Isaaka arangʼaina Abhimëërëki
26
Enkaagha iyëndë,
inshara ëndörö yaaishirë ku-kyaro kiyö,
eno ekokera eera yaaishirë,
ko-nkaagha iya Ibhurahimu.
a Isaaka akangʼaanyera mu-mughi ghono ghwaabherekerwanga igha Gheraari,
ko-Abhimëërëki,
omokama uwa Abhafirisiti.
2 YEHOBHA Waryobha yaabhööshökëëyë Isaaka ko-nkaagha iyö,
akamötëëbhya igha,
“Otakaaghya Miisiri,
kasi kaghi omenye mu-kyaro keno ndaakoraghërri igha oghende-mo.
3 Wikare mu-kyaro kiyö,
öni nendaabhe hamwë na uwe,
nkongʼoore.
Nendaahekerani ikityano keera naatyanëëyë suwëënyu Ibhurahimu,
ko okokohaana ikyaro keno kyonswe igho,
uwe na urwebhoro urwaho.b
4 Nendaarwaruhi urwebhoro urwaho kya sinyota isya ighörö iyö,
kora nendaakohaane ikyaro keno kyonswe igho.
Na okohetera urwebhoro urwaho,
nendengʼoora abhantö abha ibhyaro bhyonswe igho.
5 Nendaakongʼoore,
ko bhoora Ibhurahimu yaanyighweranga,
akabha araikërrya amangʼana aghaane,
imighiro ighyane,
okobhotora ikiina ukwane,
na kera engʼana eno naaghambanga.”
6 Ku bhuyö,
Isaaka akaikara Gheraari hayö.
7 Abhantö abha hayö,
bhakamöbhöörërrya amangʼana agha mokaaye.
Akabhahonshora igha,
“Ono m-mwisëkë uwëëtö.”
Yööbhöhirë okoghamba igha m-mokaaye,
okore abhamënyi abha mu-mughi ghuyö,
bhatakaamwita ko okoghera iya Rebheka.
Ko bhoora Rebheka uyö,
m-muuya bhököngʼu yaarë.
8 Hano Isaaka yaaikaayë iyö sinsikö sinsharu,
urusikö nyabhorebhe,
Abhimëërëki omokama uwa Abhafirisiti,
akasyömërrya mu-ridirisha,
akamaaha Isaaka araghootaghoota Rebheka.
9 Ho yaamarrë,
Abhimëërëki akabherekera Isaaka,
akamöbhöörya igha,
“Ndarra uyö m-mokaaho!
N-kwakë waaghambirë igha,
m-mwisëkë uwëënyu?”
Isaaka akamohonshora igha,
“Naaghambirë igho,
ko bhoora nööbhöhirë igha,
nenkaaitirwë ko okoghera iya we.”
10 Mbe,
Abhimëërëki akamöbhöörya igha,
“Ne-ngʼana kë eno ötökörëëyë?
Hano ho ömöntö akaamöghëghirë ataare nawe,
atamanyirë igha m-mokaaho,
tokomaaha igha nokaatökörrë tobhe abhasarya?”
11 Mbe,
Abhimëërëki akakaania abhantö abhaaye bhonswe igho igha,
“Ömöntö wowonswe igho ono araakuni ömöntö ono,
handë mokaaye,
ni-igha aitwe!”
12 Mbe,
Isaaka akarema ku-kyaro kiyö,
akaghesa ibhyakorya ibhyaru bhököngʼu,
ko-mooka ghuyö,
ko bhoora YEHOBHA Waryobha yaamöngʼöörrë.
13 Ëbhëntö ibhya Isaaka bhekaaruha,
ku bhuyö akaameha bhököngʼu.
14 Akabha na amangʼöndi,
sëmböri,
sengʼombe,
na abhaghorwa abhaaru,
kora Abhafirisiti bhakamomaahera rikenge.
15 Mbe,
Abhafirisiti bhakatubhirya ibhisima bhyonswe igho,
bheno bhyaarenga bhitukirwë na abhaghorwa abha Ibhurahimu suwaabho Isaaka.
16 Mbe,
Abhimëërëki akatëëbhya Isaaka igha,
“Karwe ku-kyaro ikyëtö kono,
ko bhoora uwe,
watuhuura.”
17 Isaaka akarwa hayö,
akaghya akëëmya ëkëröghö ikyaye mu-ribhate reno ryaarë Gheraari,
akamenya-yo.
