Okosemoka 19

Sodoma na Ghomora gherasikibhwa

Mbe, abhamaraika bhabhërë bhaara, bhakahika mu-mughi ughwa Sodoma ko-moghoroobha. Enkaagha iyö, Ruutu yaarenga aikaayë mu-kihiita ikya umughi ughwa Sodoma. Hano yaabharööshë, akeemoka, akaghya okobhaturungʼana, akabhuumara, ubhusyö bhokahika hansë ukwörökya igha, nabhasöökirë. 2 Akabhatëëbhya igha, “Abhanene abhaane, mosohe mu-nyumba iyaane, öni ömököri uwa emeremo uwëënyu. Mwisaabhe amaghörö, na moraare waane hano ubhutikö ubhwa reero. Isho nyinkyo shiri, moretanora möghëndërri na oroghendo urwënyu.”

Kasi, bho bhakamohonshora igha, “A a, bhëëtö nkö-bhööri hano toraaraare.” 3 Ruutu akaghëndërrya okobhasaasaama bhököngʼu, bhakakamba bhakaikërrya, bhakasoha waaye. Mbe, Ruutu akabhakorra inyangi, akabhakorra emekaate gheno ghetatöörrwë-mo ehamiira, akabhahaana, bhakarya.

4 Mbe, enkaagha eno waanyöörrë bhataraaraara, abhashaasha bhonswe igho ukurwa mbaara syonswe igho isya umughi ughwa Sodoma, abhamura na abhaghaaka igho, bhakanaarya inyumba iya Ruutu. 5 Bhakabherekera Ruutu, bhakabhöörya igha, “Uwe Ruutu! Abhashaasha bhano bhasöhirë waaho kono, hai bharëngë? Tabharishökya kebhara eno! Toratuna tobhakore abhakari.”

6 Ruutu akarishoka kebhara, akasengeka-ho ekesaku. 7 Akabhatëëbhya igha, “Abhahiiri abhaane, mutighe! Motakaakorra abhantö bhano, amangʼana amaghogho ghayö! 8 Maaha! Neena abhaisëkë bhabhërë sintindë. Mutighe mbarishökëri, mobhakore bhono mukutuna. Kasi, abhashaasha bhano, motakaabhakorra amaghogho ghoghonswe igho, ko bhoora abheene m-baghëni abhaane.”

9 Kasi bho bhakamohonshora igha, “Taturwera-ho! Uwe m-möghëndighëndi örë, törëngë uwa ikyaro ikyëtö keno hë, bhoono nkutuna örë igha, obhe umwahokania uwa amangʼana aghëëtö! Ntokokora bhoghogho, okokera bhono tokaakörëëyë abhaghëni abhaaho bhayö!” Bhakahunia Ruutu, hake bhasari ekesaku.

10 Mbe, abhamaraika bhayö, bhakeeghora ekesaku, bhakarambeka amabhoko aghaabho, bhakaruta Ruutu ukuusha mu-nyumba, bhakasiika-ho ekesaku. 11 Hano bhaamarrë, bhakahukurya abhantö bhayö bhonswe igho, abhake na abhanene. Ku bhuyö, tebhaatörrë ghwiki okomaaha ekesaku kiyö hë.

12 Mbe, abhamaraika bhayö, bhakabhöörya Ruutu igha, “Oona ömöntö wowonswe igho hano? Mbakaabha bhairu bhaaho, abhaana abhaaho abha ikishaasha bheena abha ekekari. Abhantö abhaaho bhano onabho mu-mughi mono, bharishöki bhöngö bharwe mu-mughi mono bhonswe igho! 13 Kora igho, ko bhoora ëbhëbhë ibhya abhantö abha umughi ghono, bhyaruhirë mbere iya YEHOBHA Waryobha. Kiyö nkyo këghërrë Waryobha, atötömirë tuushe ukusikya ahasë hano.”

14 Mbe, Ruutu akaghya ko-bhairu abhaaye, bhano bhaarenga bhaghambëëyë öbhökwë abhaisëkë abhaaye. Akabhatëëbhya igha, “Murwe mu-mughi mono bhöngö, ko bhoora YEHOBHA Waryobha, nkutuna arë asiki umughi ghono.” Kasi abhairu abhaaye bhayö, bhakamaaha igha nkokaarana arë.

15 Hano bhwaakëëyë nyinkyo, abhamaraika bhayö, bhakakangʼasërrya Ruutu igha, “Korra këmwë ogheghe mokaaho, na abhaisëkë abhaaho bhabhërë bhano, murwe mu-mughi mono, motakaasikibhwa-mo.”

16 Ruutu, akabha kya ono akwitëbhërrya, kasi abhamaraika bhayö bhaaghöötërrëëyë Ruutu okobhoko, mokaaye, hamwë na abhaisëkë abhaaye, bhakabharishökya ukurwa mu-mughi muyö, ko bhoora YEHOBHA Waryobha yaabhabhëëyë. 17 Hano bhaabharuusiri mu-mughi muyö, maraika ömwë akabhatëëbhya igha, “Mongʼose, okore mwihöni! Motakaamaaha nyuma, handë ukwimerra ahasë hohonswe igho mu-ribhate riyö. Mongʼosere mu-nguku, motakaasika.”

