Mpabilini à fyèŋi baashɔnwuŋi láha
8
Tèni i Mpabilini à fyèŋi baashɔnwuŋi láha ke,
ka tùnmpe si fyâha nìɲyiŋi i,
mà tère nimbilere pyi.
2 Kile mɛ̀lɛkɛɛbii baashuunniŋi u à yyére Kile yyaha yyére ke,
ka mii i pire ɲya,
ka mpuruyo baashuunni si ŋkan pirʼá.
3 Ka Kile mɛ̀lɛkɛŋi wabɛrɛ si mpa yyére sárayi tasogoge taan.
Wusunasuugocwoo mpyi u cye e,
ndemu lʼà yaa ná sɛɛnŋi i ke.
Ka wusuna niɲyahawa si ŋkan u á,
u pyi sáraga ná Kile wuubii puni ɲareyʼe,
sárayi tasogoge sɛɛnŋi woge ku ɲyɛ Kile saanre yatɛɛnŋke yyaha yyére ke,
kuru ɲuŋʼi.
4 Ka wusunaŋi ŋguruge si wá na fwore cwooni i Kile mɛ̀lɛkɛŋi cye e,
na dùru ná Kile wuubii ɲareyʼe Kile yyahe taan.
5 Lire kàntugo ka Kile mɛ̀lɛkɛŋi si wusunaŋi cwooni ɲî sárayi tawwuge naŋkyanhigii na,
mà wu ɲìŋke na.
Ka kileŋi si wá na ntînni,
maa ɲî,
tùnmpe sʼà ɲyaha,
ka ɲìŋke si ɲcyɛ̂ɛnnɛ.
Kile mɛ̀lɛkɛɛbilʼà mpuruyo baani wyì yyecyiige na
6 Kile mɛ̀lɛkɛɛbii baashuunniŋi cye e mpuruyi baashuunniŋi mpyi ke,
ka pire si bégele sʼa yi wyì.
7 Kile mɛ̀lɛkɛŋi niɲcyiiŋʼà u mpuruge wyì ke,
ka zànhafunɲcɛɛnɲyi ná nage ná sìshange si wùrugo yiye e mà yîri nìɲyiŋi na mà wà ɲìŋke na.
Ɲìŋke ká ntáa tataaya taanre,
taaga niŋkin à sógo ná ku cire ná ku ɲyɛ̀puruge e.
8 Kile mɛ̀lɛkɛŋi shɔnwuŋʼà u mpuruge wyì ke,
ka yaaga nimbwɔhɔ si wà suumpe lwɔhe e mu à jwo ɲaŋa nawogo.
Suumpe lwɔhe ká ntáa tataaya taanre,
taaga niŋkin à kɛ̂ɛnŋʼa pyi sìshan.
9 Ɲyii yaayi yi ɲyɛ suumpe lwɔhe e ke,
yire ká ntáa tataaya taanre,
taaga niŋkin à kwû,
bakwooyi ká ntáa tataaya taanre,
taaga niŋkin à murulo.
10 Kile mɛ̀lɛkɛŋi tanrewuŋʼà u mpuruge wyì ke,
ka woro nintabaala si yîri nìɲyiŋi i mà mpa ɲcwo ɲìŋke na.
Li mpyi na ɲî na fiige.
Baabii ká ntáa tataaya taanre,
lʼà cwo taaga niŋkin ná ku lùbilibii ɲuŋʼi.
11 Lire woni mɛge na ɲyɛ Zoroŋi.
Lwɔhe ká ntáa tataaya taanre,
lʼà taaga niŋkin pyi kʼà soro.
Mpii pi à ku bya ke,
pire niɲyahara à kwû ku zoroŋi kurugo.
12 Kile mɛ̀lɛkɛŋi sicyɛrewuŋʼà u mpuruge wyì ke,
canŋke ná yiŋke ná wɔrigii ká ntáa tataaya taanre taanre,
taaya niŋkin niŋkin à kɛ̀ɛge.
Lirʼà pyi ke,
yi saha ɲyɛ a jà a bɛ̀ɛnmpe yige pu yigeŋkanni na mɛ.
Canŋke ká ntáa tataaya taanre,
taaga niŋkin à kwôro canŋaɲyiini bɛ̀ɛnmpe baa.
Numpilage ká ntáa tataaya taanre,
yiŋke ɲyɛ a bɛ̀ɛnmɛ yige taage tanrawoge e mɛ.
13 Ka mii i núrʼa ɲyɛ ɲya fo nìɲyiŋi i,
u u ŋko fànha na:
«Ɲìŋke sùpyire wuunʼà kɛ̀ɛge,
lʼà kɛ̀ɛge,
lʼà kɛ̀ɛge,
ɲaha kurugo yɛ ɲcyɛ̀rɛ mɛ̀lɛkɛɛbii taanreŋi sanŋi sí pi mpuruyi wyì.»