Waryobha ghwiki arabhooshokera Ibhurahimu
18
Urusikö nyabhorebhe,
enkaagha iya orooha urwa omobhasö,
YEHOBHA Waryobha yaabhööshökëëyë Ibhurahimu ahasë hano habherekerwanga igha,
nyamëtë emenene ighya Mamure.
Enkaagha iyö,
Ibhurahimu yaarenga aikaayë mo-kesaku ikya righutu iryaye.
2 Hano Ibhurahimu yaaghörrökëri amaiso,
akamaaha abhantö bhatatö bhaimërëëyë mbere.
Ni-igho yaabharööshë igho,
akakenya ukurwa mo-kesaku ikya righutu hayö,
akaghya okobhaturungʼana.
Hano yaabhahëkërëëyë,
akatema hansë ibhiru,
akahiinya ubhusyö hansë ukwörökya bhono abhasöökirë,
3 akabhatëëbhya igha,
“Ëë abhanene abhaane!
Öni nö-mököri uwa emeremo uwëënyu ndë!
Ndabhasaasaama motakaaheterania igho motasöhirë ka waane.
4 Ndasabha moghanye moreeterwe amanshë agha ökööghya amaghörö,
momare mumuunye mu-kiiriiri ikya ömötë ghono.
5 Montanaahirë,
öni ömököri uwa emeremo uwëënyu,
ku bhuyö moghanye mbakorre ibhyakorya ebheke igho,
okore moraaghere munyoore singuru isya ököghëndërrya na oroghendo urwënyu.”
Bhakamohonshora igha,
“M-bwa heene!
Mbe,
otakora kya bhuyö oghambirë.”
6 Ku bhuyö,
Ibhurahimu akasoha mu-righutu bhöngöbhöngö,
akatëëbhya mokaaye Saara igha,
“Ghegha ebherengo bhitatö ibhya obhose ubhunyike obhokonye,
okorre abhaghëni emekaate bhöngöbhöngö.”
7 Hano Ibhurahimu yaamarrë,
akakenya bhöngöbhöngö ukughya mwi-hisho irya sengʼombe,
akashaaghora-mo rikööhë imwë rinöru,
akahaana omoghorwa uwaaye.
Omoghorwa uyö,
akangoherrya okoreghoogha na ökösëëmya ibhyakorya.
8 Hano ibhyakorya bhyaabhaayë,
Ibhurahimu akaghegha urughuta urwa amabheere agha engʼombe,
amabheere,
na inyama,
akaikarrya abhaghëni bhayö.
Ibhurahimu akaimerra haangʼë nabho mö-mötë hayö,
enkaagha eno bhaaryanga.
9 Abhaghëni bhayö,
bhakabhöörya Ibhurahimu igha,
“Saara mokaaho,
hai arëngë?”
Akabhahonshora igha,
“Mwi-ghutu arë.”
10 Ömwë uwa abhaghëni bhayö,
akaghamba igha,
“Obhoheene,
nindikyora mooka enkaagha kya eno,
enkaagha iyö,
nurinyoora Saara aana omoona uwa ikishaasha.”
Saara yaaighuurë amangʼana ghayö,
ko bhoora haangʼë mwi-ghutu,
nyuma iya ekesaku hayö yaarë.
11 Ibhurahimu bhaana Saara waanyöörrë bhaaghota.
Saara yaarenga angʼatëkirë.
12 Ku bhuyö,
Saara akaseka,
akaighambera mo-motwe ughwaye igha,
“Ndarra naakunguha!
Na mushaasha uwaane wonswe mbe yaaghota.
Mö-bhöntö bhökörö mono,
nentora bhoono ukushomerwa na amangʼana agha umushaasha?”
13 Mbe,
YEHOBHA Waryobha akabhöörya Ibhurahimu igha,
“N-kwakë Saara asëkirë,
eno araibhöörya igha,
‘M-maheene neneebhora omoona,
bhuyö naakunguha igho?’
14 Eeho engʼana yoyonswe igho ënköngʼu eno ekotaamya YEHOBHA Waryobha?
Nindikyora mooka enkaagha kya eno.
Enkaagha iyö nurinyoora Saara aana omoona uwa ikishaasha.”
15 Kasi Saara akoobhoha,
akakaana igha,
“YEHOBHA Waryobha,
öni tënsëkirë hë!”
Omonene Waryobha akamötëëbhya igha,
“Kora nokaanga,
kasi nösëkirë.”
Ibhurahimu arasabhera abhantö abha Sodoma
16 Hano abhantö bhayö bhaamarrë okorya,
bhakatanora ukughya Sodoma.
Ibhurahimu akabhahereekerra igho okohekera ahasë hano bhaatoranga okomaaha umughi ughwa Sodoma.
17 Mbe,
YEHOBHA Waryobha akaitegherra igha,
“Bhoono n-kwakë mbise Ibhurahimu engʼana eno nkutuna okokora?
