Waryobha arakora imuuma na Abhuramu
15
Hano amangʼana ghayö ghaahööyë,
YEHOBHA Waryobha akahaana Abhuramu amamaaho,
akamötëëbhya igha,
“Ë Abhuramu!
Otakoobhoha!
Öni nö-öni ingubha iyaaho,
kora nendaakutuhe ituho enene bhököngʼu.”
2 Kasi Abhuramu akamohonshora igha,
“Ëë YEHOBHA Waryobha,
Omonene uwaane,
ne-ngʼana kë oraankorre,
rëndë mbe öni nendaakwe igho ntaana omoona!
Ëriyëzëëri Omodamasiko,
igha we arerya umwandö ughwa ëbhëntö ibhyane.”
3 Abhuramu akaghëndërrya okoghamba igha,
“Waanyima urwebhoro,
ku bhuyö,
omoghorwa ono yaaibhorrwa waane kono,
we arerya umwandö ughwa ëbhëntö ibhyane!”
4 Mbe,
YEHOBHA Waryobha akamohonshora igha,
“Ëriyëzëëri uyö,
taarerya umwandö ughwa ëbhëntö ibhyaho hë,
kasi no-moona uwaaho uwa ukwebhora,
uyö we arerya umwandö ughwaho.”
5 Ku bhuyö,
YEHOBHA Waryobha akarishökya Abhuramu kebhara,
akamötëëbhya igha,
“Gharamera ighörö!
Obhare sinyota siyö,
nyoore heene notora okosebhara.”
Ghwiki akamötëëbhya igha,
“Ni-igho urwebhoro urwaho ruryaruha!”
6 Abhuramu akakumya YEHOBHA Waryobha kiyö nkyo kyaaghërrë Waryobha akamobhara igha wa heene.
7 Mbe,
YEHOBHA Waryobha akamötëëbhya igha,
“Öni nö-öni YEHOBHA Waryobha!
Nö-öni naakuruusiri mu-mughi ughwa Uru,
mu-kyaro ikya Abhakaridaayo,
okore nkohaane ikyaro keno kebhe umwandö ughwaho.”
8 Kasi Abhuramu akamöbhöörya igha,
“Ëë YEHOBHA Waryobha Omonene uwaane,
iyakë ndaakore mmanye igha,
ikyaro keno nkeraabhe ikyane?”
9 YEHOBHA Waryobha akamohonshora igha,
“Ndeetera rikööhë irya imyoka etatö,
ëmböri insubhëëni iya imyoka etatö,
righuruki irya imyoka etatö,
ikighuuti na iryana irya ikighuuti.”
10 Mbe,
Abhuramu akamoreetera bhiyö bhyonswe igho.
Akabheghoogha,
akabhaarora kera itugho amabhaara abhërë,
akamaaherrania amabhaarabhaara ghayö,
kasi ibhinyönyi,
tiyabhebhaarööyë hë.
11 Hano amatöönyi ghaaikaranga ku-bhihundughu bhiyö,
Abhuramu akabha araghatambya.
12 Hano iryobha ryaaghyanga koghwa,
Abhuramu akaritoherwa na seetero,
akaihiribhwa.
Kamwë igho ikisuntë kekakura,
kekamohahya bhököngʼu.
13 Ho yaamarrë,
YEHOBHA Waryobha akamötëëbhya igha,
“Uwe,
omanye obhoheene igha,
urwebhoro urwaho,
ndorebha öröghëni ku-kyaro keno ketarëngë ikyabho.
Mbarebha abhaghorwa kora mbarinyoora inyaanyi ku-ribhagha irya imyoka amaghana ane.a
14 Kasi nendebhotorra ikiina abhantö abha ikyaro kiyö kerebhakora abhaghorwa abhaabho.
Mbarirwa muyö bhaana ëbhëntö ibhyaru.
15 Kasi uwe,
nuriikara imyoka imyaru.
Nurikwa oona omorembe,
na norebheekwa bhuuya.
16 Rekora irya kane ukurwa ku-uwe,
ndiriisha ku-kyaro keno,
ko bhoora hayö,
ho urinyoora obhoghogho ubhwa Abhaamööri ku-kyaro kono,
bhohekeraini.”
17 Hano iryobha ryaaghööyë,
kekabha ikisuntë,
kamwë igho ribhëri irya iryöki,
na amaghenga agha omorro ghono ghwookanga,
bhekeebhoka,
bhekaheta ghatëghatë iya imyaho ighya sinyama seera.
18 YEHOBHA Waryobha akakora imuuma na Abhuramu urusikö ruyö,
akaghamba igha,
“Nhaayë urwebhoro urwaho ikyaro keno,
ukusimirya ko-mooro ughwa Miisiri,
okohekera ko-mooro omonene ughwa Furati.
19 Mbahaayë ibhyaro bheno bhamënyirë-mo Abhakeeni,
Abhakënizi,
na Abhakadimööni,
20 bheena ibhya Abhahiti,
Abhapërizi,
Abharefayi,
21 bheena ibhya Abhaamööri,
Abhakaanaani,
Abhaghirighaashi,
na Abhayëbhuusi.”