabho ka,
akaruusya ikikundikiryö keno yaarenga aikundikiiyi ku-bhusyö,
akaibhoha ghwiki singibho syaye isya ubhusinö.
20 Hano Yuuda yaatömirë mosaani waaye Hira Umwaduraami,
aherre omokari oora isubhëëni,
okore omokari uyö amukyörri ëbhëntö bheno Yuuda yaamötëghëëyë,
tiyaamunyöörrë-ho hë.
21 Akabhöörya abhamënyi abha Enaimu igha,
“Hai arëngë omokari omoraaya ono yaarë mbareka iya nshera hano?”
Bhakamohonshora igha “Hano omokari omoraaya,
taaho hë.”
22 Hira akakyora ku-Yuuda,
akamötëëbhya igha,
“Timunyöörrë-ho hë,
abhamënyi abha hayö,
bhantëëbhëri igha,
‘Hano omokari omoraaya taaho hë.’ ”
23 Yuuda akaghamba igha,
“Tigha agheghe ëbhëntö bhiyö,
totakaasha kösöökëëribhwa.
Oramaaha,
mmöhërëëyë isubhëëni,
kasi tumunyöörrë-ho hë.”
24 Hano ghyahëtirë-ho imyëri etatö,
Yuuda akatëëbhibhwa igha,
“Mokaamoona uwaaho Tamaari,
yabhaayë omoraaya,
yatarrë kebhara,
ne-nda arë!”
Yuuda akaghamba igha,
“Mumurishöki kebhara asambwe mo-morro akwe!”
25 Enkaagha eno bhaamurishökyanga kebhara,
Tamaari akatomana amangʼana ku-subhyara waabho igha,
“Mwene ëbhëntö bheno,
we yaangʼaana enda,
ndakosabha omanyërri mwene ikitwangʼa keno na akanuugha kaako na inyimbo eno.”
26 Yuuda akabhemanya,
ku bhuyö akaghamba igha,
“Tamaari m-mwihöötu konkera,
ko bhoora ntaamutwenera umwandö ko moona uwaane Sheera.”
Kerengera hayö,
Yuuda tiyaaraayë ghwiki na Tamaari.
27 Enkaagha iya ukwebhora ukwa Tamaari ekahika,
ekamanyekana igha,
ne-nda iya ebhesare aanayo.
28 Hano yaaitönianga,
omoona ömwë akarishökya okobhoko,
umwëbhörya akabhoha okobhoko kuyö urushë orokangaaru,
akaghamba igha,
“Ono we atangatirë ukwebhorwa.”
29 Kasi hano omoona uyö yaakyörri okobhoko mo-nda,
murikyaye akatangata akeebhorwa.
Umwëbhörya akaghamba igha,
“Ndarra uwe urishökirë kwa nguru?”
Ku bhuyö akarokwa igha Përëësi.a
30 Mbe,
mura uwaabho wonswe akeebhorwa aana urushë orokangaaru ko-kobhoko,
we akarokwa igha Zeera.b