18 We araabhe umwibhöri uwa abhantö abhaaru,
abha ikyaro ikya obhotoro.
Kora nendengʼoora abhantö abha ibhyaro bhyonswe igho okohetera ko-we.
19 Mmarrë ukumwahora igha,
araghërri abhaana abhaaye,
na urwebhoro urwaye bhanyighwerenga öni YEHOBHA Waryobha,
ko okokora amangʼana agha heene na okoghoota amaraghërryö aghaane.
Hano bharaakore igho,
na öni wonswe nendaakorre Ibhurahimu kya bhono naamoraghaini.”
20 Mbe,
YEHOBHA Waryobha akatëëbhya Ibhurahimu igha,
“Nighuurë ikikuuro ekenene ikya abhantö ko amangʼana agha mu-mighi ighya Sodoma na Ghomora.
Ëbhëbhë ibhyabho,
bhyaruhirë bhököngʼu!
21 Mbe bhoono,
tigha ngʼaraare ngende mmaahe nyoore ëbhëbhë bheno bhakokora bherarengʼaana na ikikuuro keno kyanhëkërëëyë.
Nyoore etarëngë igho,
honswe nendaamanye.”
22 Mbe,
abhantö abhabhërë bhaara,
bhakaghoota-ko enshera iya ukughya Sodoma,
kasi Ibhurahimu akatighara aimërëëyë na YEHOBHA Waryobha.
23 Ho,
bhoono Ibhurahimu yaamusughutarëëyë,
akamöbhöörya igha,
“M-maheene igha,
noraasiki abhantö abha heene hamwë na abhasarya?
24 Hano oraanyoore mu-mughi bhaamo abhantö abha heene merongo etaano,
m-maheene igha noraaghusiki,
kora tughutighe ko okoghera iya abhantö abha heene merongo etaano bhayö bhaamo?
25 A a!
Otakaakora igho.
Hano oraaite ömöntö uwa heene hamwë na omosarya,
hayö nkokora örë ömöntö uwa heene abhe kya omosarya.
Ti-igho ekobha hë.
Uwe umwahokania uwa ekebhara kyonswe igho,
okore engʼana iya heene!”
26 YEHOBHA Waryobha akamohonshora igha,
“Hano ndaanyoore abhantö abha heene merongo etaano mu-mughi ughwa Sodoma,
nendaaghutighe,
tingusiki hë,
ko okoghera iya abhantö bhayö!”
27 Ibhurahimu akaghamba ghwiki igha,
“Nokaanyoora igha öni nu-rutu ndë,
na ni-riibhu igho ndëngë,
kasi ndasabha nshumaashe na uwe Omonene uwaane.
28 Hano ho oraanyoore bhaamo abhantö abha heene m-merongo ene na bhataano igho,
nusikya umughi ghuyö,
ko bhoora igha abhantö bhataano bhabhöörë-ho ko-merongo etaano bhayö?”
YEHOBHA Waryobha akamohonshora igha,
“A a!
Tinsiki umughi ghuyö,
hano ndaanyoore bhaamo abhantö abha heene merongo ene na bhataano.”
29 Ibhurahimu akaghëndërrya ghwiki ökömöbhöörya igha,
“Hano ho oraanyoore-mo abhantö abha heene m-merongo ene igho?”
We akamohonshora igha,
“Tinsiki umughi ghuyö hë,
ko okoghera iya abhantö abha heene merongo ene bhayö.”
30 Ibhurahimu akaghamba ghwiki igha,
“Ëë Omonene,
ndakosabha otakaarerra,
kasi unyikërërri ghwiki.
Hano ho oraanyoore igha,
abhantö abha heene m-merongo etatö igho bhaamo?”
YEHOBHA Waryobha akamohonshora igha,
“Hano ndaanyoore-mo abhantö abha heene m-merongo etatö,
tingusiki hë.”
31 Ibhurahimu akaghamba igha,
“Nshumaashirë na Omonene uwaane kwa obhokarë.
Bhoono,
hano ho oraanyoore abhantö abha heene m-merongo ëbhërë igho?”
YEHOBHA Waryobha akamohonshora igha,
“Ko okoghera iya abhantö abha heene merongo ëbhërë,
tingusiki hë.”
32 Ibhurahimu akakamba akaghamba igha,
“Omonene uwaane,
nkaakosaasaama bhököngʼu,
tigha nköbhööri kamwë igho aheene igha,
hano ho oraanyoore-mo abhantö abha heene ni-kömi igho bhaamo?”
YEHOBHA Waryobha akamohonshora igha,
“Ko okoghera iya abhantö abha heene ikömi,
tinsiki umughi ghuyö hë.”
33 Hano YEHOBHA Waryobha yaamarrë kushumaasha na Ibhurahimu,
akatanora.
Ibhurahimu wonswe,
akakyora waaye ka.