Waryobha arashaashya Ibhurahimu
22
Mbe,
hano ghayö ghaahööyë,
Waryobha akashaashya Ibhurahimu.
Akamobherekera igha,
“Ibhurahimu!”
Ibhurahimu akaghamba igha,
“N-hano ndë.”
2 Waryobha akamötëëbhya igha,
“Ghegha omoona uwaaho omoghonshe,
umumwëmwë Isaaka,
oghende nawe ku-kyaro ikya Möria,
ku-nguku eno ndaakwöröki.
Iyö,
yo oraamokore abhe ikimwenso ikya ukusikibhwa.”
3 Mbe,
hano bhwaakëëyë,
Ibhurahimu akabhooka nyinkyo shiri,
akasëëmya sënkwë isya okosambera ikimwenso.
Akaghegha itikërë,
na abhaghorwa abhaaye bhabhërë,
hamwë na omoona uwaaye Isaaka.
Akaghya ahasë haara yaatëëbhiibhwi na Waryobha.
4 Urusikö urwa katatö,
Ibhurahimu akaghörrökya amaiso,
akamaaha ahasë hayö urwa hare.
5 Akatëëbhya abhaghorwa abhaaye bhayö igha,
“Bhëënyu mutighare hano na itikërë.
Tigha öni na omoona uwaane,
toghende eera okosengerra Waryobha.
Hano toraamare,
ntoraakyore.”
6 Mbe,
Ibhurahimu akaghegha sënkwë isya okosambera ikimwenso,
akaitëëkya omoona uwaaye Isaaka.
Umwene,
akaghegha omorro na ekegheso,
bhakaghya abheene igho.
7 Enkaagha eno bhaarenga ko-roghendo,
Isaaka akabherekera suwaabho igha,
“Taata!”
Wonswe akaitabha,
akamöbhöörya igha,
“Iyakë okoghamba omoona uwaane?”
Isaaka akamöbhöörya igha,
“Ndamaaha toona omorro na sënkwë,
kasi ikighuruki ikya ukumwensa,
hai kërëngë?”
8 Ibhurahimu akamohonshora igha,
“Moona uwaane,
Waryobha umwene we araairuusiri ikighuruki ikya ukumwensa.”
Ku bhuyö,
bhakaghëndërrya na oroghendo urwabho.
9 Hano bhaahikirë ahasë hano Waryobha yaarenga amötëëbhëri,
Ibhurahimu akakora riighyö irya amaghena,
akatoora-ko sënkwë.
Hano yaamarrë,
akabhoha omoona uwaaye Isaaka,
akamoraarya kö-sënkwë.
10 Akarambeka okobhoko ukwaye,
akaghegha ekegheso,
okore ashinshe omoona uwaaye.
11 Mbe,
maraika uwa YEHOBHA Waryobha akamobherekera ukurwa mu-ryobha igha,
“Ibhurahimu,
Ibhurahimu!”
Akaitabha igha,
“N-hano ndë!”
12 Maraika uyö,
akaghamba igha,
“Otakaanyahaara omoona uwaaho,
kora otakaamokorra engʼana yoyonswe igho!
Bhoono marrë okomanya igha,
nkwighwera örë Waryobha,
ko bhoora otaangëëyë omoona uwaaho umumwëmwë.”
13 Ibhurahimu akaghörrökya amaiso aghaaye,
akamaaha righuruki rëghöötiibhwi mo-kesaka,
nyuma iyaaye hayö.
Ku bhuyö,
akatigha omoona,
akaghya okoghegha righuruki riyö.
Akarekora ikimwenso ikya ukusikibhwa.
14 Ibhurahimu akabherekera ahasë hayö igha,
YEHOBHA-Yirë,
ensonga iyaamo ni-igha,
“YEHOBHA Waryobha nkuruusya arë!”
Nkyo kekoghera,
nanyabhoono abhantö mbaana ëkërëngyö igha,
“Nkeraaruusibhwi ku-nguku iya YEHOBHA Waryobha.”
15 Maraika uwa YEHOBHA Waryobha akabherekera Ibhurahimu urwa kabhërë ukurwa mu-ryobha,
16 akamötëëbhya igha,
“YEHOBHA Waryobha araghamba igha,
‘Ko bhoora otanyimirë omoona uwaaho umumwëmwë,
nkukutyanera ndë igha,
17 nendaakongʼoore uwe na urwebhoro urwaho,
nendaarwaruhi kya sinyota isya ighörö iyö,
na kya omosense ughwa ko-morambo ughwa inyansha.
Urwebhoro urwaho,
ndorebhaaha imighi ighya abhabhisa abhaabho.
18 Okohetera urwebhoro urwaho,
nendengʼoora abhantö abha ibhyaro bhyonswe igho,
ko bhoora unyighwërëëyë.’”
19 Mbe,
Ibhurahimu akakyora ko-bhaghorwa abhaaye,
bhonswe igho bhakahonshoka hamwë okohekera Bhëëri-sheebha.
Ibhurahimu akaghëndërrya ukwikara-yo.
Abhaana abha Naahöri
20 Hano amangʼana ghayö ghaahööyë,
Ibhurahimu akatëëbhibhwa igha,
“Miirika wonswe aibhörëëyë wamwënyu Naahöri abhaana!
21 Omotangi arabherekerwa Usi,
na ono akomoosera arabherekerwa Bhuzi,
ono akoosera uyö,
arabherekerwa Kimwëri suwaabho Araamu,
22 na Kësëdi,
Hazo,
Piridashi,
Yidirafu na Bhëtuëri.”
23 Bhëtuëri n-suwaabho Rebheka.
Miirika yaaibhörëëyë Naahöri,
wamwabho Ibhurahimu,
abhaana monaane bhayö.
24 Reuma omokari omoke uwa Naahöri,
wonswe akamwebhorra abhaana abhandë.
Abhaana bhayö m-baabho,
Tebha,
Ghahamu,
Tahashi,
na Maaka.