Okosemoka 29

Yaakobho arahika wa Raabhaani

Mbe, Yaakobho akaghëndërrya na oroghendo, akahika mu-kyaro ikya abhantö abha röghörö. 2 Hano yaahikirë iyö, akamaaha ikisima mwi-sisi, na amahisho atatö agha amangʼöndi gharaayë haangʼë nakyo. Amangʼöndi ghayö, ghaaghanyanga ukunywënsibhwa amanshë agha mu-kisima kiyö kyaarenga kikundikiriibhwi oghoghena. 3 N-teemo yaarë igha, kera urusikö hano amahisho ghonswe igho agha amangʼöndi ghaaikomanga hayö, ho bhoono abharëësya bhaahingiranga reghena riyö, bhakondokora ikisima kiyö, okore bhanywënsi amangʼöndi. Hano bhaamaranga ukunywënsya, bhakundikirya ghwiki reghena riyö ku-kisima.

4 Mbe, Yaakobho akabhöörya abharëësya abha amangʼöndi bhayö igha, “Bhahiiri abhaane, hai muruurë?” Nabho bhakahonshora igha, “Turuurë Haraani.” 5 Akabhabhöörya ghwiki igha, “Mokaamanya ömöntö ono akobherekerwa igha Raabhaani möshökörö uwa Naahöri?” Bhakamohonshora igha, “Ntomomanyirë.” 6 Akaghëndërrya ököbhöörërrya igha, “M-möhöru?” Bhakamötëëbhya igha “M-möhöru, maaha Raahëëri mwisëkë uwaaye n-goora araasha na amangʼöndi.” 7 Yaakobho akabhatëëbhya igha, “Ndamaaha omobhasö m-mörörö ghökërë, na enkaagha iya okokoma amangʼöndi teraahika hë, ku bhuyö bhëënyu munywënsi, moghende körëësya.” 8 Abharëësya bhayö, bhakamötëëbhya igha, “Tetootore ukunywënsya hë. Hano amakomo gharaaikomani hamwë ghonswe igho, reghena rihingirwe ukurwa ku-kisima, hayö ho bhoono toraatore ukunywënsya amangʼöndi.”

9 Yaakobho hano yaarenga akishumaasha na abharëësya abha amangʼöndi bhayö, Raahëëri akahika na amangʼöndi agha suwaabho, ko bhoora we yaarëësyanga. 10 Hano Yaakobho yaarööshë mubhyara uwaaye Raahëëri, mwisëkë wa Raabhaani, araasha na amangʼöndi agha Raabhaani, akaghya këmwë ku-kisima. Mbe, akahingira reghena reera, akanywënsya situgho isya maamë uwaabho siyö. 11 Hano yaamarrë, akaibhaara Raahëëri na eno arakuura bhököngʼu ku ukushomerwa. 12 Yaakobho akamötëëbhya igha, “Öni m-muhiiri uwa suwëënyu ndë, omoona uwa Rebheka!” Ho yaamarrë, Raahëëri akakenya ukughya ka, akatëëbhya suwaabho amangʼana agha Yaakobho.

13 Mbe, Raabhaani hano yaaighuurë amangʼana agha mwehwa uwaaye Yaakobho, omoona uwa mohara waabho, akaiha ikibhuusë ukughya kumuturungʼana. Hano yaamöhëkërrëëyë, akamwibhaara, akamösërëënia ukughya waaye ka. Yaakobho akahaana Raabhaani, amangʼana ghonswe igho, bhono ghabhaayë. 14 Raabhaani akamötëëbhya igha, “M-boheene igha uwe, m-mwehwa uwaane örë, na amaanyinga aghëëtö n-gamwë!” Yaakobho akaikara wa Raabhaani umwëri öghömwë.

Yaakobho arateta Rea na Raahëëri

15 Urusikö nyabhorebhe, Raabhaani akatëëbhya Yaakobho igha, “Uwe m-muhiiri uwaane örë. Kasi, ti-bhuuya igha onkorre emeremo bhosa igho hë. Bhoono ntëëbhya, n-kerengere kë ukutuna nkohakenga?”

