Okosemoka 24

Isaaka arateta Rebheka

Mbe, Ibhurahimu yaarenga aghötirë bhököngʼu, na okanyoora YEHOBHA Waryobha yaamongʼoora mmö-bhëntö arë ghatë. 2 Urusikö örömwë, Ibhurahimu akatëëbhya omoghorwa uwaaye omonene ono yaarenga umwimërërri uwa ëbhëntö ibhyaye bhyonswe igho igha, “Nshö osambeke okobhoko ukwaho nsë iya ikiimo ikyane, untyanere. 3 Öni nkutuna ndë untyanere ku iriina irya YEHOBHA, Waryobha uwa mu-ryobha na ekebhara igha, töötëti omoona uwaane Isaaka, omokari wowonswe igho, ukurwa mo-Bhakaanaani mono. 4 Kasi, uwe kaghi ku-kyaro keno naasemoka ukurwa, ko bhahiiri abhaane, otonere iyö omoona uwaane Isaaka omokari.”

5 Omoghorwa uyö, akamöbhöörya igha, “Iyakë ndaakore hano umwisëkë uyö araange ukuusha mu-kyaro keno? Bhoono hayö ebhe igha ngeghe omoona uwaaho mmukyöri ku-kyaro keno waaruurë?”

6 Ibhurahimu akamohonshora igha, “Otakaasha ukushaashya ukukyörya omoona uwaane iyö! 7 YEHOBHA, Waryobha uwa mu-ryobha, we yaanduusya wëëtö ka, ko-taata, ukurwa mu-kyaro keno neebhorrwa-mo, yaantëëbhëri, kora akantyanera igha, ‘Nendehaana urwebhoro urwaho ikyaro keno.’ Ku bhuyö, uyö naraakotomere maraika uwaaye, ono araaghere oreetere omoona uwaane omokari ukurwa iyö. 8 Nyoore omokari uyö naanga ukuusha hamwë na uwe, mbe ikityano keno tekekore engʼana ku-uwe hë. Kasi otakaasha ukukyörya omoona uwaane iyö.”

9 Mbe, omoghorwa uyö, akatoora okobhoko ukwaye hansë iya ikiimo ikya omonene uwaaye Ibhurahimu, akamutyanera ko okoghera iya engʼana iyö. 10 Hano akomara, akaghegha sengamia ikömi isya omonene uwaaye, akatanora na imituho imiiya ighya eteemo nsharu. Akakora oroghendo ukughya mu-mughi ghono ghwaabherekerwanga igha Naahöri, ku-kyaro ikya Mesopotamia.

11 Hano yaahikirë mu-kihiita ikya umughi, okanyoora köghörööbhirë. Enkaagha iyö, yo abhakari bhaaghyanga okogheera amanshë. Akaraarya hansë sengamia isyaye haangʼë na ikisima.

12 Mbe, akasaasaama igha, “Ëë YEHOBHA, Waryobha uwa omonene uwaane Ibhurahimu! Ndakosaasaama öntöörri, amangʼana aghaane ghaghi bhuuya reero, ösërëëni omonene uwaane Ibhurahimu. 13 Bhoono maaha! Ne-mbareka iya ikisima hano ndë, na abhaisëkë abha umughi ghono n-hano bhakoheta bharaghya okosoora amanshë. 14 Mbe, ebhe igha, umwisëkë ono ndaatëëbhi mo-bhayö igha, ‘Ndasabha otoore ensengo iyaaho nnywe amanshë,’ anhonshore igha, ‘Uwe kanywe, kora na sengamia isyaho nendaasetahere,’ uyö we abhe ono ushaaghörrëëyë ömököri uwa emeremo uwaaho Isaaka. Na ku engʼana iyö nendaamanye igha, ösërëënëëri omonene uwaane.”

15 Hano yaarenga akeesabha Waryobha, hayöhayö igho, akatora umwisëkë ömwë, ono akobherekerwa igha Rebheka, aitëëkirë ensengo iyaaye ku-rireko. Rebheka uyö, m-mwisëkë uwa Bhëtuëri yaarë, möshökörö uwa Naahöri bhaana Miirika. Na Naahöri uyö m-mura uwaabho Ibhurahimu yaarë. 16 Umwisëkë uyö, m-muuya yaarë bhököngʼu, kora ni-ntindë yaarë. Mbe, akangʼaaraara ukughya mu-kisima okotaha amanshë, akaishörya ensengo iyaaye, hano akomara, akatiira arakyora ka.