18 Ruutu akabhasaasaama igha, “A a, ti-igho hë abhanene abhaane! 19 Maaha! Mönsërëënëri öni ömököri uwa emeremo uwëënyu, mönkörëëyë ikyabhera bhököngʼu, mönhönëri. Kasi tentore okongʼosera mu-nguku, ko bhoora eera n-hare. Hano engʼanga eno eraannyoore ko-nshera ntaraahika iyö, ninkwa. 20 Maaha! Umughi omoke n-goora haara, tigha ngʼosere mu-mughi omoke ghuyö ghörëngë haangʼë hayö, okore honere-mo.”

21 Ömwë uwa abhamaraika bhayö, akamohonshora igha, “M-buuya, engʼana iyö yonswe ngikërëëyi. Tinsiki umughi ghuyö oghambirë. 22 Bhoono ngʼosera-mo bhöngö. Tenkore ryoryonswe reera, uwe otaraahika mu-mughi muyö.” Kiyö nkyo kyaaghërrë umughi ghuyö ghokabherekerwa igha, Sowari.

23 Enkaagha eno Ruutu yaahikirë mu-mughi ughwa Sowari, iryobha ryaarenga rëtörrë. 24 Kamwë igho, YEHOBHA Waryobha akaharaatökya omorro ughwa ubhurutu ömörörö kai, ghokaghwera imighi ighya Sodoma na Ghomora. 25 Akasikya imighi ghiyö, na ribhate ryonswe igho, na abhantö bhonswe igho, na ëmëtë na ëmëröngö ghyonswe igho ku-kyaro kiyö.

26 Hano imighi ghiyö ghyaahyanga, mokaa Ruutu yaarwanga nyuma Ruutu. Akaisyörya okomaaha imighi ghiyö. Bhuyö yaaisyörri igho, akabha intimö iya ömöönyö.

27 Mbe, hano bhwaakëëyë nyinkyo, Ibhurahimu akaghya ahasë haara yaarenga aimërëëyë-ho na YEHOBHA Waryobha. 28 Hano yaahikirë-ho, akarekera amaiso ukobhata Sodoma na Ghomora, na ribhate ryonswe igho. Akamaaha ughuryöki kya ughwa öghöbhëri.

29 Kasi enkaagha eno Waryobha yaasambanga imighi ighya mu-ribhate, yaahiitirë amasabhi agha Ibhurahimu. Ku bhuyö, akaruusya Ruutu mo-ngʼanga iya ukusikibhwa ukwa imighi gheno Ruutu yaamënyirë-mo.

Abhaisëkë abha Ruutu bhararaara na suwaabho

30 Ruutu akoobhoha okomenya Sowari, ku bhuyö akatiira mu-singuku hamwë na abhaisëkë abhaaye. Bhakamenya mu-risana.

31 Urusikö nyabhorebhe, mwisëkë uwaaye ömöntö mökörö akatëëbhya omoke uwaaye igha, “Taata ono yaaghötirë. Na taaho umushaasha ono araatoraare, kya igho amangʼana gharë ko-kebhara kyonswe igho. 32 Bhoono, tomohaane amarwa agha sezabhibhu aghootwe, toraare nawe, okore urwebhoro urwëtö röghëndërri okobha-ho, okohetera ko-taata.”

33 Mbe, ubhutikö bhuyöbhuyö, bhakahaana suwaabho amarwa agha sezabhibhu, akaghootwa, mwisëkë uwaaye omonene akaraara nawe. Suwaabho tiyaamanyirë bhono umwisëkë uyö yaasöhirë, na bhono yaarishökirë.

34 Hano bhwaakëëyë nyinkyo iyaako, umwisëkë omonene akatëëbhya omoke uwaaye igha, “Öni bhutikö naarë ndaayë na taata. Bhoono! Reero honswe tomohaane amarwa agha sezabhibhu, kora uwe wonswe oraare nawe. Ho bhonswe igho toraanyoore abhaana, na urwebhoro urwëtö röghëndërri okobha-ho okohetera ko-taata.”

35 Mbe, bhakahaana ghwiki suwaabho amarwa agha sezabhibhu ubhutikö bhuyö, umwisëkë omoke wonswe akaraara nawe. Suwaabho ghwiki tiyaamanyirë bhono umwisëkë uyö yaasöhirë, na bhono yaarishökirë.

36 Ku bhuyö, abhaisëkë abha Ruutu bhonswe igho bhabhërë, bhakaimökya senda okohetera ku-suwaabho. 37 Mbe, umwisëkë ömöntö mökörö akeebhora omoona uwa ikishaasha, akamoroka igha, Mowabhu. Uyö we umwibhöri uwa Abhamowabhu. 38 Mwisëkë uwaaye omoke, wonswe akeebhora omoona uwa ikishaasha, akamoroka igha, Bhenami. Uyö we suwaabho Abhaamööni.