18 Isaaka akakooha ibhisima bheera bhyaatukirwë enkaagha iya Ibhurahimu ko bhoora Abhafirisiti mbaabhitubhiiyi hano Ibhurahimu yaakuurë.
Hano Isaaka yaamarrë okobhekooha,
akabhebherekera amariina ghaaraghaara suwaabho yaabhëbhërëkëëyë.
19 Urusikö örömwë,
abhaghorwa abha Isaaka,
bhakatuka mu-ribhate riyö,
bhakasikana-mo na eseeka iya amanshë amaiya.
20 Abharëësya abha Gheraari hayö,
bhakabheehana na abharëësya abha situgho isya Isaaka,
bharabhatëëbhya igha,
“Amanshë ghano na-ghëëtö!”
Mbe,
Isaaka akabherekera ikisima kiyö igha,
Eseki,
c ko bhoora abharëësya abha Gheraari hayö,
bhaabheehaini na abharëësya abhaaye.
21 Mbe,
abharëësya abha Isaaka,
ghwiki bhakatuka ikisima ikyëndë,
kiyö kyonswe bhakakebheehanera.
Kiyö Isaaka akakebherekera igha Sitina.d
22 Mbe,
Isaaka akarwa hayö,
akaghya,
akatuka ghwiki ikisima ikyëndë.
Kiyö tekyarëëtirë righamba hë.
Ku bhuyö,
akakebherekera igha Rehobhoti,
e akaghamba igha,
“Bhoono,
YEHOBHA Waryobha atohaayë umweya omoghare,
ntoraasaghaatëri ku-kyaro.”
23 Hano akomara,
akarwa hayö,
akaghya Bhëëri-sheebha.
24 YEHOBHA Waryobha akamobhooshokera ubhutikö ubhwa urusikö ruyöruyö.
Akamötëëbhya igha,
“Öni nö-öni Waryobha uwa suwëënyu Ibhurahimu.
Otakoobhoha,
ko bhoora öni n-hamwë ndë na uwe,
nendaakongʼoore,
kora naaruhi urwebhoro urwaho,
ko okoghera iya riraghano iryane,
reno naaraghaini Ibhurahimu ömököri uwa emeremo uwaane.”
25 Ku bhuyö,
Isaaka akahaghaasha riighyö irya amaghena,
akasengera YEHOBHA Waryobha.
Akëëmya-ho ëkëröghö ikyaye,
abhaghorwa abhaaye bhakatuka ikisima ikyëndë.
26 Urusikö öröndë,
Abhimëërëki akarwa Gheraari na omosaani uwaaye uwa haangʼë ono yaabherekerwanga igha,
Ahuzati bhaana Fiköri omonene uwa abhasirikare abhaaye,
bhakaasha ku-Isaaka.
27 Isaaka akabhabhöörya igha,
“N-kë mwishirë ukuntuna-ko,
na eno mwaandëghirë,
mokandughya ukurwa mu-kyaro ikyënyu?”
28 Bhakamohonshora igha,
“Ntörööshë igha,
YEHOBHA Waryobha n-hamwë arë na uwe.
Ku bhuyö,
m-buuya tunyeerane imuuma iya omorembe,
tokore riraghano,
okore
29 otakaasha okotokora bhoghogho,
ko bhoora bhëëtö tetwakökörrë bhoghogho hë.
Ntwaakutighirë ughi hano ukughya na omorembe.
Bhoono törööshë igha,
uwe no-mongʼoorwa uwa YEHOBHA Waryobha örë.”
30 Mbe,
Isaaka akabhakorra inyangi,
bhakarya na ukunywa.
31 Nyinkyo iyaako,
bhakatyanerana ikityano ikya imuuma.
Hano Isaaka yaamarrë,
akabhahereekerra,
bhakaghya na omorembe.
32 Urusikö ruyöruyö,
abhaghorwa abha Isaaka,
bhakamoreetera amangʼana igha,
“Ikisima keera twaatukirë,
nkurwa kërë amanshë!”
33 Isaaka akabherekera ikisima kiyö igha,
Sheebha.
f Ku bhuyö,
kora na wanyareero,
umughi ghuyö nkobherekerwa ghörë igha,
Bhëëri-sheebha.
Esaau arateta abhakari ukurwa mu-kyaro ikya Bhuhiti