17 Mbe, omoghorwa uyö akakenya bhöngöbhöngö okore asikane nawe. Hano yaasikaini nawe, akamötëëbhya igha, “Ndasabha ongʼaane-ko amanshë agha mo-nsengo iyaaho amake igho nnywe!” 18 Wonswe akamohonshora igha, “N-gaano unywe, omonene uwaane.” Akatoora ensengo iyaaye bhöngö, akagheghooterra ukumunywënsya. 19 Hano yaamarrë okomohaana amanshë, umwisëkë uyö akamötëëbhya igha, “Tigha ntahere sengamia isyaho amanshë, syonswe sinywe, siite inyonta.” 20 Akangoherrya okohoma amanshë mu-ritubha irya ukunywënsëra-mo situgho, akakenya ukughya mu-kisima okotaha amanshë aghandë agha ukunywënsya sengamia siyö.

21 Mbe, omoghorwa uyö akamomaaherra, akakira igho, tiyaaghambirë engʼana hë, yaatunanga amanye nyoore YEHOBHA Waryobha nashömëri oroghendo urwaye, kasi hë. 22 Hano sengamia siyö syaamarrë ukunywa amanshë, akaghegha ikipuri ikya ku-rinyëërö ikya esahaabhu, akahaana umwisëkë uyö. Akamohaana na sembangëri ibhërë isya esahaabhu. Ëbhëntö bhiyö m-bya öbhöghöri obhonene bhököngʼu bhyaarë. 23 Akamöbhöörya igha, “Uwe m-mwisëkë uwa wë örë? Ntunyoora ahasë aha okoraara ka wëënyu kuyö?” 24 Umwisëkë uyö, akamohonshora igha, “Öni m-mwisëkë uwa Bhëtuëri, omoona uwa Miirika, mokaa Naahöri.” 25 Ghwiki akamötëëbhya igha, “Wëëtö, orosaahi n-dwaru rooho, ibhyakorya ibhya situgho höbhërë, na ahasë aha okoraara abhaghëni nkotooka harë.”

26 Omoghorwa uyö, akaihiinya, akakumya YEHOBHA Waryobha araghamba igha, 27 “Atöönibhwi YEHOBHA, Waryobha uwa omonene uwaane Ibhurahimu, ko bhoora asërëënëri omonene uwaane Ibhurahimu na okomokorra öbhöntö ubhwa bhoheene. YEHOBHA Waryobha antangatirë igho, anhikiri ku-mughi ughwa mura uwaabho omonene uwaane Ibhurahimu!”

28 Umwisëkë uyö, akakenya ukughya ka, akatëëbhya nyakuwaabho na abhamura abhaabho amangʼana ghayö. 29-30 Rebheka yaarë na mura uwaabho ono yaabherekerwanga igha Raabhaani. Hano Raabhaani uyö yaarööshë ikipuri kërëngë ku-rinyëërö, na sembangëri ko-mabhoko, na ukwighwa amangʼana ghano Rebheka yaatëëbhiibhwi na omoghorwa oora, akakenya ukughya mu-kisima amaahane na ömöntö uyö. Hano yaahikirë akanyoora ömöntö uyö naimërëëyë ku-kisima hayö, haangʼë na sengamia. 31 Akamötëëbhya igha, “Toghende wëëtö, uwe ono wangʼoorwa na YEHOBHA Waryobha. Ndarra n-kebhara eno wimërëëyë? Mmarrë kökösëëmërya inyumba na ahasë aha sengamia isyaho.”

32 Mbe, omoghorwa uyö akahinana nawe waabho ka. Imirigho ghekaikibhwa ukurwa ko-sengamia, bhakasehaana orosaahi na ibhyakorya ibhya situgho. Omoghorwa uyö akahaanwa amanshë agha ukwisaabha amaghörö, umwene hamwë na bhano yaaishirë nabho. 33 Bhakahenshera ibhyakorya, bhekareetwa. Hano bhyaarëëtirwë, akaghamba igha, “Tendaghere ëkëntö kyokyonswe keera, ntaraabhatëëbhya keno këndëëtirë.” Raabhaani akamötëëbhya igha, “Ghamba mbe!”

