Ceeŋi ná wwòlyɛge kani
12
Lire kàntugo nde à pyi kacyeele nìɲyiŋi i,
mii à ceeŋi wà ɲya,
canŋaɲyiini mpyi u na mu à jwo vàanntinŋɛ,
yiŋke sí ɲyɛ u tooyi ɲwɔhʼi,
wɔrii kɛ ná shuunni sʼà pyi kajaɲjwoo ɲùntoŋɔ u ɲùŋke na.
2 U laa wu u mpyi,
u mpyi na ŋkwúuli ziŋi cyereyampe cye e.
3 Lire kàntugo nde à pyi kacyeeni labɛrɛ nìɲyiŋi i,
mii à wwòlyɛgɛ nimbwɔhɔ niɲyɛga ɲya.
Ku mpyi ná ɲùmbogii baashuunni ná ɲɛŋii kɛ e,
saanra ɲùntoŋɔ na mpyi ɲùmbogigii puni niŋkin niŋkinŋi na.
4 Wɔrigii ká ntáa tataaya taanre,
kʼà ku nɛŋke tɛ̀gʼa taaga niŋkin pwɔ́ a wu ɲìŋke na.
Ku mpyi a yyére ceeŋi taan,
u aha si si pyàŋi jò.
5 Ka ceeŋi si pùnambile si,
ka Kile mɛ̀lɛkɛŋi wà si li lwɔ́ a kàre Kile saanre yatɛɛnŋke taan,
Kile yyére.
Lire li sí n‑pyi supyishiŋi puni ɲùŋɔ na,
sʼa ti kɛ̂ɛnŋi ná tɔɔnnɔ kabilʼe.
6 Ɲyɛ ka ceeŋi si fê a kàre síwage e.
Kile mpyi a cyage kà bégelʼa yaha u mɛɛ na wani,
bà pi si mpyi sʼa u kaan u a lyî canmpyaa kampwoo ná ŋkwuu shuunni ná beetaanre (1.260) funŋʼi mɛ.
7 Lire kàntugo ka kàshige si yîri nìɲyiŋi i.
Mishɛli u ɲyɛ Kile mɛ̀lɛkɛɛbii ɲùŋufooŋi wà ke,
ka uru ná u mɛ̀lɛkɛɛbii sí wwòlyɛge tùn,
ka wwòlyɛge ná ku mɛ̀lɛkɛɛbii si pi tùn mú.
8 Ŋka ku ɲyɛ a jà kàshige na mɛ,
ku ná ku mɛ̀lɛkɛɛbii saha ɲyɛ a tatɛɛngɛ ta nìɲyiŋi i mɛ.
9 Kuru wwòlyɛge ku mpyi tèecyiini i.
Kuru ku ɲyɛ jínabii ɲùŋufooŋi,
maa mpyi Sitaanniŋi ke,
ka pi i kuru wà ɲìŋke na ná ku mɛ̀lɛkɛɛbilʼe.
Kuru ku maha diɲyɛŋi sùpyire wuruge.
10 Lire kàntugo ka mii i mɛjwuu lógo fànha na nìɲyiŋi i na:
«Tèni i wuu Kileŋi sí sùpyire shwɔ,
si u sífente cyêe,
si ntɛ̀ɛn u saanre tatɛɛnge e ke,
lirʼà nɔ numɛ,
ŋge u à cwɔɔnrɔ mà pyi Shwofooŋi ke,
uru ɲùŋufente tèepyiinʼà nɔ mú.
Ɲaha na yɛ ŋge u maha wuu cìnmpyiibii cɛ̂ɛge Kile yyahe taan pìlaga bâra canŋa na ke,
pi à uru wà ɲìŋke na.
11 Wuu cìnmpyiibilʼà pyi javee u na,
Mpabilini sìshange ŋguŋi
ná Jwumpe Nintanmpe ɲjwuŋi cye kurugo.
Pi à ɲɛɛ mà pi múnahigii kan sáraga.
12 Lire e ke tatɛɛngɛ na ɲyɛ yii mpiimu á nìɲyiŋi i ke,
yii pyi funntange e,
ŋka ɲìŋke ná suumpe lwɔhe wuunʼà kɛ̀ɛge,
ɲaha na yɛ Sitaanniŋi nàvunŋɔ wuŋʼà tîge yii yyére.
U à cè na uru canmpyaagii nɛŋɛ saha ɲyɛ a tɔɔn mɛ.»
13 Wwòlyɛgʼà pi ɲya pi à kuru wà ɲìŋke na ke,
ceeŋi u mpyi a pùnambilini si ke,
maa ntaha uru fye e na ŋkɔ̀re.
14 Ka ɲyɛ nimbwɔhɔ fukanya shuunni si ŋkan ceeŋʼá,
u yîri yire na u a sì u tatɛɛnge e síwage e,
bà u ɲwɔ si mpyi sʼa ɲcaa wani yyee taanre ná paanga funŋʼi,
si laaga tɔɔn wwòlyɛge na mɛ.
15 Lirʼà pyi ke,
ka wwòlyɛge si lwɔhɔ yige ku ɲwɔge e mà wà ceeŋi kàntugo ba fiige,
bà kuru si mpyi si u lwɔ́ mɛ.
16 Ŋka ɲìŋkʼà ceeŋi tɛ̀gɛ.
Lwɔhe wwòlyɛgʼà yige ku ɲwɔge e mà wà ke,
ɲìŋkʼà múgo,
maa kuru bya.
17 Lirʼà pyi ke,
ka wwòlyɛge lùuni si yîri ceeŋi taan,
maa kàshige kɛ̂ɛnŋɛ u pyìibii sanmpilʼá.
Pire pi ɲyɛ,
mpii pi ɲyɛ na Kile toŋi kurigii ɲáare,
maa Yesu kyaa yu sùpyirʼá ke.
18 Lire kàntugo ka wwòlyɛge si sà yyére suumpe lwɔhe ɲwɔge na.