Okosemoka 27

Isaaka arangʼoora Yaakobho

Hano Isaaka yaaghötirë, amaiso aghaaye ngaamwamirë, akabherekera Esaau omoona uwaaye omotangi igha, “Omoona uwaane.” Wonswe akaitabha igha, “Hano ndë taata.” 2 Isaaka akamötëëbhya igha, “Bhoono maaha igha, öni naaghötirë bhököngʼu, kora amakëëyë aghaane, teghamanyëëywë hë. 3 Bhoono, ndakosabha igha, ghegha ibhyöghë ibhyaho, isyëki na obhota ubhwaho, oghende mwi-sisi, ughweme. 4 Hano oraamare önsëëmëri ibhyakorya ibhiiya bheno nhanshirë, ondeetere ndaaghere, okore nkongʼoore ntaraakwa.”

5 Enkaagha iyö Isaaka yaashumaashanga na omoona uwaaye Esaau, Rebheka yaaitegherranga. Mbe, Esaau hano yaaimökirë ukughya mwi-sisi ukughwema areete ikinyeero, 6 Rebheka akatëëbhya omoona uwaaye Yaakobho igha, “Nighuurë suwëënyu aratëëbhya Esaau igha, 7 ‘Kaghi ughweme, onkorre ibhyakorya ibhiiya bheno nhanshirë, ondeetere ndaaghere, okore nkongʼoore mbere iya YEHOBHA Waryobha, ntaraakwa.’ 8 Mbe, bhoono moona uwaane, unyitegherre engʼana eno ndaakötëëbhi, oghekore. 9 Kaghi mwi-hisho irya sëmböri, ondeetere sëmböri ibhërë sinyananke sinshiiya, okore nkorre suwëënyu ibhyakorya bheno ahanshirë. 10 Omare omoherre araaghere, okore akongʼoore ataraakwa.”

11 Yaakobho akatëëbhya nyakuwaabho igha, “Maayö, kasi omanyarë igha, mura uwëëtö Esaau, we naana amabhuri ömöbhërë ghwonswe igho, kasi öni ömöbhërë ughwane m-mötërësëku. 12 Taata aratora akanhaabhaata, amanye igha nkomongʼaina ndë. Obhongʼoore bhuyö, mboraaisyöri bhobhe amaihiimo.” 13 Nyakuwaabho akamötëëbhya igha, “Amaihiimo ghayö, ghannyoore öni. Uwe kora bhuyö nkötëëbhëri, kaghi ondeetere sëmböri sinyananke siyö.”

14 Mbe, Yaakobho akaghya akaghegha sëmböri siyö, akareetera nyakuwaabho. Nyakuwaabho akahenshera ibhyakorya ibhiiya, kya bheno Isaaka yaarenga ahanshirë. 15 Hano Rebheka yaamarrë, akasoha mwi-ghutu, akaghegha-mo singibho sinshiiya isya Esaau motangi uwaaye, akaibhöhya Yaakobho, mura uwaaye omoke. 16 Akamwibhöhya ko-mabhoko riseero irya sëmböri sinyananke, na mwi-ghöti iryaye ritërëësëku. 17 Hano yaamarrë, akahaana Yaakobho ibhyakorya ibhiiya bhiyö, na omokaate ghono yaakörrë.

18 Mbe, Yaakobho akaherra suwaabho, akamötëëbhya igha, “Taata!” Wonswe akaitabha igha, “Yaa, n-hano ndë. Nu-uwe wë moona uwaane?” 19 Yaakobho akahonshora suwaabho igha, “Nö-öni Esaau omotangi uwaaho. Mmarrë kokora bhoora waarë öntëëbhëri. Ndakosabha oghorroke wikare oraaghere ibhyakorya ibhyane, okore onngʼoore.” 20 Kasi Isaaka akamöbhöörya igha, “Iyakë ökörrë unyöörrë ityënyi bhöngöbhöngö igho omoona uwaane?” Yaakobho akamohonshora igha, “YEHOBHA, Waryobha uwaaho, we ansakëëyi.”

21 Isaaka akamötëëbhya igha, “Suntara hano moona uwaane, nkohaabhaate, okore mmanye obhoheene igha, nu-uwe omoona uwaane Esaau, kasi n-wöndë igho.” 22 Yaakobho akasuntara, suwaabho akamohaabhaata, hano akomara akaghamba igha, “Engamba ni-iya Yaakobho, kasi amabhoko na-agha Esaau.” 23 Teyamomanyërrëëyi hë, ko bhoora amabhoko aghaaye, ngaarë na amabhuri kya agha Esaau. Ku bhuyö akaisëëmya okomongʼoora. 24 Akamöbhöörya ghwiki igha, “M-boheene nu-uwe omoona uwaane Esaau?” We akaikërrya igha, “Nö-öni taata!” 25 Hano suwaabho yaamarrë, akamötëëbhya igha, “Nsuntarrya haangʼë ibhyakorya ibhya ubhughwëmi ubhwaho omoona uwaane, okore ndaaghere, nkongʼoore.” Mbe, Yaakobho akamusuntarrya haangʼë ibhyakorya, akarya. Hano akomara akamoreetera amarwa agha sezabhibhu akanywa.

