Yaakobho arangʼosa ukurwa wa Raabhaani
31
Yaakobho yaaighuurë amangʼana igha,
bhamura abha Raabhaani bharaibhëmbëërya igha,
“Yaakobho yaaghëghirë ëbhëntö ibhya taata bhyonswe igho.
Ëbhëntö bhiyö,
mbyo bhyamwamëhëri igho.”
2 Yaakobho akamaaha igha,
Raabhaani tamohanshirë kya bhono yaamohanshirë kare haara.
3 Mbe,
YEHOBHA Waryobha akatëëbhya Yaakobho igha,
“Kyora mu-kyaro ikya abhakörö bhaaho,
ko-bhawamwënyu,
na öni nendaabhe hamwë na uwe.”
4 Mbe,
Yaakobho akatomana amangʼana ko-bhakaaye,
Raahëëri na Rea igha bhasikanere mö-kërësyö,
mwi-sisi eera yaarenga na situgho isyaye.
5 Hano bhaahikirë,
akabhatëëbhya igha,
“Öni ndamaaha igha,
suwëënyu tanhanshirë kya bhono yaanhanshirë kare haara.
Kasi Waryobha uwa taata,
abhaayë hamwë na öni.
6 Mmomanyirë igha,
naatighinkanera suwëënyu ku singuru isyane syonswe igho.
7 Kasi yaanngʼaina hare ikömia konswe igho,
arasyöryasyörya ehoorohooro iyaane.
Waryobha we yaarebherra suwëënyu atakaannyahaara.
8 “Hano suwëënyu yaantëëbhëri igha,
‘Situgho seno sereebhorwe seena amasharabhushë,
nsyo seraabhe ehoorohooro iyaaho,’
mbe,
situgho syonswe igho,
sekeebhora isya amasharabhushë.
Na hano yaantëëbhëri igha,
‘Bhoono situgho isya amangʼoore syonswe igho,
nsyo seraabhe ehoorohooro iyaaho,’
situgho syonswe igho sekeebhora isya amangʼoore.
9 Ni-igho Waryobha yaaghëghirë situgho isya suwëënyu,
akangʼaana.
10 “Hano yaahikirë-ho enkaagha iya situgho ukwahoka,
nkaroota.
Nkamaaha mo-kerooto muyö igha,
amaghorohe ghonswe igho ghano ghakobhorrokera senkari,
ngaarë na amangʼoore,
amasharabhushë,
na amahara.
11 Maraika uwa Waryobha akashumaasha na öni mo-kerooto kiyö,
akamberekera igha,
‘Yaakobho!’
Nkaitabha igha,
‘Hano ndë!’
12 “Akantëëbhya igha,
‘Maaha amaghorohe ghonswe igho,
agha amangʼoore,
amahara,
hamwë na amasharabhushë,
nkobhorrokera gharë senkari.
Ebhaayë igho ko bhono ndööshë kya bhono Raabhaani akökörëëyë.
13 Nö-öni Waryobha ono naaköbhööshökëëyë Bhëëtëëri,
ahasë haara waaimërëëyi-ho reghena,
okarehomerra amaghuta,
na kora okaihiimirrya-ho.
b Bhoono,
karwe mu-kyaro keno,
ukyore mu-kyaro keno wëëbhörëëywë-mo.’ ”
14 Mbe,
Raahëëri na Rea bhakahonshora Yaakobho igha,
“Bhëëtö ntoraahinane na uwe,
ko bhoora tekeeho ëkëntö keno toraare umwandö wa taata.
15 We nkotomaaha arë kya abhaghëni,
ko bhoora yaamara ökötöghörya.
Ëbhëntö bheno twaamohaana,
yaaraaghera bhyonswe igho yaamara.
16 Ubhwamë bhonswe igho,
bhono Waryobha yaaruusya taata,
m-maheene bhoono nu-bhwëtö na abhaana abhëëtö.
Mbe,
uwe kora bhuyö Waryobha akötëëbhëri.”
17 Mbe,
Yaakobho akasëëmya oroghendo,
akariinia bhakaaye na abhaana abhaaye ko-sengamia.
18 Akatema situgho isyaye syonswe igho.
Akaghegha ëbhëntö ibhyaye bhyonswe igho bheno yaanyöörrë Padani-aramu.
Akasimya oroghendo urwa ukukyora mu-kyaro ikya Kaanaani,
ku-Isaaka,
suwaabho.
19 Enkaagha iyö,
Raabhaani yaarenga aghëëyë okokenga amabhuri agha amangʼöndi ghaaye,
ho Raahëëri yaanyöörëëyë-ho umweya,
akaibha ëbhëtöndö ibhya amasambwa agha suwaabho.
20 Yaakobho yaararërrëëyi Raabhaani uwa Araamu,
ko bhoora yaatanööyë igho atamoraghirë.
