Abhuramu arahaanwa ekemanyërryö ikya imuuma
17
Mbe,
hano Abhuramu yaarenga na imyoka merongo kenda na kenda,
YEHOBHA Waryobha akamobhooshokera,
akamötëëbhya igha,
“Nö-öni Waryobha uwa obhotoro bhwonswe igho.
Ghoota amëëghyö aghaane,
na otakaabha na isoro.
2 Na öni nendaakore imuuma na uwe,
kora nendaaruhi bhököngʼu urwebhoro urwaho.”
3 Mbe,
Abhuramu akabhuumara,
akahikya ubhusyö hansë,
akasengerra Waryobha.
Waryobha akamötëëbhya igha,
4 “Eno yo imuuma iyaane öni na uwe igha,
bhoono uwe noraabhe umwibhöri uwa abhantö abha ibhyaro ibhyaru.
5 Ukusimirya reero tobherekerwenga ghwiki igha Abhuramu,
a kasi noraabherekerwenga igha,
Ibhurahimu,
b ko bhoora nkökörrë obhe ömökörö uwa abhantö abha ibhyaro ibhyaru.
6 Nendaakokore obhe na urwebhoro urwaru bhököngʼu,
na ibhyaro ibhyaru mbiryebhoka ukurwa mu-rwebhoro urwaho,
kora abhakama bhonswe mbaryebhoka-mo.
7 “Nendaakore imuuma iyaane enaghe ku-uwe,
na ku-rwebhoro urwaho,
ebhe imuuma iya amakora ghonswe igho.
Nendaabhe Waryobha uwaaho na uwa urwebhoro urwaho.
8 Nendaakohaane uwe na urwebhoro urwaho,
ikyaro ikya Kaanaani kyonswe igho keno ömënyirë-mo bhoono igho kya ömöghëni,
kebhe ikyënyukyënyu amakora ghonswe igho.
Kora nendaabhe Waryobha uwa abheebhorwa abhaaho.”
9 Hano Waryobha yaamarrë,
akatëëbhya Ibhurahimu igha,
“Uwe,
abheebhorwa abhaaho,
hamwë na urwebhoro urwabho rwonswe igho,
ni-igha monaghi imuuma iyaane.
10 Mbe,
kera umushaasha mö-bhëënyu,
ni-igha asaarwe.
Iyö yo imuuma iyaane,
eno nkutuna moghenaghi uwe na urwebhoro urwaho.
11 Mosaarwenga.
Na engʼana iyö,
yo eraabhe ekemanyërryö ikya imuuma iyaane,
öni na bhëënyu.
12 Mosaarenga abhaana abha ikishaasha urusikö urwa monaane,
amakora aghaaho ghonswe igho.
Mosaarenga kora abhaghorwa bhano bhakwebhorrwa wëënyu ka,
na bhano bhaaghorwa seehera ukurwa ko bhaghëni bhonswe ni-igha bhasaarwe.
13 Kera umushaasha ono yeebhorrwa wëënyu ka,
handë ono yaaghorwa seehera isyaho,
ni-igha asaarwe.
Kiyö nkyo keraabhe ekemanyërryö kö-mëbhërë ighyënyu,
ikya imuuma iya amakora ghonswe igho.
14 Kera umushaasha ono atasaarwe,
naraahorwe ukurwa mo-bhantö abhaaye,
ko bhoora nkunyoora arë asarri imuuma iyaane.”
Ibhurahimu araraghanibhwa ukunyoora omoona uwa ikishaasha
15 Hano ghayö ghaahööyë,
Waryobha akatëëbhya Ibhurahimu igha,
“Ukusimirya reero,
Sarai mokaaho,
otakaamobherekeranga ghwiki igha Sarai.
Iriina iryaye bhoono ni-igha Saara.c
16 Nendaamongʼoore,
kora naraakwebhorre omoona uwa ikishaasha.
Nendaangʼoore mokaaho uyö abhe umwibhöri uwa abhantö abha ibhyaro ibhyaru.
Abhakama abha ibhyaro,
mbaryebhoka ukurwa mu-rwebhoro urwaye.”
17 Mbe,
Ibhurahimu akabhuumara,
akahikya ubhusyö hansë,
akasengerra Waryobha.
Kasi akaseka na ukwighambera mo-motwe ughwaye igha,
“Ömöntö uwa imyoka righana,
natora ukunyoora omoona?
Na Saara uwa imyoka merongo kenda,
natora ukwebhora?”
18 Mbe,
Ibhurahimu akatëëbhya Waryobha igha,
“Ekaabhaayë bhuuya wikërri,
Ishimaëri anyoore obhongʼoore ubhwaho.”
19 Waryobha akamohonshora igha,
“Teebhe igho hë!
Kasi mokaaho Saara,
naraakwebhorre omoona uwa ikishaasha,
na uwe oremoroka igha,
Isaaka.
d Öni nendekora imuuma iyaane ebhe iya amakora ghonswe igho,
ko okoghera iyaaye na urwebhoro urwaye.
20 Na ko amangʼana agha Ishimaëri,
nighuurë bhuyö onsabhirë.
Kora wonswe,
nendaamongʼoore,
nendaamokore abhe na urwebhoro urwaru,
kora nendaarwaruhi bhököngʼu.
Naraabhe umwibhöri uwa abhatöngi ikömi na bhabhërë,
e na öni nendaamokore abhe umwibhöri uwa abhantö abhaaru.
21 Kasi imuuma iyaane,
nku-Isaaka eraabhe,
ono Saara arikwebhorra mooka,
ko-nkaagha kya eno.”
22 Mbe,
hano Waryobha yaamarrë ukushumaasha na Ibhurahimu,
akamutigha hayö.
23 Mbe,
urusikö ruyöruyö,
ndo Ibhurahimu yaaghöötirë-ko omoona uwaaye Ishimaëri,
na bhonswe igho bhano bhaaibhörëëywë ka waaye hayö,
hamwë na bhano bhaaghörrwë ko seehera isyaye.
Akasaara kera umushaasha uwa waaye ka,
kya bhono Waryobha yaamoraghërrëëyi.
24 Hano Ibhurahimu yaasaarrwë hamwë na omoona uwaaye Ishimaëri,
yaarë na imyoka merongo kenda na kenda,
25 na Ishimaëri yaarë na imyoka ikömi na etatö.
26 Ibhurahimu na Ishimaëri,
ndu-sikö römwë bhaasaarrwë,
27 hamwë na abhashaasha bhonswe igho bhano bhaaibhörëëywë waaye kuyö,
na bhano bhaarenga bhaghörrwë ko seehera isyaye ukurwa ko bhaghëni.