13
Ku bhuyö,
Abhuramu akarwa Miisiri akaghya Nëghëbhu,
hamwë na mokaaye,
na ëbhëntö ibhyaye bhyonswe igho bheno yaarë nabhyo,
Ruutu wonswe akahinana nawe.
Abhuramu na Ruutu bharaahokana
2 Ko-nkaagha iyö,
Abhuramu m-mwamë yaarë bhököngʼu,
uwa situgho hamwë na ebheghera ibhya esahaabhu,
na ibhya seehera.
3 Ho yaamarrë akarwa Nëghëbhu hayö,
akabha arangʼaanyangʼaanya igho ukughya umughi ughwa Bhëëtëëri,
akakamba akahika ahasë hano yaarenga atöörrë-ho righutu iryaye ekembere,
ghatëghatë iya Bhëëtëëri na Ai.
4 Ahasë hayöhayö,
ho ekembere yaahaghaashirë-ho riighyö irya amaghena,
kora akasaasaamera-ho YEHOBHA Waryobha.
5 Mbe,
Ruutu ono yaarë ko-roghendo hamwë na Abhuramu,
umwene wonswe yaarë na amahisho amanene agha amangʼöndi,
sëmböri,
sengʼombe,
na amaghutu amaaru.
6 Situgho isyabho ni-nsharu bhököngʼu syaarë,
ku bhuyö ikyaro kiyö,
tekyaisirë Abhuramu na Ruutu okomenya hamwë hë.
7 Ku bhuyö,
abharëësya abha Abhuramu na abha Ruutu bhakabheehana.
Na ku-ribhagha riyö,
Abhakaanaani bheena Abhapërizi,
mbo bhaamënyirë ku-kyaro kiyö.
8 Mbe,
Abhuramu akatëëbhya Ruutu igha,
“Totakaabheehana öni na uwe,
handë abharëësya abhaane bheena abhaaho,
ko bhoora bhëëtö m-bamwë törë.
9 Tamaaha ikyaro keno kyonswe igho,
kiyö kërëngë bhöröngë ubhwaho kya igho kërë.
Twahokane!
Hano oraabhate orobhareka urwa bhömösi,
öni nembata orobhareka urwa bhoryo.
Hano oraabhate orobhareka urwa bhoryo,
öni nembata orobhareka urwa bhömösi.”
10 Ruutu akarekera amaiso aghaaye,
akamaaha ribhate irya omooro ughwa Yorodani,
okohekera orobhareka urwa umughi ghono ghokobherekerwa igha Sowari.
Akamaaha igha,
ndeena amanshë amaaru,
kya ibhusitaani iya YEHOBHA Waryobha eno ekobherekerwa Ëdëëni,
kya ikyaro ikya Miisiri.
Enkaagha iyö,
ne-eera waanyöörrë YEHOBHA Waryobha ataraasikya imighi ighya Sodoma na Ghomora.
11 Ku bhuyö,
Ruutu akashaaghora ribhate ryonswe igho irya Yorodani,
akabhata orobhareka urwa röghörö.
Ni-igho bhaahokaini.
12 Abhuramu akatighara mu-kyaro ikya Kaanaani muyö.
Kasi Ruutu we akaghya okomenya ahasë aha imighi gheno ghyaarë mu-ribhate riyö,
akangʼaanyërya amaghutu aghaaye,
haangʼë na umughi ughwa Sodoma.
13 Kasi abhantö abha Sodoma m-baghogho bhököngʼu bhaarë,
bhaasarryanga YEHOBHA Waryobha ko okokora ëbhëbhë ibhyaru bhököngʼu.
14 Hano Ruutu yaamarrë ukwahokana na Abhuramu,
YEHOBHA Waryobha akatëëbhya Abhuramu igha,
“Bhoono rekera amaiso aghaaho,
omaahe mbaara syonswe igho,
ghöösi,
syömya,
röghörö na nyansha.
15 Ikyaro kyonswe igho kiyö okomaaha,
nendaakohaane,
uwe na urwebhoro urwaho,
kebhe ikyënyu,
amakora ghonswe igho.
16 Nendaakore urwebhoro urwaho,
rwaruhe kya urutu urwa ko-kebhara.
Kya bhono ataaho ömöntö ono akotora okobhara urutu,
kora urwebhoro urwaho rwonswe,
terotorwe okobharwa hë.
17 Mbe,
bhoono emoka orabhe ikyaro keno,
okeghende ko-bhotambë ubhwakyo na obhoghare ubhwakyo,
ko bhoora nendaakohaane ikyaro keno.”
18 Mbe,
Abhuramu akangʼaanyia amaghutu aghaaye,
akaghya okomenya ku-kyaro ikya Hëbhurööni,
haangʼë na nyamëtë emenene ighya Mamure.
Hano yaahikirë iyö,
akahaghaashera YEHOBHA Waryobha riighyö irya amaghena.