Abhuramu arahönia Ruutu
14
Ko-nkaagha iyö,
Amuraferi omokama uwa Shinari,
a Aryoko omokama uwa Erasari,
Kedoriraoma omokama uwa Eramu,
na Tidari omokama uwa Ghoyimu,
2 mbe,
bhonswe igho bhayö,
kö-bhömwë ubhwabho,
bhakaghya ukwitana riihë na Bhera,
omokama uwa Sodoma,
Bhirisha omokama uwa Ghomora,
Shinabhu omokama uwa Adima,
Shëmëbhëri omokama uwa Sebhoyimu na omokama uwa Bhera.
Iriina iryëndë irya Bhera ndyo Sowari.
3-4 Ku-ribhagha irya imyoka ikömi na ëbhërë,
abhakama bhataano bhayö,
mbaaighweranga omokama Kedoriraoma.
Kasi,
ko-mooka ughwa ikömi na katatö,
bhakateeya.
Bhakakoma hamwë abhasirikare abhaabho,
bhakasoha mu-ribhate reno ryaabherekerwanga igha,
Sidimu.
Ensonga iya iriina riyö igha Sidimu,
ni-igha,
“Inyansha iya Ömöönyö.”
5 Ko-mooka ughwa ikömi na kane,
omokama Kedoriraoma,
hamwë na abhakama bharikyaye bhayö yaaghootaini nabho,
bhakaghya okokora riihë na bhakabhaaha Abharefayi abha umughi ughwa Asitaröti-karinayimu,
Abhazuzi abha mu-mughi ughwa Haamu,
na Abhayemi abha mu-mughi ughwa Shawe-kiriatayimu,
6 na Abhahöri abha mu-singuku isya Sëiri.
Bhakabharughya okohekera Ëri-parani,
haangʼë na ku-riköngö.
7 Ho bhamarrë,
bhakakyora,
bhakaghya Ëni-misifati,
iriina iryëndë ni-igha Kadëshi,
bhakabhaaha Abhaamërëki bhonswe igho ku-kyaro ikyabho,
hamwë na Abhaamööri,
bhano bhaamënyirë Hasasöni-tamaari.
8 Mbe,
hayö bhoono omokama uwa Sodoma,
omokama uwa Ghomora,
omokama uwa Adima,
omokama uwa Sebhoyimu,
na omokama uwa Bhera,
iriina iryëndë ni-igha Sowari,
bhaaghëëyë ökösëëmya riihë mu-ribhate irya Sidimu.
9 Bhaasëëmëri riihë riyö,
okore bhaitane na omokama Kedoriraoma uwa Eramu,
na Tidari omokama uwa Ghoyimu,
na Amuraferi omokama uwa Shinari,
na Aryoko omokama uwa Erasari.
Abhakama bhane,
bhakaitanibhwa na abhakama bhataano.
10 Sinsikö siyö,
ribhate irya Sidimu ryaarenga reromaanirë amarooma agha eraami.
Mbe,
abhakama abha Sodoma na Ghomora bhakakenya.
Abhandë bhakaghwa mo-marooma ghayö,
na abhandë bhakangʼosera mu-singuku.
11 Mbe,
abhakama bhane bhano bhaabhaahirë,
bhakaghegha ëbhëntö na ibhyakorya bhyonswe igho,
ibhya Sodoma na Ghomora,
bhakaghya.
12 Ruutu,
omoona uwa mumura uwaabho Abhuramu,
yaamënyirë Sodoma hayö.
Kora wonswe akagheghwa,
hamwë na ëbhëntö ibhyaye bhyonswe igho.
13 Ömöntö ömwë akaterroka,
akaghya akatëëbhya Abhuramu Umwëbhuraania amangʼana ghayö.
Ko-nkaagha iyö,
Abhuramu yaamënyirë haangʼë na ëmëtë ighya imyarööni ighya Mamure,
Umwamööri.
Mamure uyö,
hamwë na abhamura abhaabho,
bhaabho Ëshiköri na Anëri,
bhonswe igho bhayö bhaarenga bharëëyë imuuma na Abhuramu.
14 Hano Abhuramu yaaighuurë igha,
omoona uwa mumura uwaabho,
aghëghirwë këghötërëëyë,
akaghöötya abhaitani abhaaye ibhyöghë,
abhantö amaghana atatö na ikömi na monaane,
bhano bhaaibhorrwa waaye kuyö.
Hano yaamarrë,
akarwa nyuma abhabhisa bhayö,
okohekera mu-mughi ughwa Daani.
15 Hano ubhutikö bhwaahikirë,
Abhuramu akatwena abhantö abhaaye ko amakomo,
okore bharööni abhabhisa abhaabho.
Bhakabhaitania,
bhakabhakera,
kora bhakabharughya okohekera mu-mughi ughwa Hobha,
ghöösi iya Damasiko.
16 Akakyörya ëbhëntö bhyonswe igho,
na Ruutu omoona uwa mura uwaabho na ëbhëntö ibhyaye,
hamwë na abhakari na abhantö abhandë.
Mërikizëdëki arangʼoora Abhuramu
17 Hano Abhuramu yaakyörrë ukurwa ukwitania omokama Kedoriraoma hamwë na abhakama bharikyaye,
omokama uwa Sodoma akamuturungʼana mu-ribhate irya Shawe.
Riyö ndyo ryaarë Ribhate irya Omokama.
18 Mërikizëdëki omokama uwa Sarëëmu,
akareeta emekaate na amarwa agha sezabhibhu.
Omokama uwa Sarëëmu uyö m-mösëngëri uwa Waryobha ono arëngë ighörö bhököngʼu yaarë.
19 Akangʼoora Abhuramu eno araghamba igha,
“Waryobha ono arëngë ighörö bhököngʼu,
ömöbhömbi uwa ighörö iyö na ekebhara,
akongʼoore!
20 Atöönibhwi Waryobha ono arëngë ighörö bhököngʼu,
ono atöörrë mo-mabhoko aghaaho,
abhabhisa abhaaho!”
Hano akomara,
Abhuramu akamohaana ikitweno ikya ikömi,
kö ëbhëntö bhyonswe igho bheno bhaanyöörrë ukurwa ku-riihë.
21 Omokama uwa Sodoma akatëëbhya Abhuramu igha,
“Ngʼaana abhantö abhaane,
kasi ëbhëntö ibhyëndë bhyonswe igho,
ghegha uwe.”
22 Kasi Abhuramu akamötëëbhya igha,
“Ndatyana mbere iya YEHOBHA Waryobha ono arëngë ighörö bhököngʼu,
ömöbhömbi uwa mu-ryobha na ekebhara,
23 igha,
tengeghe urushë handë siinuugha isya okobhohera ebheraatö,
kora ëkëntö ikyaho kyokyonswe igho hë,
utakaasha ukwihasha igha,
‘Nö-öni naamëhya Abhuramu.’
24 Tengeghe ëkëntö kyokyonswe igho hë,
ukutigha bheera ibhyene igho abhamura abhaane bhaarëëyë,
na abhantö bhano bhaaghëëyë hamwë na öni mu-riihë,
bhayö bhahaanwe ehoorohooro eno ebhaingʼarëëyi.
Abhantö bhayö m-baabho Anëri,
Ëshiköri,
na Mamure abheene igho.”