21 Mbe,
Yaakobho akamanora ëbhëntö ibhyaye bhyonswe igho,
akangʼosa.
Akaamboka omooro ughwa Eufurati,
akabhata orobhareka urwa singuku isya Ghireadi.
Raabhaani araröndya Yaakobho
22 Hano syaahëtirë-ho sinsikö isatö,
Raabhaani akatëëbhibhwa igha,
Yaakobho yaangʼösirë.
23 Ho Raabhaani yaakomaini bhawamwabho,
bhakaghya ököröndya Yaakobho.
Hano sinsikö muhungatë syaahööyë,
bhakamunyoora mu-singuku isya Ghireadi.
24 Kasi ubhutikö,
Waryobha akabhooshokera Raabhaani uwa Araamu mo-kerooto,
akamötëëbhya igha,
“Uriihe,
otakaatëëbhya Yaakobho engʼana yoyonswe igho,
nekaabha engogho handë inshiiya!”
25 Mbe,
Raabhaani akanyoora Yaakobho arëngë mu-singuku isya Ghireadi,
atöörrë-ho amaghutu ghaaye.
Raabhaani wonswe hamwë na abhamura abhaabho bhonswe igho,
bhakatoora hayö amaghutu ghaabho.
26 Ho Raabhaani yaabhöörri Yaakobho igha,
“Ne-ngʼana kë eno önkörëëyë?
Ndarra önkörrë ikighinga,
öghëghirë bhaisëkë abhaane,
kya bhano bharöönirwë mu-riihë!
27 N-kwakë waanngʼösirë kwa ukunyibhisa?
Okankora ikighinga.
Hano okaantëëbhëri,
nenkaakökörëëyë inyangi,
ebhetomwa bheghambe na amatungu kwa amarëëtyö toraraghana eno tushömëëywë.
28 N-kwakë otaatighirë ndaghane na nibhaare bhaisëkë abhaane na abhöshökörö abhaane?
Bhuyö nu-busheema.
29 “Neena obhotoro ubhwa okokokora bhoghogho,
kasi,
ubhutikö ubhwa okobhookera reero,
Waryobha uwa suwëënyu Isaaka,
antëëbhëri igha,
‘Uriihe,
otakaatëëbhya Yaakobho engʼana yoyonswe igho,
nekaabha engogho handë inshiiya!’
30 Nemanyirë igha,
amaigha agha abhaibhöri bhaaho,
ghakörëëyë bhököngʼu.
Bhoono,
n-kwakë wibhirë ëbhëtöndö ibhya amasambwa aghaane?”
31 Yaakobho akahonshora Raabhaani igha,
“Naangʼösirë ko bhoora noobhohanga ndaitegherra igha,
nokaanduusiri abhaisëkë abhaaho kwa nguru.
32 Kasi,
hano oraanyoore ömöntö ono aana ëbhëtöndö ibhya amasambwa aghaaho ghayö,
ömöntö uyö,
aitwe hanohano!
Uwe hungura mu-mirigho gheno mbere iya bhawamwëtö hano omaahe-mo.
Hano oraanyoore-mo ëkëntö ikyaho kyokyonswe igho,
ogheghe.”
Enkaagha iyö Yaakobho tiyaamanyirë igha,
Raahëëri aghaibhirë.
33 Ho,
Raabhaani yaahungurrë mo-maghutu agha Yaakobho,
na Rea,
na mo-agha abhaghorwa abha ekekari abhabhërë bhaara,
kasi tiyaabhinyöörrë hë.
Akamarërrya ko okosoha mu-righutu irya Raahëëri.
34 Raahëëri,
we yaarenga aghëghirë ëbhëtöndö bhiyö,
akabhibhisa hansë aha amatandeko agha engamia,
akabhiikarra.
Raabhaani akabhituna mu-righutu ryonswe igho,
tiyaabhinyöörrë hë.
35 Raahëëri akatëëbhya suwaabho igha,
“Taata unyabhere,
otakaarerra,
öni tentore ukwemerra mbere iyaaho hë,
ko bhoora mu-sinsikö isyane ndë.”
Raabhaani akahungura aratuna amasambwa aghaaye ghayö igho,
kasi tiyaaghanyöörrë hë.
36 Mbe,
Yaakobho akarerra,
akabhöörya Raabhaani igha,
“N-kë nsarri okohekera orangwema igho?”
37 N-këntö kë ikyaho keno bhoono unyöörrë,
mu-mirigho ighyane muyö,
keno këghërrë uhungurrë imirigho ighyane ghyonswe igho?
Kyöröki mbere ya abhantö abhaane,
na bhawamwënyu bhonswe igho,
okore bhatwahokani öni na uwe!
38 “Naaikara hamwë na uwe imyoka emerongo ëbhërë.
