Omonara ughwa Bhaabhëëri
11
Kare hayö,
abhantö bhonswe igho ekeghambo n-këmwë igho bhaashumaashanga ko-kebhara kono,
na amangʼana n-gamwë ghayö ghaarë.
2 Mbe,
hano abhantö bhaangʼaanyanga okobhata orobhareka urwa röghörö,
bhakamaaha ikyaro ikya ekebharabhanshë ikya Shinari,
a bhakamenya-ho.
3 Mbe,
bhakateebhania igha,
“Muushe tokore amatofaari,
toghasambe bhuuya.”
Enkaagha iyö,
abhantö mbaahaaghasheranga amatofaari na eraami ukutigha amaghena na emoraamu.
4 Ho bhaamarrë bhakaghamba igha,
“Tohaghaashe umughi hamwë na omonara ghono orosonga urwagho roraahike mu-ryobha.
Tokore igho,
okore tomanyekane mo-bhantö,
totakaasha ukunyaraghana ko-kebhara.”
5 Mbe,
YEHOBHA Waryobha akaika,
okore amaahe umughi na omonara ghuyö ghwaahaghaashwanga na abhantö bhayö.
6 Hano YEHOBHA Waryobha yaarööshë ghayö,
akaghamba igha,
“Abhantö bhano m-bamwë,
na ekeghambo ikyabho,
n-këmwë,
na emeremo ghiyö bhasimiri,
nkwörökya ghërë igha,
amangʼana ghano bharaakore,
m-marito bhököngʼu gharaabhe.
Na bhoono engʼana yoyonswe igho eno bharaatune okokora,
neraabhe.
7 Bhoono ni-igha toghende toroghani ekeghambo ikyabho,
okore bhatakaaighwerrananga abheene ko bheene.”
8 Ku bhuyö YEHOBHA Waryobha akaghera bhanyaraghane ko-kebhara kyonswe igho,
bhakatigha okohaghaasha umughi ghuyö.
9 Ko okoghera iya engʼana iyö,
umughi ghuyö ghokabherekerwa igha Bhaabhëëri,
b ko bhoora hayö ho YEHOBHA Waryobha yaaroghaini ekeghambo ikya ko-kebhara kyonswe igho.
Na ukurwa hayö,
YEHOBHA Waryobha akanyaraghania abhantö ko-kebhara kyonswe igho.
Urwebhoro urwa Shëëmu
10 Rono ndwo urwebhoro urwa Shëëmu.
Hano ëhöörö iya amanshë yaahööyë,
ghekaheta-ho imyoka ëbhërë,
Shëëmu akahikya imyoka ighana imwë,
akeebhora Arifakisadi.
11 Hano Shëëmu yaaibhööyë Arifakisadi,
akaikara imyoka amaghana ataano.
Yaaibhööyë abhaana abha ikishaasha na abha ekekari ku imyoka amaghana ataano ghiyö.
12 Hano Arifakisadi yaahikiri imyoka merongo etatö na etaano,
akeebhora Seera.
13 Enkaagha eno yaaibhööyë Seera,
akaikara imyoka amaghana ane na etatö,
akeebhora abhaana abha ikishaasha na abha ekekari.
14 Hano Seera yaahikiri imyoka merongo etatö,
akeebhora Ëbhëëri.
15 Hano yaaibhööyë Ëbhëëri,
akaikara imyoka amaghana ane na etatö,
akeebhora abhaana abha ikishaasha na abha ekekari.
16 Hano Ëbhëëri yaahikiri imyoka merongo etatö na inye,
akeebhora Përëghi.
17 Hano yaaibhööyë Përëghi,
akaikara imyoka amaghana ane na merongo etatö,
akeebhora abhaana abha ikishaasha na abha ekekari.
18 Hano Përëghi yaahikiri imyoka merongo etatö,
akeebhora Reu.
19 Hano yaaibhööyë Reu,
akaikara imyoka amaghana abhërë na kenda,
akeebhora abhaana abha ikishaasha na abha ekekari.
20 Hano Reu yaahikiri imyoka merongo etatö na ëbhërë,
akeebhora Serughi.
21 Hano yaaibhööyë Serughi,
akaikara imyoka amaghana abhërë na muhungatë,
akeebhora abhaana abha ikishaasha na abha ekekari.
22 Hano Serughi yaahikiri imyoka merongo etatö,
akeebhora Naahöri.
23 Hano yaaibhööyë Naahöri,
akaikara imyoka amaghana abhërë,
akeebhora abhaana abha ikishaasha na abha ekekari.
24 Hano Naahöri yaahikiri imyoka merongo ëbhërë na kenda,
akeebhora Teera.
25 Hano yaaibhööyë Teera,
akaikara imyoka ighana imwë na ikömi na kenda,
akeebhora abhaana abhandë,
abha ikishaasha na abha ekekari.
26 Hano Teera yaahikiri imyoka merongo muhungatë,
akeebhora Abhuramu,
Naahöri na Haraani.
Urwebhoro urwa Teera
27 Rono ndwo urwebhoro urwa Teera.
Teera akeebhora Abhuramu,
Naahöri na Haraani.
Haraani akeebhora Ruutu.
28 Haraani uyö akatangatera suwaabho ukukwa.
Yaakwërëëyë mu-mughi ughwa Uru,
mu-kyaro ikya Abhakaridaayo mono yaaibhörëëywë-mo.
29 Abhuramu na Naahöri,
bhakateta abhakari.
Omokari uwa Abhuramu yaabherekerwanga igha Sarai na omokari uwa Naahöri yaabherekerwanga igha Miirika.
Miirika uyö,
yaarë na umusubhaati uwaabho,
ono yaabherekerwanga igha,
Isika,
na bhonswe igho m-mbaisëkë abha Haraani bhaarë.
30 Sarai m-moghomba yaarenga,
ku bhuyö tiyaarë na omoona hë.
31 Teera akaghegha mura uwaaye Abhuramu na mokaa Abhuramu,
akaghegha na ömöshökörö uwaaye Ruutu,
mura wa Haraani.
Bhakarwa mu-mughi ughwa Uru ku-kyaro ikya Abhakaridaayo,
bhakaghoota-ko enshera iya ukughya mu-kyaro ikya Kaanaani.
Kasi,
hano bhaahikirë mu-mughi ghono ghokobherekerwa igha Haraani,
bhakamaaha igha,
bhamenye-ho.
32 Hano Teera yaahikiri imyoka amaghana abhërë na etaano,
akakwa.
Mmu-kyaro ikya Haraani hayö,
ho yaakwërëëyë.