34 Akaghamba igha, “Öni no-moghorwa uwa Ibhurahimu ndë. 35 YEHOBHA Waryobha yangʼoora omonene uwaane uyö, yameha këmwëkëmwë. Yaamohaana amakomo agha amangʼöndi, sëmböri na sengʼombe. Yaamohaana sengamia na sitikërë, ebheghera ibhya seehera na ibhya esahaabhu, hamwë na abhaghorwa abha ikishaasha na abha ekekari. 36 Saara mokaa omonene uwaane, yaamwebhorra omoona uwa ikishaasha mo-bhoghaaka ubhwaye. Omoona uyö, we Ibhurahimu yaahaana ëbhëntö ibhyaye bhyonswe igho. 37 Mbe, omonene uwaane akantyanera igha, ‘Otakaasha ökötëtya omoona uwaane Isaaka, omokari wowonswe igho ukurwa-mo abhaisëkë abha ikyaro ikya Kaanaani keno mmënyirë-mo. 38 Kasi oghende igho uhike wa taata, mu-mughi ughwa wamwëtö, otonere omoona uwaane Isaaka omokari.’ 39 Nkamöbhöörya igha, ‘Bhoono, hano umwisëkë uyö araange ukuusha ku-kyaro keno, iyakë eraabhe?’ 40 Akanhonshora igha, ‘YEHOBHA Waryobha ono nkwighwera nkaagha syonswe igho, naraakoreetere maraika uwaaye uhinane nawe. Naraakore oroghendo urwaho rushome, okore ogheghere omoona uwaane omokari ukurwa ko bhahiiri abhaane, abha eka iya taata. 41 Na nyoore uriihika ko bhawamwëtö, bhaange kokohaana umwisëkë, ikityano ikya imuuma eno, tekekoghoote hë.’ ”

42 Omoghorwa uyö, akaghëndërrya okoghamba igha, “Reero hano nhikirë mu-kisima haara, nensaasaamirë igha, ‘Uwe YEHOBHA, Waryobha uwa omonene uwaane Ibhurahimu! Ndakosabha öntöörri oroghendo urwane rushome. 43 Maaha! Bhoono nimërëëyë haangʼë na ikisima keno. Mbe ebhe igha, umwisëkë ono araashe okotaha amanshë, mmosabhe angʼaane-ko amanshë ukurwa mo-nsengo iyaaye nnywe, 44 amare anhonshore igha, “Uwe kanywe, na sengamia isyaho syonswe nendaasetahere amanshë!” Uyö we abhe omokari ono uwe YEHOBHA Waryobha ushaaghörrëëyë omoona uwa omonene uwaane.’

45 “Mbe, naasaasaamanga bhukiri, ntaraamara okosaasaama, Rebheka akatora, aana ensengo iyaaye ku-rireko. Akangʼaaraara ukughya mu-kisima, okotaha amanshë. Nkamötëëbhya igha, ‘Ngʼaana-ko amanshë nnywe!’ 46 Kamwë igho, akatoora ensengo iyaaye, akantëëbhya igha, ‘Mbe kanywe, na sengamia isyaho nendaasetahere.’ Mbe nkanywa, na sengamia isyane akasetahera amanshë sekanywa.

47 “Hano akomara, nkamöbhöörya igha, ‘Uwe m-mwisëkë uwa wë örë?’ Akanhonshora igha, ‘Öni m-mwisëkë uwa Bhëtuëri, omoona uwa Miirika, mokaa Naahöri.’ Mbe, nkamotoorra ikipuri ku-rinyëërö, na nkamötöörya sembangëri ko-mabhoko. 48 Mbe, nkaihiinya, nkatöönia YEHOBHA, Waryobha uwa omonene uwaane Ibhurahimu, ko bhoora antangatirë ko-roghendo urwane kora anyörökëri umwisëkë uwa muhiiri uwa omonene uwaane, abhe mokaa omoona uwaaye.

49 “Mbe, bhoono möntëëbhi mmanye, nyoore mokorra omonene uwaane öbhöntö ubhwa heene, nyoore motaakore igho, mmanye bhono ndaakore.”

