9
Ɲyɛ Kile mɛ̀lɛkɛŋi kaŋkuro wuŋʼà u mpuruge wyì ke,
ka mii i woni là ɲya lʼà yîri nìɲyiŋi i mà mpa ɲcwo ɲìŋke na,
ka kacyewyicuguŋke tirikyaanni si ŋkan lʼá.
2 Ka li i ku múgo,
ka ŋguruge si ntíi na dùgudugu na dùru mu à jwo kacɛɛgɛ ku ɲyɛ na sóre,
mà canŋaɲyiini ná kafɛɛge pyi kʼà wwɔ̀.
3 Ka kampɛɛnɲyɛ si fworo kuru ŋguruge e mà caala mà ɲìŋke tò.
Fànhe mpyi a kan yʼa sùpyire nɔni nɔ́ŋgyahigii fiige.
4 Yʼà jwo yʼá na yʼàha yaaga pyi ɲyɛge,
lire ɲyɛ mɛ cire,
lire ɲyɛ mɛ yaaga maha yaaga kʼà sìi na fyîn ɲìŋke na ke,
kuru kà na mɛ,
fo sùpyire ti ɲyɛ Kile fyèŋi ɲyɛ a bwɔ̀n ti byahigii na mɛ.
5 Kuni ɲyɛ a kan yʼá,
yʼa sùpyire bùu mɛ,
ŋka yi ti yyahayi fwɔhɔrɔ yiɲyɛ kaŋkuro funŋʼi.
Yi tanɔŋke yaŋkanni ná nɔ́ŋgyaani woge na ɲyɛ niŋkin.
6 Cyire canmpyaagilʼe,
sùpyire sí raa kwùŋi caa,
ŋka ti sì u ta mɛ.
Ti la sí n‑pyi si ŋkwû,
ŋka kwùŋi sí raa fî ti yyaha na.
7 Yire kampɛɛnɲyi mpyi shɔnyɔ fiige,
ɲjemu yʼà bégele kàshige mɛɛ na ke.
Yaaya na mpyi yi ɲùɲyi na sɛɛn ɲùntoyo fiige,
yi yyahayi mpyi sùpya wogo fiige.
8 Yi ɲùɲjoore mpyi ceewe woro fiige,
ŋkyànhigii sí ɲyɛ cànraga wogii fiige.
9 Yi ntùŋke mpyi mu à jwo kʼà tò ná tɔɔnnɔ vàanntinŋʼi,
yi fukanyi tùnmpe mpyi mu à jwo shɔnkuruŋɔ ku ɲyɛ na fî ná yi wòtoribilʼe na wá kàshige cyage e.
10 Yi nɛɲyi mpyi ná sɛ̀nŋilʼe nɔ́ŋgyahii fiige.
Yire nɛɲyi cye kurugo,
fànhe mpyi yʼe,
yi jà a yyefuge nɔ sùpyire na yiɲyɛ kaŋkuro funŋʼi.
11 Kacyewyicuguŋke mɛ̀lɛkɛŋi u mpyi yi saanŋi.
Eburubii shɛɛnre e pi maha u mɛge pyi:
«Abadɔn» Girɛkiibii woore e maa u mɛge pyi:
«Apoliyɔn».
(Kuru mɛge ɲwɔhe ku ɲyɛ:
«kakyampyiŋi».)
12 Ɲyɛ yyefuge niɲcyiigʼà tòro,
yii li cè shuunni saha na ma kàntugo.
13 Ɲyɛ Kile mɛ̀lɛkɛŋi baani wuŋʼà u mpuruge wyì ke,
sárayi tawwuge sɛɛnŋi woge ku ɲyɛ Kile yyaha yyére ke,
ka mii i mɛjwuu lógo kuru mbìiŋkii sicyɛɛreŋi na.
14 Kile mɛ̀lɛkɛŋi baani wuŋi u mpyi ná mpuruge e ke,
ka nde mɛjwuuni si uru pyi:
«Kile mɛ̀lɛkɛɛbii sicyɛɛreŋi u à pwɔ Efirati baŋi nimbwoŋi cyage e ke,
pire sànha.»
15 Pire Kile mɛ̀lɛkɛɛbii sicyɛɛreŋi mpyi a bégelʼa yaha na nde yyeeni ná ŋke yiŋke ná nde canmbilini ná nde tèni yabiliŋi sigili ke,
pi à sànha,
bà li si mpyi,
diɲyɛ sùpyire ká ntáa tataaya taanre,
pi i taaga niŋkin bò mɛ.
16 Pi kàshikwɔɔnbii pi mpyi shɔnyi ɲuŋʼi ke,
pire pɛ̀rɛgʼà jwo mii á.
Pi mpyi shiin miliyoo ŋkwuu shuunni (200.000.000).
17 Kacyeeni mii à ɲya ke,
lire lʼà pyi,
mii à shɔnyi ná yi feveebii ɲya.
Tɔɔnnte vàanntinɲyi yi mpyi pi na ke,
yire mpyi a ɲáaŋa na fiige,
maa mpyi bula fiige,
maa mpyi nɛrɛ fiige.
Shɔnyi ɲùɲyi mpyi canraya wuyi fiige.
Nage ná ŋguruge ná ŋkìrigiŋi mpyi na fwore yi ɲwɔyi i.
18 Diɲyɛŋi sùpyire ká ntáa tataaya taanre,
nage ná ŋguruge ná ŋkìrigiŋi u mpyi na fwore shɔnyi ɲwɔyi i ke,
yire yyefuyi taanreŋʼà taaga niŋkin bò.
19 Shɔnyi fànhe mpyi yi ɲwɔyi ná yi nɛɲyi i.
Yi nɛɲyi mpyi wwòo fiige,
maa mpyi ná ɲùmbogilʼe.
Cyire cye kurugo,
yi mpyi maha yyefuge wàa sùpyire na.
20 Ɲyɛ sùpyire tʼà pyi ti ɲyɛ a kwû yire yyefuyi cye e mɛ,
tire ɲyɛ a láha ti cyeyayaayi mpèeŋi na mɛ.
Ka ti i ntòro ná ti jínasunni ná ti kacyinzunni i,
ti mpyi a yire ɲjemu yaa ná sɛɛnŋi,
lire ɲyɛ mɛ wyɛ́rɛfyinŋi,
lire ɲyɛ mɛ dàɲyɛŋi,
lire ɲyɛ mɛ kafaayi,
lire ɲyɛ mɛ ná cire e ke.
Mà li ta,
yire yaayi ɲyɛ na ɲaa mɛ,
yi ɲyɛ na núru mɛ,
yi ɲyɛ na jà a ɲaara mɛ.
21 Ti mú ɲyɛ a láha ti supyibuuni ná ti sìŋkanmpe ná ti jacwɔɔre ná ti nàŋkaage na mɛ.