Ukwebhorwa ukwa Isaaka
21
YEHOBHA Waryobha akahiita riraghano iryaye ko amangʼana agha Saara,
akamokorra kya bhono yaaraghaini.a
2 Mbe,
Saara akaimökya enda,
akeebhorra Ibhurahimu omoona uwa ikishaasha,
mo-bhoghaaka ubhwaye,
ko-nkaagha eeraeera,
kya bhono Waryobha yaaraghaini Ibhurahimu.
3 Ibhurahimu akaroka omoona uyö iriina igha,
Isaaka.b
4-5 Enkaagha eno Isaaka yaaibhööywë,
Ibhurahimu yaarenga na imyoka ighana imwë.
Ibhurahimu yaasaarrë Isaaka,
aana sinsikö monaane kya bhono Waryobha yaarenga amoraghërrëëyi.c
6 Saara akaghamba igha,
“Waryobha akörrë nshömëëywë.
Kera ömöntö ono araaighwe engʼana eno,
naraashomerwenga ko engʼana iyö.”
7 Ghwiki,
akaghamba igha,
“Nawë akaatëëbhëri Ibhurahimu igha,
na öni Saara nenkaaghönkëri abhaana?
Maaha bhoono,
mwibhörëëyë omoona uwa ikishaasha mo-bhoghaaka ubhwaye!”
Hajiri na Ishimaëri bhararughibhwa
8 Isaaka akaghëndërrya ukukiina,
na urusikö rono yaatuusiibhwi,
Ibhurahimu akakora inyangi enene.
9 Urusikö örömwë,
Saara akamaaha Ishimaëri,
omoona uwa Ibhurahimu,
ono yaaibhööywë na Hajiri Umumiisiri,
arashabhura omoona uwaaye,
d Isaaka.
10 Ku bhuyö,
Saara akatëëbhya Ibhurahimu igha,
“Rughya omokari omoghorwa ono hamwë na omoona uwaaye!
Ko bhoora omoona uwa omoghorwa,
taatore okosanga umwandö hamwë na omoona uwaane Isaaka.”
11 Amangʼana ghayö Saara yaaghambirë ngaanyahaarrë Ibhurahimu bhököngʼu,
ko bhoora Ishimaëri wonswe m-moona uwaaye.
12 Mbe,
Waryobha akatëëbhya Ibhurahimu igha,
“Otakaamaaha igha engʼana iya omoghorwa uwaaho na omoona uwaaye iyö Saara akötëëbhëri igha ne-ngogho hë.
Kyokyonswe igho keno Saara araakötëëbhi,
uwe kora.
Ko bhoora urwebhoro urwaho,
nku-Isaaka roresemoka ukurwa.
13 Na omoona uwa omoghorwa uwaaho,
nemokora abhe umwibhöri uwa ikyaro ekenene,
ko bhoora wonswe m-moona uwaaho.”
14 Hano bhwaakëëyë,
Ibhurahimu akamuta nyinkyo shiri,
akaghegha ibhyakorya na amanshë,
akatoorra Hajiri ku-rireko,
akamurughya hamwë na omoona uwaaye.
Bhakaghoota-ko enshera iya ukughya ku-riköngö irya Bhëëri-sheebha.
Bhakabha bharainaaranaara muyö.
15 Hano amanshë ghaahööyë,
Hajiri akaraarya omoona uwaaye uyö hansë mö-këtöntööri.
16 We akaghya hare hake,
kya obhotambë ubhwa okorekera umughwë,
akaikara,
akaighambera mo-motwe ughwaye igha,
“Tinkutuna mmaahe omoona uwaane arakwa.”
Hano yaaikaayë,
akasimya ukukuura bhököngʼu.
17 Mbe,
Waryobha akaighwa ikikuuro ikya omoona,
ku bhuyö maraika uwa Waryobha akabhöörya Hajiri ukurwera mu-ryobha igha,
“Ni-nyaanyi kë onayo?
Otakoobhoha!
Waryobha aighuurë ikikuuro ikya omoona uwaaho haara arë.
18 Emoka!
Oghende ogheghe omoona uwaaho mo-mabhoko aghaaho.
Öni nendaamokore abhe umwibhöri uwa abhantö abhaaru.”
19 Mbe,
Waryobha akaramökya Hajiri amaiso,
akamaaha ikisima ikya amanshë.
Ku bhuyö,
akaghya akataha amanshë,
akaishörya ëkëntö ikya amanshë keno yaarë nakyo,
akahaana omoona uwaaye anywe.
20 Mbe,
Waryobha akabha hamwë na omoona uyö,
akakiina igho akahera,
akabha umumura umuhiku.
Umumura uyö akaghya okomenya ku-riköngö,
akabha umughwëmi bhököngʼu uwa ukughwemera obhota.
21 Yaamënyirë ku-riköngö irya Parani.
Nyakuwaabho akamotetera omokari ukurwa ku-kyaro ikya Miisiri.
Ibhurahimu na Abhimëërëki bharanyeerania imuuma
22 Urusikö nyabhorebhe,
omokama Abhimëërëki hamwë na Fiköri omonene uwa abhasirikare abhaaye,
bhakataarra Ibhurahimu.
Abhimëërëki akamötëëbhya igha,
“Waryobha n-hamwë arë na uwe,
ko-ghonswe igho ghano okokora.
23 Bhoono ntyanera ku iriina irya Waryobha igha,
turinnyeera inikö öni,
abhaana abhaane,
na urwebhoro urwane.
Ku bhuyö ni-igha onkorre amangʼana amaiya,
öni na ikyaro keno uwe ömöghëni ömënyirë-mo.
Onkorre amangʼana amaiya kya bhono öni naakökörëëyë amangʼana amaiya.”
24 Ibhurahimu akamohonshora igha,
“Nkukutyanera ndë igha,
ni-igho ndaakore.”
25 Ho yaamarrë akaibhëmbëërya ko-Abhimëërëki,
ko okoghera iya ikisima keno abhaghorwa abha Abhimëërëki bhaamuruusiri.
26 Abhimëërëki akamötëëbhya igha,
“Öni temanyirë ömöntö ono yaakörrë igho,
kora uwe tuwakantëëbhëri hë.
N-kya reero nighuurë engʼana iyö.”
27 Mbe,
Ibhurahimu akareeta amangʼöndi,
sëmböri na sengʼombe,
akahaana Abhimëërëki.
Bhakarya imuuma.
28 Ibhurahimu akashaaghora amashöörö muhungatë.
29 Abhimëërëki akamöbhöörya igha,
“N-kwakë ushaaghööyë amashöörö muhungatë agheene igho?”
30 Ibhurahimu akamohonshora igha,
“Uwe ghegha amashöörö muhungatë ukurwa mo-mabhoko aghaane,
okore kebhe ekemanyërryö igha,
nö-öni naatukirë ikisima keno.”
31 Mbe,
ikisima kiyö kekabherekerwa igha,
Bhëëri-sheebha,
e ko bhoora ho bhaatyaneraini ko okoghera iya imuuma iyaabho iyö.
32 Hano bhaamarrë ukunyeerana imuuma Bhëëri-sheebha hayö,
Abhimëërëki akatanora hamwë na Fiköri,
omonene uwa abhasirikare abhaaye,
bhakakyora ku-kyaro ikya Abhafirisiti.
33 Ibhurahimu akëëmya umusisi Bhëëri-sheebha hayö,
akasengerra-ho YEHOBHA Waryobha uwa amakora ghonswe igho.
34 Ibhurahimu yaamënyirë mu-kyaro ikya Abhafirisiti kya ömöghëni sinsikö sinsharu.