Sarai na Hajiri
16
1-3 Hano Abhuramu yaamarrë imyoka ikömi ku-kyaro ikya Kaanaani,
waanyöörrë Sarai mokaaye,
ataraamwebhorra omoona.
Kasi yaarenga na omoghorwa uwa ekekari Umumiisiri.
Omoghorwa uyö yaabherekerwanga igha Hajiri.
Mbe,
Sarai akatëëbhya Abhuramu igha,
“Nomanyirë igha,
YEHOBHA Waryobha yannyima ukwebhora.
Bhoono ndakosabha igha,
ogheghe omoghorwa uwaane uyö Hajiri,
hanga nkanyoora-ko abhaana okohetera ko-we.”
Abhuramu akaikërrya amangʼana ghayö Sarai yaamötëëbhëri.
Mbe,
Sarai akahaana Abhuramu omoghorwa uwaaye uwa ekekari,
Umumiisiri ono yaabherekerwanga igha Hajiri.
4 Mbe,
Abhuramu akaraara na Hajiri,
akanyoora enda.
Hano Hajiri yaamanyirë igha,
ne-nda arë,
akasimya okosera umukungu Sarai.
5 Ku bhuyö,
Sarai akatëëbhya Abhuramu igha,
“Amaghogho ghano ghakunnyoora,
n-ko okoghera iya uwe.
Naakohaana omoghorwa uwaane,
kasi bhoono arööshë igha ne-nda arë,
asimiri okonsera.
YEHOBHA Waryobha atobhotorre ikiina öni na uwe!”
6 Mbe,
Abhuramu akamohonshora igha,
“Omoghorwa uwaaho mo-mabhoko aghaaho arë.
Mokorre bhono uwe umwene ukutuna.”
Mbe,
Sarai akasimya okoteesa Hajiri,
ekahekera-ho enkaagha,
Hajiri akangʼosa.
Ukwebhorwa ukwa Ishimaëri
7 Mbe,
maraika uwa YEHOBHA Waryobha akamaaha Hajiri ku-riköngö haangʼë na eseeka iya amanshë.
Eseeka iyö yaarenga haangʼë na enshera eno ekobhata Shuuri.
8 Maraika akamöbhöörya igha,
“Hajiri,
omoghorwa uwa Sarai!
Hai ukurwa na hai ukughya?”
Hajiri akamohonshora igha,
“Umukungu Sarai we nkongʼosa.”
9 Maraika uwa YEHOBHA Waryobha akamötëëbhya igha,
“Kyora ku-mukungu Sarai,
obhenga oramwighwera.”
10 Maraika uyö,
akaghëndërrya ökömötëëbhya igha,
“Nendaaruhi bhököngʼu urwebhoro urwaho,
kora terotorwe okobharwa hë.”
11 Akaghëndërrya ökömötëëbhya igha,
“Uwe bhoono igho,
ne-nda örë,
noreebhore omoona uwa ikishaasha.
Omoroke igha Ishimaëri,
a ko bhoora,
YEHOBHA Waryobha aighuurë ikikuuro ikya inyanko iyaaho.
12 Ishimaëri uyö,
narebha kya itikërë iya mwi-sisib ko-bhantö.
Nariitananga na kera ömöntö,
na abhantö bhonswe igho mbarimwitanianga.
Narebheehananga na bhahiiri abhaaye bhonswe igho.”
13 Mbe,
Hajiri akaitegherra na ukwighambera mo-motwe ughwaye igha,
“M-maheene ndööshë hano ono akommaaha!”
Ku bhuyö akabherekera YEHOBHA Waryobha uyö yaashumaashirë nawe,
igha,
“Uwe nu-uwe Waryobha ono okomaaha.”
14 Kiyö nkyo kyaaghërrë eseeka iyö ekabherekerwa igha,
Bhëëri-rahai-röi.
c Eseeka iyö,
nërëngë ghatëghatë iya umughi ughwa Kadëshi na Bhërëdi.