Abheebhorwa abhandë abha Ibhurahimu
25
Ibhurahimu akateta omokari uwöndë,
iriina iryaye yaabherekerwanga Këtura.
2 Këtura wonswe akamwebhorra abhaana,
amariina agha abhaana bhayö ni-igha,
Zimurani,
Yokishani,
Medani,
Miidiani,
Ishibhaki na Shua.
3 Yokishani wonswe akeebhora Seebha na Dedaani.
Dedaani we umwibhöri uwa Abhaashuuru,
Abharetushi,
na Abharëumi.
4 Miidiani wonswe akeebhora Efa,
Ëfëëri,
Henooko,
Abhida na Ëridaa.
Bhayö bhonswe igho,
mbo bhaarë urwebhoro urwa Këtura.
5 Ibhurahimu akahaana Isaaka umwandö ughwa ëbhëntö ibhyaye bhyonswe igho bheno yaarë nabhyo.
6 Kasi okanyoora abhaana abha bhakaaye abhandë bhayö,
amarrë okobhatuha akërëngë möhöru.
Hano yaamarrë,
akabhaahokania na omoona uwaaye Isaaka.
Akabhatëëbhya bhaghende bhamenye ikyaro ikya hare,
orobhareka urwa röghörö.
Uruku urwa Ibhurahimu
7 Ibhurahimu yaaikaayë imyoka ighana imwë merongo muhungatë na etaano.
8 Ibhurahimu yaaikaayë bhuuya ko-kebhara kono.
Yaakuurë aghötirë këmwëkëmwë,
akaghya ko-bhakörö abhaaye.
9 Abhaana abhaaye,
Isaaka na Ishimaëri,
bhakamobheeka mo-mbeehera iya Makipeera,
eno yaarenga orobhareka urwa röghörö urwa Mamure,
kö-möghöndö ughwa Efurööni,
omoona uwa Sohaari uwa rikabhira irya Abhahiti.a
10 Ömöghöndö ghuyö,
ngwo Ibhurahimu yaarenga aghörrë ukurwa ko-Bhahiti.
Ahasë hayö,
ho Ibhurahimu yaabhëëkirë-ho Saara mokaaye,
umwene wonswe ho bhaamöbhëëkirë.
11 Mbe,
hano Ibhurahimu yaakuurë,
Waryobha akangʼoora Isaaka.
Isaaka akaikara haangʼë na Bhëëri-rahai-röi.
Urwebhoro urwa Ishimaëri
12 Rono ndwo urwebhoro urwa Ishimaëri omoona uwa Ibhurahimu ono yaaibhööywë na Umumiisiri Hajiri,
omoghorwa uwa Saara.
13 Ghano hano,
na-mariina agha abhaana abha Ishimaëri.
Nebhayööti we yaarë omotangi,
akooserwa na Kedaari,
Kedaari akooserwa Adibhëëri,
na Adibhëëri akooserwa na Mibhusamu,
14 Mishima,
Duma,
Masa,
15 Hadaadi,
Tema,
Yëturi,
Nafishi bheena Kedema.
16 Bhayö mbo abhaana ikömi na bhabhërë abha Ishimaëri.
Kera ömwë uwaabho,
yaarenga ömötöngi uwa ahasë ahaaye.
b Imighi ighyabho emenene na emeke,
ngyaabhërëkëëywë amariina aghaabho.
17 Ishimaëri yaakuurë aana imyoka ighana imwë na merongo etatö na muhungatë,
akaghya ko-bhakörö abhaaye.
18 Urwebhoro urwa Ishimaëri,
bhaarenga bhamënyirë ghatëghatë iya imighi ighya Havira na Shuuri.
Ahasë hayö,
haarenga röghörö iya Miisiri,
okobhata Ashuuru.
Mbaarë na ikisiiyomba na urwebhoro urwöndë urwa abhaana abha Ibhurahimu.
Urwebhoro urwa Isaaka
19 Rono ndwo urwebhoro urwa Isaaka,
omoona uwa Ibhurahimu.
