Yaakobho arasikana na Esaau
33
Mbe,
hano akabhagha kaahëtirë,
Yaakobho akarekera amaiso,
akamaaha Esaau araasha na abhantö amaghana ane.
Hano yaabharööshë igho,
akatwena abhaana abhaaye ko Rea na Raahëëri na ko abhaghorwa abhaabho abha ekekari bhaara,
Ziripa na Bhiriha.
2 Akatangatya abhaghorwa na abhaana abhaabho bhayö,
bhakaroobhera-ko Rea na abhaana abhaaye.
Nyuma iya bhayö bhakaroobhera-ko Raahëëri na omoona uwaaye Yusufu.
3 Mbe,
Yaakobho umwene akatangata aghi asikane na mura uwaabho.
Hano yaahikirë haangʼë,
akatema hansë ibhiru hare muhungatë ko okomosooka.
4 Kasi Esaau akaiha ikibhuusë,
ukughya ukuturungʼana Yaakobho,
akamwibhaara mwi-ghöti,
bhonswe igho bhabhërë bhakasimya kukuura.
5 Esaau akaghörrökya amaiso,
akamaaha abhakari na abhaana,
akabhöörya Yaakobho igha,
“Bhano bho m-baabho wë moonabho?”
Yaakobho akamohonshora igha,
“Bhano na-bhaana bhano Waryobha yaangʼaana,
öni ömököri uwa emeremo uwaaho,
ko obhongʼoore ubhwaye.”
6 Ho,
abhaköri abha emeremo abha ekekari bhayö,
hamwë na abhaana abhaabho bhaasuntarëëyë Esaau,
bhakaihiinya ko okomosooka.
7 Ho Rea na abhaana abhaaye,
bhonswe igho bhakasuntara,
bhakaihiinya ko okomosooka.
Ko komarërrya,
Raahëëri na omoona uwaaye Yusufu,
bhonswe bhakaasha,
bhakaihiinya ko okomosooka.
8 Mbe,
Esaau akabhöörya igha,
“Amahisho ghano nsikaini nagho ko-nshera ensonga iyaako në-ëëhë?”
Yaakobho akamohonshora igha,
“Ensonga iya ghayö örööshë,
no-morembe nkutuna ku-uwe,
omonene uwaane.”
9 Kasi Esaau akaghamba igha,
“Öni ëbhëntö m-byaru neenabhyo wamwëtö.
Ëbhëntö bheno onabhyo bhebhe ibhyaho umwene.”
10 Yaakobho akamötëëbhya ghwiki igha,
“Oraanyoore m-maheene igha unyikërrëëyi,
ndakosabha ogheghe ituho eno.
Obhoheene okomaaha ubhusyö ubhwaho,
n-kya okomaaha ubhusyö ubhwa Waryobha,
ko bhoora unturungʼaini ushömëëywë bhököngʼu.
11 Ndakosabha wikërri ituho eno nkörëëtëëyë,
ko bhoora kora öni wonswe Waryobha yaantöörrya,
neena ëbhëntö bhyonswe igho bheno nkutuna.”
Ni-igho Yaakobho yaangʼöröngʼööbhëri Esaau,
akakamba akaghegha ituho iyö.
12 Hano Esaau yaamarrë,
akaghamba igha,
“Bhoono töghëndërri na oroghendo urwëtö,
öni nendaakotangate enshera.”
13 Kasi Yaakobho akamötëëbhya igha,
“Omonene uwaane,
uwe tamaaha igha neena abhaana abhake,
na situgho seno nköghönkya sërë,
na öni nkutuna ndë nsebhohe,
ko bhoora hano oraaseheekani oroghendo urwa urusikö örömwë urwene igho,
nseraakwe syonswe igho.
14 Ndakosaasaama igha,
uwe omonene uwaane tangata ughi,
öni nendaashe ngʼorangʼora na amahisho agha situgho seno,
na abhaana,
okohekera hano ndaashe hike bhuuya mu-kyaro ikya Sëiri.”
15 Esaau wonswe akaghamba igha,
“Nyakara nkoteghere abhantö abhaane abhandë.”
Kasi Yaakobho akamöbhöörya igha,
“N-kwakë ukutuna okore igho?
Ko bhoora keno nkutuna nu-kunyoora omorembe ku-uwe omonene uwaane,
ghuyö ngunyisirë.”
16 Mbe,
urusikö ruyöruyö omobhasö,
Esaau akakyora Sëiri.
17 Kasi Yaakobho na abhantö abhaaye,
bhakaghya igho bhakahika ahasë nyabhorebhe.
Hano yaarë ahasë hayö,
akahaghaasha-ho inyumba na ibhighutu ibhya situgho isyaye,
ku bhuyö ahasë hayö hakabherekerwa igha Suköti.a
Yaakobho aramenya haangʼë na Shëkëëmu
18 Hano Yaakobho yaamarrë okongʼosa Raabhaani,
ukurwa Padani-aramu,
akahika bhuuya mu-mughi ughwa Shëkëëmu ughwa mu-kyaro ikya Kaanaani,
na akatoora ëkëröghö ikyaye haangʼë na umughi ghuyö.
19 Akaghora ahasë aha okomenya,
ko-bhantö abha Hamööri,
suwaabho Shëkëëmu,
ko amabhaara righana imwë irya seehera,
akatoora-ho righutu iryaye.
20 Akahaghaasha-ho riighyö irya amaghena,
akarebherekera igha Ëri-ëröhë Isiraëri.b