Ibhurahimu arangʼaina Abhimëërëki
20
Ibhurahimu akarwa Mamure hayö,
akabhata orobhareka urwa riköngö irya Nëghëbhu.
Akamenya ghatëghatë iya imighi ighya Kadëshi na Shuuri.
Ho yaamarrë,
akaghya okomenya mu-mughi ughwa Gheraari ku-ribhagha ike igho.
2 Mbe,
enkaagha eno Ibhurahimu yaarenga iyö,
akatëëbhya abhantö igha,
Saara m-mwisëkë uwaabho yaarë.
Ku bhuyö,
Abhimëërëki omokama uwa umughi ghuyö,
akatomana abhantö,
bhamoreetere Saara.
3 Kasi,
Waryobha akabhooshokera Abhimëërëki ubhutikö mo-kerooto,
akamötëëbhya igha,
“Uwe nuukwa,
ko bhoora uyö öghëghirë,
m-mokari uwa ömöntö!”
4 Enkaagha iyö,
waanyöörrë Abhimëërëki ataraaraara na Saara,
ku bhuyö akamohonshora igha,
“Omonene,
nkwita örë abhantö bhano bhatasarri?
5 Ibhurahimu umwene we yaantëëbhëri igha,
Saara m-mwisëkë uwaabho!
Ghwiki na Saara umwene wonswe m-buyöbhuyö aghambirë igha,
Ibhurahimu m-mura uwaabho!
Ku bhuyö,
nënkörrë igho kwa nkoro nshiiya,
ko engʼana iyö,
teneena obhosarya bhobhonswe igho hë!”
6 Mbe,
Waryobha akamötëëbhya mo-kerooto kiyö igha,
“Nemanyirë igha,
nökörrë ghayö,
kwa nkoro nshiiya.
Kiyö nkyo këghërrë nkörëbhërrëyë okore otakaakora ëkëbhë,
ku bhuyö tintunirë ukuni omokari uyö hë.
7 Bhoono ni-igha ukyöri omokari uyö ku-mushaasha uwaaye.
Ibhurahimu uyö,
m-mörööti,
naraakosabhere obhe na öbhöhöru.
Kasi hano oraange ukumukyörya,
omanye obhoheene igha,
uwe noraakwe,
hamwë na abhantö abhaaho bhonswe igho.”
8 Mbe,
Abhimëërëki akabhooka nyinkyo shiri,
akabherekera abhaköri abha emeremo abhaaye bhonswe igho.
Akabhatëëbhya amangʼana ghayö ghonswe igho,
bhakoobhoha bhököngʼu!
9 Abhimëërëki akabherekera Ibhurahimu,
akamöbhöörya igha,
“Ne-ngʼana kë eno ötökörëëyë?
N-kë naakosarrya,
okohekera uwe okondeetera öni na abhantö abha obhokama ubhwane ëkëbhë ekenene kya keno?
Önkörëëyë amangʼana ghano ghatakaakörrwë na ömöntö.”
10 Abhimëërëki akaghëndërrya ököbhöörya Ibhurahimu igha,
“N-kë këghërrë ökörrë engʼana eno?”
11 Ibhurahimu akamohonshora igha,
“Naakörrë igho,
ko bhoora naarööshë igha,
ahasë hano,
taaho ömöntö ono akwighwera Waryobha hë.
Ku bhuyö,
nkoobhoha igha,
mokaanyitirë,
okore mogheghe mokaane.
12 Hamwë na ghayö ghonswe igho,
no-bhoheene igha,
m-mohara uwëëtö.
Keno kyaaghërrë akabha mokaane nokaanyoora taata nö-ömwë,
kasi nyakuwaabho n-wöndë.
13 Hano Waryobha yaankörrë mbe na oroghendo,
ukurwa yeeka ko-taata,
nkatëëbhya mokaane igha,
‘Kera ahasë hano toraahikenga,
ndakosabha oghambenga igha,
“Ono m-mura uwëëtö.”
’ ”
14 Mbe,
Abhimëërëki akahaana Ibhurahimu amangʼöndi,
sëmböri,
sengʼombe,
na abhaghorwa abha ikishaasha na abha ekekari,
akamöhönshökërya mokaaye Saara.
15 Ghwiki,
Abhimëërëki akatëëbhya Ibhurahimu igha,
“Maaha,
ikyaro keno kyonswe igho kërëngë mbere iyaaho,
ni-kyane.
Kaghi omenye ahasë hohonswe igho hano ukutuna.”
16 Hano akomara,
Abhimëërëki akatëëbhya Saara igha,
“Nhaayë mura uwëënyu,
amatöngörö agha seehera isya öbhöghöri ubhwa ëkëkwë ëkëmwë,
ukwörökya abhantö bhonswe igho bhano bharëngë hamwë na uwe igha,
toona obhosarya hë.
Omaahekaini igha,
toona isoro hë.”
17-18 Mbe,
ko bhoora Abhimëërëki yaarenga aghëghirë mokaa Ibhurahimu,
YEHOBHA Waryobha akamokora abhe umushigharu na mokaaye akamobhoha urwebhoro,
hamwë na abhaghorwa bhonswe igho abha ekekari abha yeeka waaye.
Mbe,
Ibhurahimu akasaasaama Waryobha,
Waryobha akamuhwënia ubhushigharu bhuyö,
mokaaye,
na abhaghorwa abhaaye bhonswe igho,
bhakabha na urwebhoro.