Sémɛbileni kani
10
Lire kàntugo ka mii i Kile mɛ̀lɛkɛ fanhaɲyahaga wuŋi wabɛrɛ ɲya u à tîge mà yîri nìɲyiŋi i.
Ɲahaŋa mpyi u na vàanntinŋɛ fiige,
zànhaŋwɔɔge sí ɲyɛ u ɲùŋke e.
U yyahe mpyi canŋaɲyiini fiige,
u tooyi sí ɲyɛ mu à jwo na ku ɲyɛ cinŋkunyɔ na.
2 Sémɛbileni là ɲwɔ mpyi a múgo u cye e.
Ka u u u kàniŋɛ tɔɔge yaha suumpe lwɔhe ɲuŋʼi,
maa kàmɛnɛ woge yaha ɲìŋke na,
3 maa jwo fànha na cànraga fiige.
U à jwo amuni ke,
ka kileŋi si ntîn tooyo baashuunni.
4 Cyire kiletiinŋkii baashuunniŋʼà ɲjemu jwo ke,
mii la mpyi si yire sémɛ,
ŋka mii à mɛjwuu lógo nìɲyiŋi i na:
«Kiletiinŋkii baashuunniŋʼà ɲjemu jwo ke,
puru pyi ma kanni funŋɔ kyaa,
ma hà pu sémɛ mɛ.»
5 Kile mɛ̀lɛkɛŋi mii mpyi a ɲya u à u tɔɔge kà niŋkin yaha suumpe lwɔhe ɲuŋʼi,
maa ku sanŋke yaha ɲìŋke na ke,
ka uru si u kàniŋɛ cyɛge yîrige nìɲyiŋi i,
6 maa jwo:
«Kileŋi u ɲyɛ fo tèekwombaa,
ná u à nìɲyiŋi ná ɲìŋke ná suumpe lwɔhe ná yi funŋɔ yaayi puni dá ke,
mii sí n‑kâa uru mɛge na na tènʼà nɔ,
tère saha ɲyɛ mɛ.
7 Mɛ̀lɛkɛŋi baashɔnwuŋi ká u mpuruge wyì canŋke ŋkemu i ke,
kaŋwɔhɔni Kile à bégelʼa yaha ke,
u sí lire pyi,
bà u à yi jwo u tùnntunmpii,
u báarapyiibilʼá mɛ.»
8 Mɛjwuuni mii mpyi a fyânha a lógo mà yîri nìɲyiŋi i ke,
ka lire si núrʼa mii pyi:
«Kile mɛ̀lɛkɛŋi u à yyére suumpe lwɔhe ná ɲìŋke ɲuŋʼi ná sémɛbileni nimugoɲjahani i ke,
sà li shwɔ u cye e.»
9 Ka mii i file uru Kile mɛ̀lɛkɛŋi na,
maa u pyi u sémɛbileni kan,
ka u u mii pyi:
«Li shwɔ ma a ŋkyàa,
li sí n‑soro mu funŋke e,
ŋka li sí n‑pôo mu ɲwɔge e sɛrɛ fiige.»
10 Ɲyɛ ka mii i sémɛbileni shwɔ Kile mɛ̀lɛkɛŋi cye e mà kyà.
Li mpyi a pôo mii ɲwɔge e sɛrɛ fiige,
ŋka mii à li jò ke,
ka li i mii funŋke pyi ku u mii yà zoroŋi cye e.
11 Ka pi i yi jwo mii á na Kile saha sí tùnnturo le mii cye e mii u jwo supyishi niɲyahawa ná kìrii niɲyahagii ná shɛnrɛ niɲyahara sùpyii ná saanlii niɲyahamilʼá.