Simeoni na Raawi bharahaka ikisiiyomba ko okoghera iya mwisëkë uwaabho
34
Urusikö öröndë,
Diina umwisëkë uwa Yaakobho ono yaaibhööywë na Rea,
akaghya okokeerania abhaisëkë abha ku-kyaro ikya Kaanaani.
2 Omotangati uwa ikyaro kiyö,
yaabherekerwanga igha Hamööri,
Umuhivi.
Na mura uwaaye,
yaabherekerwanga igha Shëkëëmu.
Hano Shëkëëmu yaarööshë Diina kamwë igho,
akamoghoota,
akamobhamba.
3 Shëkëëmu akatëghëribhwa na umwisëkë uwa Yaakobho,
akamohansha bhököngʼu,
akasimya komohooyera aramosaasaama.
4 Mbe,
Shëkëëmu akaghya ukushumaasha na suwaabho,
akamötëëbhya igha,
“Taata,
ndakosabha,
öntëti umwisëkë ono.”
5 Yaakobho akanyoora amangʼana igha,
umwisëkë uwaaye Diina,
asariibhwi na Shëkëëmu nyantasaarwa.
Kasi ko bhoora abhamura abhaaye bhaarenga bhaghëëyë körëësya situgho isyaye,
akakira na amangʼana ghayö,
okohekera hano abhamura abhaaye bhaakyörrë ukurwa mö-kërëësyö.
6 Hamööri,
suwaabho Shëkëëmu,
akaghya ukushumaasha na Yaakobho.
7 Ko-nkaagha iyö,
abhaana abha Yaakobho okanyoora bhaaruurë körëësya.
Hano bhaaighuurë bhono Shëkëëmu yaakörëëyë mwisëkë uwaabho,
bhakaighwa öbhörrö bhököngʼu,
kora bhakarerra.
Ko bhoora engʼana iyö,
ko-Bhaisiraëri m-mughiro ghwaarë.
8 Kasi Hamööri akabhatëëbhya igha,
“Mumura uwaane Shëkëëmu,
nahanshirë umwisëkë uwëënyu bhököngʼu.
Ndabhasaasaama igha,
mumwikërërri amotete.
9 Mutighe tobhenga torateterana.
Totetenga abhaisëkë abhëënyu,
na bhëënyu bhonswe moraatetenga abhaisëkë abhëëtö.
10 Ikyaro keno nkeraabhe ikyënyu.
Momenye-mo morakora ibhyashara,
mwamehe.”
11 Hano yaamarrë,
Shëkëëmu akatëëbhya suwaabho Diina na abhamura abhaabho igha,
“Bhamurë!
Nkabhasaasaama,
motanyikërrya!
Kyokyonswe igho,
keno moraansabhe,
nendaaruusi.
12 Möntëëbhi ekerengere ikya öbhötëti,
mbekaabha ëbhëntö ibhyaru ekerengere kenga iyakë,
nendaaruusi.
Kasi ahoko,
ntete umwisëkë uwëënyu ono.”
13 Mbe,
bhamura abha Yaakobho bhakahonshora Shëkëëmu na Hamööri suwaabho ko okobhaibha ikiina,
ko bhoora Shëkëëmu asarri Diina,
mohara uwaabho.
Ku bhuyö bhakaghamba igha,
14 “Bhëëtö tetokokora igho hë.
Mwisëkë uwëëtö,
tëtömötëti kö-möntö ono atakosaarwa.
Engʼana iyö,
në-nsöni bhököngʼu kö-bhëëtö!
15 Ntwikererrania na bhëënyu ko engʼana ëmwë eno iyeene igho igha,
kera umushaasha mö-bhëënyu,
asaarwe kya bhëëtö.
16 Hayö ho moraatetenga abhaisëkë abhëëtö,
na bhëëtö bhonswe ntoraatetenga abhaisëkë abhëënyu.
Ntoraamenyane hamwë,
tobhe abhamwë.
17 Kasi hano motaikërri okosaarwa,
ntoraagheghe mwisëkë uwëëtö,
tughi nawe ka.”