26 Ho, suwaabho yaamötëëbhëri igha, “Suntara haangʼë omoona uwaane, unyibhaare.” 27 Mbe, Yaakobho akamusuntarra, akamwibhaara. Hano suwaabho yaaighuurë ikirumba ikya singibho isya omoona uwaaye, akamongʼoora araghamba igha,

“Maaha, ikirumba ikya omoona uwaane n-kya ikirumba ikya ömöghöndö ghono YEHOBHA Waryobha yaangʼoora!

28 Waryobha akohomerre örömë urwa mu-ryobha na ubhwamë ubhwa ikyaro,

kora akohaane seheke sinsharu na amarwa agha sezabhibhu amaaru.

29 Abhantö abha ibhyaro bhaakutighinkanerenga,

na amakabhira, bhakosaasaamenga.

Obhe ömötöngi uwa bhawamwënyu,

na abhaana abha nyakuwëënyu, bhakwaghamere.

Ono araakwihiime, wonswe aihiimwe,

na ono araakongʼoore, wonswe angʼoorwe.”

Esaau arasabha obhongʼoore

30 Hano Isaaka yaamarrë okongʼoora Yaakobho, bhuyö Yaakobho yaatanööyë igho ukurwa ku-suwaabho, Esaau wonswe akahika ukurwa ukughwema. 31 Akasëëmya ibhyakorya ibhiiya, akaherra suwaabho, akamötëëbhya igha, “Taata! Ghorroka wikare, oraaghere ibhyakorya ibhyane öni omoona uwaaho, okore onngʼoore!” 32 Suwaabho akamöbhöörya igha, “Nu-uwe wë?” We akamohonshora igha, “Nö-öni Esaau omotangi uwaaho.”

33 Këmwë Isaaka akaghankana bhököngʼu, akaghamba igha, “Bhoono nawë oora aghwëmirë yandeetera inyama iya ityënyi? Öni mmarrë okorya uwe otaraasha. Mmöngʼöörrë, m-boheene naraangʼoorwe.”

34 Hano Esaau yaaighuurë amangʼana agha suwaabho, akakuura bhököngʼu kwa bhörrö. Hano yaamarrë, akatëëbhya suwaabho igha, “Taata, ndasabha-ko na öni wonswe onngʼoore!” 35 Kasi, Isaaka akamötëëbhya igha, “Omoke uwaaho aishirë, anngʼainirë, aghëghirë obhongʼoore ubhwaho.”

36 Esaau akaghamba igha, “Ömöntö mwighwere ku iriina, kiyö nkyo kyaaghërrë akabherekerwa igha Yaakobho! Rono nu-urwa kabhërë arambaghabhagha. Yaaghëghirë umwandö ughwane ughwa obhotangi, na ghwiki bhoono, aghëghirë obhongʼoore ubhwane!” Ho yaamarrë akabhöörya suwaabho igha, “Bhoono töntëghëëyö-ko obhongʼoore bhobhonswe igho hë?”

37 Isaaka akamohonshora igha, “Mmarrë komokora abhe ömötöngi uwaaho. Na bhawamwabho bhonswe igho, mbakörrë bhabhe abhaköri abha emeremo abhaaye. Mmohaayë seheke na amarwa agha sezabhibhu. Bhoono n-kë nkakohaana omoona uwaane?” 38 Esaau akabhöörya suwaabho igha, “Taata, nko okoghamba igha, obhongʼoore m-bömwë igho onabho? Taata, tanngʼoora-ko na öni wonswe!” Hano akomara, akakuura bhököngʼu. 39 Mbe, suwaabho, akamötëëbhya igha,

“Noraamenye ku-kyaro keno ketarëngë ëkënöru,

örömë, tirukuhike haangʼë hë,

40 Nö-möntö uwa riihë oraabhe,

noraakorrenga omoke uwaaho emeremo.

Kasi hano oreteeya,

ho oretashoka ukurwa kö-bhötöngi ubhwaye.”

Yaakobho arangʼosa Esaau

41 Mbe, Esaau akaregha Yaakobho, ko okoghera iya obhongʼoore bhuyö yaangʼöörrwë na Isaaka. Esaau akaitegherra mo-motwe ghwaye igha, “Hano sinsikö isya okosenkemerra taata serehwa, nindiita Yaakobho.”

42 Rebheka akatëëbhibhwa amaitegherro agha Esaau, motangi uwaaye, ku bhuyö akatoma ömöntö aghi okobherekera Yaakobho, mura uwaaye omoke. Akamötëëbhya igha, “Moona uwaane, angarra! Wamwënyu Esaau, nkwisëëmya arë ahake ikisiiyomba, aratuna akwite. 43 Bhoono omoona uwaane, unyitegherre. Uwe ngʼosa, oghende Haraani, wa mura uwëëtö Raabhaani. 44 Wikare waaye iyö ibhagha ike igho, okore ahike ukukwa omotwe. 45 Hano okorerra ukwaye koretendeera, narikwabhera ghano waamokorra. Hayö bhoono ho ndetoma ömöntö akosoore. N-kwakë nkwerwe na bhëënyu bhonswe igho urusikö örömwë?”

46 Hano Rebheka yaamarrë, akatëëbhya Isaaka igha, “Bhakaa Esaau Abhahiti bhano, tebhakunshomera mo-nkoro iyaane hë. Hano Yaakobho wonswe araatete omokari ukurwa mo-Abhahiti muyö, tinsyanye hë?”