50 Raabhaani na Bhëtuëri bhakamohonshora igha, “Bhëëtö törööshë igha, engʼana eno, n-ku YEHOBHA Waryobha umwene ikurwa, ku bhuyö bhëëtö tetoona ngʼana hë. 51 Rebheka n-goono n-hano arë! Uwe mogheghe muhinane, abhe mokaamoona uwa omonene uwaaho, kya bhono YEHOBHA Waryobha aghambirë.”

52 Omoghorwa uwa Ibhurahimu uyö, hano yaaighuurë amangʼana ghayö, akaihiinya mbere iya YEHOBHA Waryobha ubhusyö ubhwaye bhokahika hansë. 53 Akaruusya ëbhëntö bheno bhyaakorwa ko ebheghera ibhya seehera, na ibhya esahaabhu, hamwë na singibho, akahaana Rebheka. Akaruusya ghwiki ëbhëntö ibhyëndë ibhya öbhöghöri, akahaana mura uwaabho Rebheka na nyakuwaabho. 54 Hayö bhoono bhakamanya okorya, bhakanywa kora bhakaraara hayö.

Hano bhaabhöökirë nyinkyo, omoghorwa uyö akaghamba igha, “Ndasabha bhoono nkyore ko-monene uwaane.” 55 Kasi mura uwaabho Rebheka, hamwë na nyakuwaabho, bhakamohonshora igha, “Utighe umwisëkë ono, aikare kö-bhëëtö hano, kya sinsikö ikömi, ho bhoono amanye okotanora.” 56 Kasi we akabhatëëbhya igha, “YEHOBHA Waryobha amarrë konkorra bhuuya amangʼana ghayö, ku bhuyö bhëënyu motakaantëghëtya hano! Mutighe nkyore ko-monene uwaane.”

57 Nabho bhakamohonshora igha, “Tigha tobherekere umwisëkë umwene, tömöbhööri.” 58 Bhakabherekera Rebheka, bhakamöbhöörya igha, “Rebheka, nkwikërrya örë ukuhinana na ömöntö ono?” Akabhahonshora igha, “Yëë, ntoraahinane!”

59 Mbe, bhakatigha Rebheka aghende. Yaaghëëyë na omokari ono yaamörërrë kurwa akërëngë moona, hamwë na omoghorwa uwa Ibhurahimu, na abhantö abhaaye. 60 Bhahiiri abha Rebheka, bhakamongʼoora bharaghamba igha, “Uwe umwisëkë uwëëtö, unyoore urwebhoro urwa ëbhëkwë na ëbhëkwë! Na urwebhoro urwaho, robhaahe na ukunyoora imighi ighya abhabhisa abhaaho.” 61 Rebheka akatanora na abhaghorwa abhaaye abha ekekari, bhakariina ko-sengamia, bhakaghya na omoghorwa uwa Ibhurahimu uyö. Ni-igho omoghorwa uyö yaaghëghirë Rebheka, akaghya nawe.

62 Enkaagha iyö, waanyöörrë Isaaka amarrë kukyora ukurwa Bhëëri-rahai-röi, bhoono amënyirë Nëghëbhu. 63 Omoghoroobha ughwa urusikö nyabhorebhe, okanyoora Isaaka aghëëyë kö-möghöndö ukwitegherra amangʼana mo-motwe ughwaye. Hano yaaghörrökëri amaiso, akamaaha sengamia seraasha. 64 Rebheka wonswe, akarekera amaiso aghaaye akamaaha Isaaka. Hano yaamörööshë, akaika ukurwa ko-ngamia. 65 Rebheka akabhöörya omoghorwa uwa Ibhurahimu uyö igha, “Nawë oora akoghenda kö-möghöndö, araasha ukututurungʼana?” We akamohonshora igha, “No-monene uwaane Isaaka.” Mbe, Rebheka akaibhisya isheera iyaaye. 66 Omoghorwa uyö, akatëëbhya Isaaka kya bhono amangʼana ghaabhaayë. 67 Hano Isaaka yaaighuurë amangʼana ghayö, akasöhya Rebheka mwi-ghutu irya nyakuwaabho, akabha mokaaye. Akahansha bhököngʼu Rebheka. Rebheka akaröörësya Isaaka ko okoghera iya obhotaka ubhwa ukukwerwa na nyakuwaabho.