Ibhurahimu araghora ahasë aha okobheeka mokaaye
23
Mbe,
Saara yaahikiri imyoka ighana imwë na merongo ëbhërë na muhungatë.
2 Akakwera Kiriati-aribha iyö,
mu-kyaro ikya Kaanaani ahasë hano reero eno hakobherekerwa igha,
Hëbhurööni.
Ibhurahimu akamokoorra igho akasenkemerra.
3 Mbe,
Ibhurahimu akatigha hayö ikihundughu ikya mokaaye,
akaghya kushumaasha na abhantö abha ekabhira iya Abhahiti abha ikyaro kiyö,
akabhatëëbhya igha,
4 “Öni nëmënyirë mö-bhëënyu hano kasi m-möghëni ndë.
Ndabhasabha möngörri-ko ahasë ahokobhekeera habhe ahaanehaane,
okore mbeeke-ho mokaane.”
5 Abhahiti bhayö,
bhakamohonshora igha,
6 “Örë omonene uwëëtö,
utwitegherre!
Uwe nu-uwe örëngë ömötöngi omonene mö-bhëëtö,
uwe otashaaghora ahasë hohonswe igho ahaiya hano ukutuna okobheeka-ho mokaaho.
Taaho ömöntö ono araakwime ahasë aha okobheeka-ho mokaaho.”
7 Ku bhuyö,
Ibhurahimu akeemoka,
akaihiinya mbere iya Abhahiti abha ikyaro kiyö,
eno arabhakumya.
8 Akabhatëëbhya igha,
“Hano oraanyoore moranyikërërrya mbeeke umuku uwaane,
nkobhasabha ndë igha,
munyighwere,
monsaasaamere Efurööni mura uwa Sohaari,
9 igha angörri risana iryaye reera rërëngë Makipeera,
ko bhoora mo-rotonga urwa ömöghöndö ughwaye rërëngë.
Mömötëëbhi angörri mbere iyëënyu kö öbhöghöri ubhwaye bhono akutuna,
okore öni wonswe nnyoore ahasë ahaane aha okobheekera.”
10 Enkaagha iyö,
Efurööni umwene wonswe yaarenga aikaayë mu-kihiita ikya okosohera mu-mughi,
hamwë na Abhahiti bhayö.
Mbe,
akahonshora Ibhurahimu mbere iyaabho hayö bhonswe igho igha,
11 “Ti-igho hë omonene uwaane,
ndakosabha unyitegherre.
Nendaakohaane ömöghöndö ghoora na risana irya-ko bhosa igho.
Nendaakohaanere ko Abhahiti bharikyane hano,
obheeke umuku uwaaho.”
12 Ibhurahimu akaihiinya ghwiki mbere iya Abhahiti bhonswe igho.
13 Akatëëbhya Efurööni na abhantö bhonswe igho bharaighwa igha,
“Ndakosabha,
unyitegherre!
Nendaakohaane seehera isya öbhöghöri ubhwa ömöghöndö ghuyö.
Ndasabha osegheghe,
okore nnyoore ahasë aha okobheeka umuku uwaane.”
14 Efurööni akahonshora Ibhurahimu igha,
15 “Omonene uwaane unyitegherre!
Ömöghöndö ghuyö n-gwa öbhöghöri ubhwa sishëkëëri amaghana ane agha seehera,
kasi bhoono siyö seena ehoorohooro kë ghatë iyaane na uwe?
Uwe otaghya obheeke-mo umuku uwaaho.”
16 Mbe,
Ibhurahimu na Efurööni bhakaikererrania.
Ibhurahimu akarenga ekerengere kiyö bhaikererraini mbere iya Abhahiti bhayö.
Ekerengere kiyö nkyo kyaaghendanga na abhaköri abha ibhyashara abha enkaagha iyö.
17 Mbe,
ni-igho Ibhurahimu yaahaaywë ömöghöndö ughwa Efurööni ghono ghörëngë Makipeera,
okobhata Mamure,
hamwë na risana irya-ko,
na ëmëtë ghyonswe igho,
bhekabha ibhyaye.
18 Engʼana iyö yaaikörrë mbere iya Abhahiti bhonswe igho,
bhano bhaarenga bhaaikomaini mu-kihiita ikya umughi ghuyö.
19 Hano ghayö ghaahööyë,
Ibhurahimu akabheeka mokaaye Saara,
mu-risana reno ryaarenga kö-möghöndö ghuyö ghörëngë Makipeera haangʼë na Mamure,
okobhata Hëbhurööni,
mu-kyaro ikya Kaanaani.
20 Ni-igho Abhahiti bhaaghörëëyi Ibhurahimu ömöghöndö na risana irya-ko,
hakabha ahasë ahaaye aha okobheeka abhantö abhaaye.