Yusufu araroota ekerooto
37
Yaakobho akamenya mu-kyaro ikya Kaanaani,
ahasë hano suwaabho yaamënyirë kya ömöghëni.
2 Ghano ngo amangʼana agha urwebhoro urwa Yaakobho.
Yusufu hano yaarë umumura uwa imyoka ikömi na muhungatë,
yaaghyanga ökörëësya sëmböri na amangʼöndi,
hamwë na abhamura abhaabho,
abhaana abha Bhiriha na Ziripa bhakaa suwaabho.
Yusufu akabha aratëëbhya suwaabho amangʼana agha seteemo sengogho isya abhamura abhaabho.
3 Mbe,
Yaakobho ono yaabherekerwanga igha Isiraëri,
yaahanshirë Yusufu okokera abhaana abhaaye bhonswe igho,
ko bhoora yaamwibhööyë mo-bhoghaaka ubhwaye.
Akashonera Yusufu engansho inshiiya.
4 Bhamura bhaabho hano bhaarööshë igha suwaabho nahanshirë Yusufu kobhakera,
bhakaregha Yusufu,
kora tebhaashumaashanga nawe bhuuya hë.
5 Urusikö öröndë Yusufu akaroota,
akatëëbhya abhamura abhaabho.
Hano bhaaighuurë ekerooto kiyö,
bhakamoregha bhököngʼu.
6 Akabhatëëbhya igha,
“Motaighwa mbatëëbhi ekerooto keno ndöötirë.
7 Ndöötirë igha,
bhëëtö bhonswe igho,
twaarë kö-möghöndö torabhoha amaghanda.
Kamwë igho,
righanda iryane,
rekaghorroka rekaimerra bhöröngë,
amaghanda aghëënyu ghakaasha okonaarya righanda iryane na ukurihenyerra.”
8 Bhamura bhaabho bhakamöbhöörya igha,
“Bhoono nkutuna örë ötötëëbhi igha,
noraatotangate?
Handë nkokanya örë igha,
noraabhe na obhotoro okotokera?”
Ekerooto na amangʼana aghaaye ghayö,
ghakaghera bhamoreghe bhököngʼu.
9 Yusufu akaroota ghwiki ekerooto ikyëndë,
akatëëbhya bhamura bhaabho igha,
“Mwitegherre mbatëëbhi,
naarë ndöötirë ghwiki ekerooto ikyëndë.
Ndööshë iryobha,
umwëri na sinyota ikömi na ëmwë bheranyihenyerra.”
10 Hano yaatëëbhëri suwaabho wonswe ekerooto kiyö,
suwaabho akamokaania,
akamötëëbhya igha,
“Kiyö n-kerooto kë öröötirë?
Öni,
nyakuwëënyu na bhamura bhëënyu bhonswe igho ntoraashe tokotemere hansë ibhiru?”
11 Bhamura abhaaye bhayö,
bhakamomaahera rikenge,
kasi suwaabho akabha araitegherra engʼana iyö.
Yusufu araghöribhwa na abhamura abhaabho
12 Urusikö öröndë,
bhamura abhaabho Yusufu bhakaghya ökörëësya situgho isya suwaabho haangʼë na Shëkëëmu.
13 Mbe,
Yaakobho akatëëbhya Yusufu igha,
“Nomanyirë igha bhawamwënyu bhaaghya ökörëësya situgho Shëkëëmu.
Bhoono nkutuna ndë nkotome-yo.”
Yusufu akamohonshora igha,
“Uwe otantoma ngende.”
14 Suwaabho akamötëëbhya igha,
“Kaghi omaahe bhawamwënyu na situgho nyoore m-buuya bharë.
Hano okomara,
ondeetere amangʼana.”
Mbe,
Yaakobho akatoma Yusufu ukurwa mu-ribhate irya Hëbhurööni.
Yusufu hano yaahikirë haangʼë na Shëkëëmu,
15 ömöntö ömwë akamunyoora,
arataamataama mwi-sisi muyö.
Ömöntö uyö akamöbhöörya igha,
“N-kë ukutuna?”
16 Yusufu akamohonshora igha,
“M-bawamwëtö nkutuna.
Okaamanya hasë bhakörëësërya?”
17 Ömöntö uyö akamohonshora igha,
“Bhaaruurë hano,
naarë mbaighuurë bharaghamba igha,
‘Toghende Dotani.’”
Mbe,
Yusufu akarwa nyuma bhamura abhaabho akabhanyoora Dotani iyö.
18 Hano bhamura bhaabho bhaamörööshë akërëngë hare,
bhakakora inikö igha bhamwite.