18 Hano Hamööri na mura uwaaye Shëkëëmu bhaaighuurë amangʼana ghayö,
ghakabhashomera.
19 Umumura uyö Shëkëëmu,
yaasookwanga bhököngʼu waabho ka.
Ho yaangöhërrëëyi okokora bhuyö bhaatëëbhiibhwi,
ko bhono yaahanshirë bhököngʼu mwisëkë uwa Yaakobho.
20 Mbe,
Hamööri bhaana mumura uwaaye Shëkëëmu uyö,
bhakaghya mu-kihiita ikya mu-mughi ghuyö,
ahasë hano abhantö bhakorranga-ho ibhiikaro.
Bhakashumaasha na bharikyabho igha,
21 “Abhantö bhayö,
m-basaani abhëëtö.
Tobhaikërri,
tobhatighe bhakore ibhyashara mono.
Ikyaro ikyëtö keno,
n-këgharë,
nkeraatwise tomenye bhonswe igho hamwë,
hayö ho toraanyoore umweya ughwa okoteta abhaisëkë abhaabho.
Nabho bhonswe bhaatetenga abhaisëkë abhëëtö.
22 Kasi abheene mbaraaikërri ukwikarana na bhëëtö,
na okobha na öbhömwë na bhëëtö,
hano bhëëtö toraaikërri engʼana ëmwë eno iyeene igho igha,
kera umushaasha asaarwe kya bhono abheene bhakosaarwa.
23 Temokomaaha igha,
situgho isyabho na ëbhëntö ibhyabho bhyonswe igho,
mberaabhe ibhyëtö?
Mbe,
twikererrani nabho igha,
bhamenye hamwë hano na bhëëtö.”
24 Abhashaasha bhonswe igho bhano bhaarenga bhaikomaini mu-kihiita hayö,
bhakaikererrania na Hamööri na Shëkëëmu.
Mbe,
bhakasaarwa bhonswe igho.
25 Hano syaahëtirë-ho sinsikö isatö,
abhashaasha abhasamba bhayö bhakeena ebheraso,
abhamura bhabhërë abha Yaakobho,
Simeoni na Raawi,
bhawamwabho Diina,
bhakamanora ibhyöghë,
bhakaghya bhakabhasha abhantö abha umughi ghuyö,
bhataraaisëëmya ku-riihë.
Bhakaita-mo abhashaasha bhonswe igho.
26 Hamööri bhaana mura uwaaye Shëkëëmu bhakabhaita na imishonge.
Mbe,
bhakaghegha Diina ukurwa mu-nyumba iya Shëkëëmu,
bhakaghya nawe ka.
27 Bhamura abha Yaakobho abhandë bhaara,
bhakaghya ko-bhayö bhaaitirwë,
bhakanaarya umughi ghuyö,
bhakasensa-mo ëbhëntö,
ko bhoora mwisëkë uwaabho yaarenga asariibhwi-mo.
28 Bhakaghegha amangʼöndi,
sëmböri,
sengʼombe,
sitikërë,
na kera ëkëntö keno kyaarenga mu-mughi muyö.
Bhakasensa kora bheno bhyaarë kö-mëghöndö bhyonswe igho.
29 Bhakasensa ubhwamë ubhwa abhantö bhayö bhwonswe igho.
Bhakaghegha abhaana na abhakari bhonswe igho,
na kera ëkëntö keno kyaarë mu-sinyumba isya abhantö bhayö.
30 Mbe,
Yaakobho hano yaarööshë ghayö,
akatëëbhya Simeoni na Raawi igha,
“Mönkörërrëëyë!
Bhoono Abhakaanaani bhaana Abhapërizi na abhantö bhonswe igho,
mbaraandererre.
Na öni,
teneena abhantö abhaaru hë,
hano bharaaikomani hamwë,
ukunyitania,
nendaasike hamwë na abhantö abhaane bhonswe igho!”
31 Kasi Simeoni na Raawi,
bhakahonshora suwaabho igha,
“We n-kwakë yaakörëëyë mwisëkë uwëëtö kya omoraaya?”