Kile tùnntunmpii shuunniŋi kani
11
Ɲyɛ lire kàntugo,
ka pi i sumara pyipyi yaaga kan mii á mu à jwo kàbii,
maa yi jwo mii á:
«Yîrʼa Kileɲaarebage ná sárayi tawwuge súma,
mpii pi ɲyɛ wani na Kile pêre ke,
ma a pire tɔ̀rɔ.
2 Ŋka ma hà Kileɲaarebage ntàani súma mɛ,
ɲaha na yɛ mpii pi ɲyɛ pi ɲyɛ Kile kuni i mɛ,
kuru cyagʼà kan pirʼá.
Pire pi sí n‑pa Kile kànhe jya yiɲyɛ beeshuunni ná shuunni funŋʼi.
3 Mii sí na jwumpe jwufeebii shuunniŋi tun ná bubaga vàanɲyi i yaciyʼe.
Pi sí raa mii tùnnture pyi canmpyaa kampwoo ná ŋkwuu shuunni ná beetaanre (1.260) funŋʼi.»
4 Olivye ciyi shuunniŋi ná fùkinabii shuunniŋi pi ɲyɛ ɲìŋke Kafooŋi taan ke,
yire yi ɲyɛ pire tùnntunmpii shuunniŋi.
5 Sùpya la ká mpyi si kawaa pyi pi na,
nage maha fworo pi ɲwɔyi i,
maa uru zàmpɛnŋi bò.
Sèeŋi na,
sùpya maha sùpya la ká mpyi si kawaa pyi pi na,
urufolʼà yaa u bò amuni.
6 Fànhe na ɲyɛ pi á pi jà a zànhe cû kʼàha mpa pi tùnnture canmpyaagii funŋke e mɛ.
Pi mú maha jà a lwɔhe kɛ̂ɛnŋʼa pyi sìshan.
Tère o tère lʼà pi táan ke,
yyefuge shiŋi u à pi táan ke,
pi maha jà a kuru wà sùpyire na ɲìŋke na.
7 Pi aha pi tùnnture jwo a kwɔ̀ tèni ndemu i ke,
sige yapege kà sí n‑fworo kacyewyicuguŋke e si mpa pi tùn,
si jà pi na,
si pi bò.
8 Pi buwuubii sí n‑yaha kànbwɔhe tafage e.
Kuru kànhe ku sí n‑jà n‑tàanna ná Sɔdɔmua ná Misirab e,
yi kapegigii kurugo,
kurʼe pi à pi Kafooŋi kwòro cige na mú.
9 Pìi sí n‑yîri kìrigii puni ná tùluyi puni ná shɛɛnre puni ná supyishiŋi puni i si mpa a pi buwuubii wíi canmpyaa taanre ná paanga funŋʼi,
pi sì ɲɛɛ wà u pi tò mɛ.
10 Pi ŋkwùŋi funntange kurugo,
diɲyɛ sùpyire sí n‑pyi ntàanŋi i,
sʼa ma yaaya kaan piyʼá,
ɲaha na yɛ pire Kile tùnntunmpii shuunniŋi mpyi a diɲyɛŋi sùpyire yyahayi fwɔhɔrɔ sèlʼe.
11 Ɲyɛ cyire canmpyaa taanre ná paange kàntugo,
ka shìŋi ŋɔni si yîri Kile yyére mà jyè pi e,
ka pi i yîrʼa yyére.
Mpii pi à pi ɲya ke,
ka pire si fyá sèlʼe.
12 Ka pire tùnntunmpii shuunniŋi si mɛjwuu lógo fànha na mà yîri nìɲyiŋi i na:
«Yii dùgo naha.»
Ka pi i dùgo nìɲyiŋi i ɲahaŋke kʼe,
mà pi zàmpɛɛnbii yaha tayyérege e na pi wíi.
13 Ka ɲìŋke si ntílʼa cyɛ̂ɛnnɛ sèlʼe.
Kànhe ká ntáa tataaya kɛ,
taaga niŋkin baya mpyi a cwo,
ka shiin kampwɔhii baashuunni (7.000) si ŋkwû kuru ɲìŋke ɲcyɛ̀ɛnniŋi kajyilʼe.
Mpii pi à kwôro ke,
ka pire si fyá sèlʼe,
Kileŋi u ɲyɛ yaayi puni ɲùŋɔ na ke,
maa li ɲwɔ cû na uru pêre.
14 Ɲyɛ yyefuge shɔnwogʼà tòro,
ŋka ɲcyɛ̀rɛ tanrawoge sí ɲwɔ cû.
Kile mɛ̀lɛkɛŋi baashɔnwuŋʼà u mpuruge wyì
15 Ɲyɛ Kile mɛ̀lɛkɛŋi baashɔnwuŋʼà u mpuruge wyì ke,
ka mɛjwugii si fworo nìɲyiŋi i fànha na:
«Diɲyɛŋi ɲùŋufentʼà pyi wuu Kafooŋi Kile ná u Niɲcwɔnrɔŋi woro fo tèekwombaa.»
16 Kacwɔnribii beɲjaaga ná sicyɛɛreŋi u à tɛ̀ɛn pi saanre yatɛɛnɲyi i Kile yyahe yyére ke,
ka pire si piye tîrigʼa cyán,
maa Kile pêe,
17 maa jwo:
«Kafooŋi Kile,
Siŋi Punifoo,
mu u ɲyɛ,
ná mu mpyi ke,
wuu fwù na ɲyɛ mu na,
ɲaha na yɛ mu à ma fànhe nimbwɔhe tìŋɛ ma Saanre e.
18 Supyishiŋi puni lùgigii mpyi a yîri,
ŋka numɛ mu u lùyirini li ɲyɛ na ɲaa.
Tèni i mu sí kwùubii yíbe ke,
lirʼà nɔ numɛ,
mu tùnntunmpii pi ɲyɛ mu báarapyiibii ke,
pire sàraŋi tèni mú à nɔ,
mà bâra mu shiinbii ná mpii pi ɲyɛ na fyáge mu yyaha na ke,
shinbwo bâra shinbilere na.
Mpii pi ɲyɛ na sùpyire kɛ̀ɛge ɲìŋke na ke,
pire tèekɛgɛni mú à nɔ.»
19 Lire kàntugo Kileɲaarebage ku ɲyɛ nìɲyiŋi i ke,
ka kuru si múgo.
Ka Kile tunmbyaare mbwùuni si ɲya kuru bage e.
Ka kileɲini ná tùnmpe ná kiletinni ná ɲìŋke ɲcyɛ̀ɛnnɛŋi si mpyi mà bâra zànhafunɲcɛɛnɲyi na.