19 Bhakatëëbhania igha,
“Momaahe nyabherooto n-goora araasha.
20 Bhoono ni-igha tumwite,
tomotabhute mu-bhwina.
Ntwakaghambe ko-taata igha,
arëëywë na ityënyi ëmbë iya mwi-sisi.
Ntomaaha ebherooto ibhyaye iyakë bheraabhe!”
21 Kasi hano Ruubhëëni yaaighuurë amangʼana ghayö,
akatuna atöörri Yusufu ukurwa mo-mabhoko aghaabho.
Akatëëbhya abhake abhaaye igha,
“Tetokaamwita hë.
22 Motakaasarya amabhoko ghëënyu,
kasi momorekere mu-rirooma reno irya kö-këköngö kora motakaamukunia.”
Yaaghambirë igho,
ku ukutuna enshera iya ökömötöörrya arwe mo-mabhoko aghaabho,
okore amukyöri ku-suwaabho.
23 Mbe,
hano Yusufu yaahikirë ko-bhamura abhaabho,
bhakamoghoota,
bhakamuruusya engansho iyaaye inshiiya iyö yaarenga atöörrë.
24 Hano bhaamarrë,
bhakamorekera mu-rirooma,
kasi rirooma riyö,
tiryaarë na amanshë hë.
25 Hano bhaaikaayë okorya ibhyakorya,
bhakaghörrökya amaiso,
bhakamaaha rikomo irya Abhaishimaëri bhaarwanga Ghireadi bharaghya Miisiri.
Sengamia isyabho syaaghëghirë ëkörösö,
ëzëri na semanemane.a
26 Yuuda akatëëbhya abhamura abhaabho igha,
“N-hoorohooro kë toraanyoore hano toraasari amabhoko ghëëtö ku ukwita omoke uwëëtö,
na ukubhisa amaanyinga aghaaye?
27 Nyakara tömöghöri ko Abhaishimaëri bhayö bhakuusha.
Totakaamwita,
ko bhoora,
ono no-moke uwëëtö na amaanyinga ghëëtö n-gamwë.”
Bhamura abhaabho bhakaikërrya.
28 Hano abhahöönia abha ibhyashara Abhaishimaërib bhayö bhaahikirë hayö,
bhamura abhaabho Yusufu bhakamurishökya ukurwa mu-rirooma,
bhakamöghörya öbhöghöri ubhwa amabhaara agha seehera emerongo ëbhërë.
Abhaishimaëri bhakaghya na Yusufu Miisiri.
29 Enkaagha iyö,
Ruubhëëni tiyaare-ho hë.
Hano yaakyörrë mu-rirooma haara,
akanyoora Yusufu taamo hë.
Akarandora singibho isyaye akabhaabhayera.
30 Akakyora ko-bhamura abhaabho,
akabhatëëbhya igha,
“Yusufu tarëngë mu-rirooma moora hë!
Bhoono öni hai ndaaghi?”
31 Mbe,
bhakaghoogha ëmböri,
bhakaghegha engansho iya Yusufu,
bhakaghishabhya mo-maanyinga agha ëmböri.
32 Hano bhaamarrë bhakaherra suwaabho engansho iyö,
bhakaghamba igha,
“Engansho eno,
bhëëtö ntöghëbhööshirë,
otaghitaaha bhuuya omaahe,
eratora ekabha ni-iya omoona uwaaho.”
33 Suwaabho akaghemanya,
akaghamba igha,
“Engansho eno,
ni-iya omoona uwaane!
Arëëywë na ityënyi ëmbë iya mwi-sisi.
Obhoheene,
Yusufu anyamuuriibhwi ebhetabhë!”
34 Yaakobho akarandora singibho isyaye ko okobhaabhayera,
akaibhoha singibho isya amaghonerac mo-bhokende,
akakoorra omoona uwaaye uyö sinsikö sinsharu.
35 Abhaana abhaaye bhonswe igho,
abha ikishaasha na abha ekekari,
bhakaghya ukumukirya,
kasi akaanga.
Akaghamba igha,
“Muntighe öni ngëndërri okokoorra omoona uwaane,
okohekera hano ndighya ikyaro ikya abhaku iyö arë.”
Ni-igho suwaabho yaamökörëëyë.
36 Enkaagha iyö,
abhahöönia bhaara bhakahika Miisiri,
bhakaghörya Yusufu ku-mwamë ömwë,
iriina iryaye Pötifa.
Pötifa uyö,
m-motangati omonene uwa abharëndi abha Faraod yaarë.