20 Isaaka hano yaarë na imyoka merongo ene,
akateta Rebheka,
mwisëkë uwa Bhëtuëri,
Umwaraamu ukurwa Padani-aramu.
Rebheka uyö m-mwisëkë uwaabho Raabhaani yaarë.
21 Rebheka m-moghomba yaarë,
ku bhuyö Isaaka akasaasaama YEHOBHA Waryobha ko okoghera iya mokaaye.
YEHOBHA Waryobha akaikërrya amasabhi aghaaye,
Rebheka akaimökya enda.
22 Enda iyö,
ni-iya ebhesare yaarë.
Mbe,
abhaana bhakataamania mo-nda iyaaye.
Mbe,
Rebheka akatëëbhya YEHOBHA Waryobha igha,
“Ko bhono nkwiyighwa,
nyakara nkwe nduho.”
23 YEHOBHA Waryobha akamohonshora igha,
“Mo-nda iyaaho muyö,
m-byaro bhibhërë bheemo.
Ibhyaro bhibhërë bhiyö,
mbiryahokana.
Ikyaro ëkëmwë,
nkerebha na obhotoro okokera ikyëndë,
Ömöntö mökörö naretighinkanera omoke uwaaye.”
24 Hano enkaagha iya ukwebhora yaahikirë,
Rebheka akeebhora ebhesare.
25 Omoona omotangi m-mokangaaru yaarë,
yaarenga na amabhuri ömöbhërë ghwonswe igho.
Kiyö nkyo kyaaghërrë akabherekerwa igha,
Esaau.
26 Omoona uwa kabhërë yaaibhööywë aghöötërrëëyë ëkësöghörö ikya Esaau.
Kiyö nkyo kyaaghërrë akabherekerwa igha,
Yaakobho.
c Enkaagha eno Esaau na Yaakobho bhaaibhööywë,
Isaaka umwibhöri uwaabho,
yaarenga na imyoka merongo esansabha.
Esaau araghörya obhoheene ubhwa umwandö ughwa okobha omoona omotangi
27 Abhaana bhayö,
bhakakiina.
Esaau akamanya ighwemo bhököngʼu.
Akabha ömöntö ono yaamanyirë risisi kya igho rërë.
Kasi Yaakobho we,
m-mohaabhu yaarë,
yaanarrë emeremo ighya ka.
28 Isaaka yaahanshirë Esaau,
ko bhoora yaaryanga sinyama isya sityënyi seno Esaau yaaghwemanga aramoreetera.
Kasi Rebheka,
we yaahanshirë Yaakobho.
29 Urusikö nyabhorebhe,
Esaau yaaruurë ukughwema asëngëëyë bhököngʼu,
akanyoora Yaakobho areeheka sëdëngu,
30 akamötëëbhya igha,
“Nsëngëëyë,
otangʼaana-ko ibhyakorya ebhekangaaru bhiyö ndaaghere.”
Kiyö nkyo kyaaghërrë bhakamobherekera igha,
Ëdöömu.
Ensonga iya Ëdöömu ni-igha,
omokangaaru.
31 Yaakobho akamohonshora igha,
“Nyoore ni-igho ukutuna,
ngörrya obhoheene ubhwa umwandö ughwaho ughwa okobha obhotangi.”
32 Wonswe akamohonshora igha,
“Maaha nkutuna ndë ukukwa na umweko!
Obhoheene ubhwa okobha omotangi bhuyö n-kë bhoraantöörri?”
33 Yaakobho akamötëëbhya igha,
“Ntyanera bhoono igho.”
Esaau akamutyanera,
ku bhuyö akamöghörrya obhoheene ubhwa umwandö ughwaye ughwa okobha obhotangi.
34 Mbe,
Yaakobho akahaana Esaau omokaate na sëdëngu.
Esaau,
akarya na ukunywa,
hano akomara akatanora.
Ni-igho Esaau yaasërrë obhoheene ubhwa umwandö ughwaye ughwa okobha obhotangi.