Waryobha arabherekera Abhuramu
12
Urusikö öröndë,
YEHOBHA Waryobha akatëëbhya Abhuramu igha,
“Karwe ku-kyaro ikyaho kono,
utighe-mo abha wëënyu,
na eka ya suwëënyu,
oghende ku-kyaro keno ndaakwöröki.
2 Nendaakokore obhe umwibhöri uwa abhantö abhaaru,
kora nendaakongʼoore!
Nendaakiini iriina iryaho,
kora ghwiki noraabhe obhongʼoore ko-bhandë.
3 Abhantö bhano bharekongʼoora,
na öni nendebhangʼoora.
Kasi bhano bharaakwihiime,
na öni nendaabhaihiime.
Nendengʼoora abhantö abha ibhyaro bhyonswe igho,
okohetera ku-uwe!”
4-5 Mbe,
Abhuramu akatanora ukurwa Haraani,
kya bhono YEHOBHA Waryobha yaamötëëbhëri.
Enkaagha iyö,
yaarenga ahikiri imyoka merongo muhungatë na etaano.
Abhuramu akaghegha Sarai mokaaye,
Ruutu omoona uwa mumura uwaabho,
na ëbhëntö ibhyabho bhyonswe igho,
bheno bhaarë nabhyo,
hamwë na abhaghorwa abhaabho,
bhano bhaanyöörrë Haraani hayö.
Bhakaghenda igho,
bhakaihika ku-kyaro ikya Kaanaani.
6 Mbe,
Abhuramu akaheta ghatëghatë iya ikyaro kiyö,
akahika Shëkëëmu kö-mötë omonenea ghono ghörëngë More.
Enkaagha iyö,
Abhakaanaani mbo bhaamënyirë ku-kyaro kiyö.
7 Mbe,
YEHOBHA Waryobha akabhooshokera Abhuramu,
akamötëëbhya igha,
“Ikyaro keno,
nkyo ndaahaane urwebhoro urwaho.”
Hano Abhuramu yaaighuurë igho,
akahaghaasha hayö riighyö irya amaghena irya ukumwensera YEHOBHA Waryobha,
ahasë hayö yaamöbhööshökëëyë-ho.
8 Ho Abhuramu yaamarrë,
akarwa iyö,
akabhata orobhareka urwa singuku,
röghörö iya umughi ughwa Bhëëtëëri.
Akatoora-yo righutu iryaye,
umughi ughwa Bhëëtëëri,
ghokabha orobhareka urwa nyansha,
na umughi ughwa Ai,
ghokabha orobhareka urwa röghörö.
Hayö honswe,
akahaghaashera-ho YEHOBHA Waryobha riighyö irya amaghena.
Akasengerra hayö YEHOBHA Waryobha.
9 Hano Abhuramu yaamarrë,
akabha araghenda arangʼaanyangʼaanya igho arabhata syömya,
orobhareka urwa Nëghëbhu.
Abhuramu ku-kyaro ikya Miisiri
10 Mbe,
inshara ekeebhoka ku-kyaro ikya Kaanaani kiyö.
Ko bhoora inshara iyö në-ndörö bhököngʼu yaarë,
Abhuramu akaghya ku-kyaro ikya Miisiri,
akaikara-yo,
ku-ribhagha ike igho.
11 Hano yaahikirë haangʼë okosoha Miisiri,
akatëëbhya mokaaye Sarai igha,
“Tamaaha,
uwe m-muuya örë bhököngʼu.
12 Hano Abhamiisiri bharaakomaahe,
mbaraaghambe igha,
‘Ono we mokaaye!’
Ku bhuyö,
mbaraanyite,
kasi uwe,
tebhakwitë hë.
13 Ndakosabha igha,
uushe oghambe igha,
uwe m-mwisëkë uwëëtö örë,
okore bhatakaanyita,
bhansërëëni bhwaheene,
ko okoghera iya uwe.”
14 Mbe,
hano Abhuramu na Sarai bhaahikirë Miisiri,
Abhamiisiri bhakamaaha igha,
Sarai m-muuya bhököngʼu.
15 Hano abhaimërërri abha amangʼana agha Faraob bhaamörööshë,
bhakaherra omokama sinkuma isya bhono Sarai arëngë umuuya.
Hano bhaamarrë,
bhakahira Sarai mu-ghunyumba ughwa Farao.
16 Mbe,
Farao akasërëënia Abhuramu ko okoghera iya Sarai.
Akamohaana amangʼöndi,
sëmböri,
sengʼombe,
sitikërë,
sengamia na abhaghorwa abha ikishaasha na abha ekekari.
17 Kasi,
ko bhono Farao yaaghëghirë Sarai mokaa Abhuramu,
YEHOBHA Waryobha akamushibhya bhörrö,
hamwë na abhantö abhaaye bhonswe igho.
18 Mbe,
Farao akabherekera Abhuramu,
akamöbhöörya igha,
“Uwe!
Ne-ngʼana kë eno önkörëëyë?
Ndarra tuwaantëëbhëri igha,
Sarai m-mokaaho hë?
19 N-kwakë waaghambirë igha,
m-mwisëkë uwëënyu,
kora nkamoghegha igha,
mmokore mokaane?
Ku bhuyö bhoono ni-igha oghegha mokaaho,
ughende hano ukughya!”
20 Ho Farao yaamarrë akatëëbhya abhantö abhaaye igha,
bhaherekerre Abhuramu na mokaaye,
hamwë na ëbhëntö ibhyaye bhyonswe igho.