Na ribhagha riyö ryonswe igho,
teeho ëmböri iyaaho handë ringʼöndi iryaho reno ryarekera hë,
tenakaghööghirë kora ikighuruki ikya ringʼöndi ukurwa mwi-hisho iryaho hë.
39 Tenakakörëëtëëyë itugho iyaaho eno ërëëywë na ityënyi iya mwi-sisi hë,
kasi nö-öni umwene naakwimërrëryanga-ho iyëndë!
Ghwiki kora eno yaaibhwanga mbokaabha ubhutikö handë omobhasö,
waantëëbhyanga nkohaka.
40 “Naatonyanga ëbhëghëri omobhasö,
na ubhutikö naanyahaarekanga na embeho,
kora mborwa seetero.
41 Naamenya waaho imyoka emerongo ëbhërë ghyonswe igho,
kwa inyanko.
Naakutighinkanera imyoka ikömi na ene,
ko okoteta abhaisëkë abhaaho bhabhërë.
Imyoka ighyëndë esansabha,
nkakörëësërya situgho isyaho,
kasi ehoorohooro iyaane,
okabha oraghisyöryasyörya igho,
okohekera hare ikömi.
42 Waryobha uwa ghuuka Ibhurahimu,
Waryobha ono yaasöökirwë na taata Isaaka,
singa ataabha orobhareka urwane,
obhoheene,
nokaantighirë ntanore amabhoko masa igho.
Kasi Waryobha yaamaaha inyanko iyaane na emeremo gheno naakora na mabhoko aghaane.
Nkyo këghërrë Waryobha akokaanëri ubhutikö ubhwa reero.”
43 Raabhaani akamohonshora igha,
“Bhano,
m-baisëkë abhaane,
abhaana bhano,
m-böshökörö abhaane,
amahisho agha situgho ghano,
na-ghaane,
na ëbhëntö bhyonswe igho bheno okomaaha hano,
ni-bhyane.
Kasi bhoono,
eeho ngʼana eno ndaakore ko abhaisëkë abhaane na abhaana abhaabho?
44 Bhoono ndamaaha igha,
tunyeerane imuuma,
okore ebhe ekemanyërryö ikya öni na uwe.”
45 Mbe,
Yaakobho akaghegha reghena,
akariimërrya kya umutimö,
okore rebhe ekemanyërryö ikya okobhahiitökya.
46 Akatëëbhya abhawaabho igha,
“Mokome amaghena.”
Bhonswe bhakakomania ituumo iya amaghena.
Hano bhaamarrë,
bhakarya ibhyakorya haangʼë na ituumo iyö iya amaghena.
47 Raabhaani akabherekera ahasë hayö igha,
Yeghari-sahaduta.
c Kasi Yaakobho we akahabherekera igha,
Gharëdi.d
48 Raabhaani akatëëbhya Yaakobho igha,
“Ituumo iya amaghena eno,
reero ebhaayë ekemanyërryö ku-öni na uwe.”
Ahasë hayö nkyo kyaaghërrë bhakahabherekera igha Gharëdi.
49 Umutimö ghuyö ughwa reghena riyö bhaaimërrëyi hayö,
akaghobherekera igha,
Mizipa,
e ko bhoora yaaghambirë igha,
“Kora enkaagha eno urinyoora totaahamwë,
kasi YEHOBHA Waryobha,
atwangararrenga.
50 Hano oraakore bhoghogho abhaisëkë abhaane,
handë otete abhakari abhandë,
omanye igha taaho umwimërërri uwöndë hë.
Kasi Waryobha we atomanyirë öni na uwe.”
51 Raabhaani akatëëbhya Yaakobho ghwiki igha,
“Maaha ituumo iya amaghena eno,
na umutimö ghono nimërëëyi ghatë iyaane na uwe.
52 Ituumo iya amaghena na umutimö ghono,
mbyo ebhemanyërryö igha,
öni tentamboke ituumo eno niishe kukunyahaara,
na uwe wonswe,
totaamboke ituumo na umutimö ghono,
ukuusha orobhareka urwane ukunnyahaara.
53 Waryobha uwa Ibhurahimu,
Waryobha uwa Naahöri,
Waryobha uwa bhaataata,
atohete ghatë!”
Ku bhuyö Yaakobho akatyana ku iriina irya Waryobha,
ono yaasöökirwë na Isaaka suwaabho.
54 Ho yaamarrë Yaakobho akarishökya ikimwenso,
ku-nguku hayö,
akaraareka abha waaye bhaashe okorya ibhyakorya hamwë.
Hano bhaamarrë okorya,
bhakaraara hayö.
55 Nyinkyo shiri,
Raabhaani akabhooka,
akaghya kö abhaisëkë na abhöshökörö abhaaye,
akabhaibhaara,
akabhangʼoora,
akabharagha,
akahonshoka ka.