16 Raabhaani yaarë na abhaisëkë bhabhërë, ömöntö mökörö yaabherekerwanga igha Rea, na omoke igha Raahëëri. 17 Rea, yaarë na amaiso agha ikuughë, kasi Raahëëri m-muuya yaarë, kora yaatëghëryanga. 18 Yaakobho yaahanshirë Raahëëri, ku bhuyö akatëëbhya Raabhaani igha, “Nendaakokorre emeremo ku imyoka muhungatë, okore ntete Raahëëri, umwisëkë uwaaho omoke.” 19 Raabhaani akamötëëbhya igha, “Nyakara nkohaane uwe otete, ntakaahaana ömöntö uwöndë igho. Uwe ikara waane hano.” 20 Ku bhuyö, Yaakobho akakorra Raabhaani emeremo ku-ribhagha irya imyoka muhungatë, okore atete Raahëëri. Kasi Yaakobho yaarööshë igha, imyoka muhungatë ghiyö, ni-nsikö nke igho, ko bhoora yaahanshirë Raahëëri bhököngʼu.

21 Hano Yaakobho yaamarrë, akatëëbhya Raabhaani igha, “Imyoka ighyane ighya okokorra emeremo, ghyahööyë. Ku bhuyö bhoono, ngʼaana mokaane ngabhore.” 22 Mbe, Raabhaani akaraareka abhantö bhonswe igho abha hayö, akakora inyangi. 23 Kasi hano omoghoroobha ghwaahikirë, Raabhaani akaghegha Rea, umwisëkë uwaaye ömöntö mökörö, akahaana Yaakobho. Yaakobho akamoghabhora. 24 Okanyoora Raabhaani ahaayë mwisëkë uwaaye Rea omoghorwa uwa ekekari, ono yaabherekerwanga igha Ziripa.

25 Hano bhwaakëëyë, Yaakobho akaitakya akaroghoora, hano yaangʼurrë igha, yaahaaywë Rea! Akaghya akabhöörya Raabhaani igha, “Ne-ngʼana kë eno önkörëëyë? Naakökörëëyë emeremo, okore ntete Raahëëri, bhoono ndarra onngʼainirë?” 26 Raabhaani akamohonshora igha, “Wëëtö eno, tetoona eteemo iya okoteterwa umwisëkë omoke, ömöntö mökörö uwaaye ataraatetwa. 27 Bhoono, mara iwiiki eno, iya inyangi iya ubhwenga ubhwa Rea, nendaakohaane Raahëëri. Kasi noraankorre ghwiki emeremo, imyoka muhungatë ighyëndë.”

28 Mbe, Yaakobho akaikërrya, sinsikö muhungatë isya inyangi iya ubhwenga ubhwa Rea hano syaahööyë, Raabhaani akamohaana Raahëëri wonswe abhe mokaaye. 29 Okanyoora Raabhaani ahaayë Raahëëri wonswe, omoghorwa uwa ekekari ono akobherekerwa igha Bhiriha. 30 Mbe, Yaakobho akaghabhora Raahëëri, wonswe akabha mokaaye. Yaakobho yaahanshirë Raahëëri okokera Rea. Mbe, Yaakobho akakorra ghwiki Raabhaani emeremo, imyoka muhungatë ighyëndë, ko okoghera iya Raahëëri.

Abhaana abha Yaakobho

31 YEHOBHA Waryobha hano yaarööshë igha, Rea tahanshirwë hë, akamötöörrya, akanyoora abhaana. Kasi Raahëëri we, akaghombaha. 32 Rea akëëmökya enda, akeebhora omoona uwa ikishaasha, akamoroka igha, Ruubhëëni. Akaghamba igha, “YEHOBHA Waryobha arööshë inyaanyi iyaane, bhoono mushaasha uwaane, naraanhanshe.”

33 Ghwiki Rea akëëmökya enda iyëndë, akeebhora omoona uwa ikishaasha, akaghamba igha, “YEHOBHA Waryobha angʼaayë ghwiki omoona uwöndë uwa ikishaasha, ko bhoora aighuurë igha, tehanshirwë hë.” Ku bhuyö, akamoroka Simeoni.

34 Ghwiki akëëmökya enda, akeebhora ghwiki omoona uwöndë uwa ikishaasha, akaghamba igha, “Bhoono nendaabhe intingʼana ku-mushaasha uwaane, ko bhoora muhikiiyi abhamura abhatatö.” Ku bhuyö, akamoroka igha Raawi.

35 Ghwiki akëëmökya enda, akeebhora ghwiki omoona uwöndë uwa ikishaasha, akaghamba igha, “Bhoono, nkukumya ndë YEHOBHA Waryobha.” Ku bhuyö, akamoroka igha Yuuda. Ekahekera-ho enkaagha, akabhotokera ukwebhora.