Sige yapiyi shuunniŋi kani
13
Ɲyɛ lire kàntugo,
ka mii i sige yapege kà ɲya ku u fwore suumpe lwɔhe e.
Ɲɛŋii kɛ ná ɲùmbogigii baashuunni ɲyɛ kʼá.
Saanre ɲùntoŋɔ na mpyi cyire ɲɛɛŋkii puni niŋkin niŋkinŋi na,
Kile mɛkɛgɛrɛ mɛyi sʼà sémɛ ku ɲùmbogigii na.
2 Sige yapege mii mpyi a ɲya ke,
kuru mpyi cin fiige.
Fànhe mpyi ku tooyʼe,
ku ɲwɔge sí ɲyɛ cànraga wogo fiige.
Ka wwòlyɛge si ku fànhe fiige kan kʼá,
maa ku saanre yatɛɛnŋke kan kʼá,
maa ɲùŋufente kan kʼá sèlʼe.
3 Sige yapege ɲùmboge kà niŋkin mpyi a bânni mu à jwo ku sí n‑kwû.
Ŋka kuru tabannagʼà pa ŋkwɔ̀,
ka li i mpyi kakyanhala sùpyirʼá fo tʼà yîrʼa taha ku fye e.
4 Ka ti i wwòlyɛge pêe,
ɲaha na yɛ kʼà ɲùŋufente kan sige yapegʼá.
Ka ti i sige yapege pêe mú na:
«Jofoo u ɲyɛ ŋke sige yapege ɲca yɛ?
Jofoo u sí n‑jà ku tùn yɛ?»
5 Ɲwɔgʼà kan kʼá,
bà ku si mpyi si kuye pêe,
sʼa Kile mɛkɛgɛrɛ jwumpe yu mɛ.
Kunʼà pa ŋkan kʼá yiɲyɛ beeshuunni ná shuunni funŋʼi,
kʼa lire pyi.
6 Ka ku u ku ɲwɔge múgo maa Kile ná u tatɛɛnge mɛge kɛ̀ɛge,
mpii pi à tɛ̀ɛn nìɲyiŋi i ke,
maa pire mɛyi kɛ̀ɛge mú.
7 Kunʼà pa ŋkan kʼá,
ku Kile wuubii tùn,
ku u jà pi na.
Fànhʼà kan kʼá,
ku pyi tùluyi puni ná kìrigii puni ná shɛɛnre puni jwufeebii ná supyishiŋi puni ɲùŋɔ na.
8 Diɲyɛ sùpyire puni sí raa ku pêre,
fo mpii mɛyi yʼà sémɛ shìŋi niŋkwombaaŋi tafeebii mɛyi tasemɛge e mà lwɔ́ diɲyɛ tasiige e ke.
Mpabilini lʼà pyi sáraga ke,
uru sémɛŋi na ɲyɛ lire wu.
9 Ŋgemu la ku ɲyɛ si karii yyaha cè ke,
urufoo u niŋgyigigii pɛrɛ,
u raa núru.
10 Ŋgemu ká mpyi na sí n‑le kàsuŋi i ke,
urufoo sí n‑le kàsuŋi i.
Ŋgemu ká mpyi na sí n‑bò ná kàshikwɔnŋwɔɔni i ke,
urufoo sí n‑bò ná lʼe.
Lire e ke Kile wuubilʼà yaa pi kyaage kwú piye e,
pi i ŋkwôro Kile kuni i.
11 Ɲyɛ ka mii i núrʼa sige yapege kabɛrɛ ɲya ku u fwore ɲìŋke e.
Ɲɛŋii shuunni mpyi ku na mpàbili wogii fiige,
ku mpyi na yu wwòlyɛgɛ fiige.
12 Ku mpyi na ku karigii pyi sige yapege niɲcyiige ɲyii na,
ná kuru u fànhe puni i.
Tabannage mpyi na ŋko sʼa sige yapege niɲcyiige ŋkemu bùu,
ka ku u núrʼa yîri ke,
ŋke numɛ wogʼà diɲyɛŋi ná u sùpyire pyi na tʼa kuru pêre.
13 Sige yapege shɔnwoge mpyi maha kakyanhala karigii pyi,
fo maha nage pyi ku u yîri nìɲyiŋi i na ntîri ɲìŋke na sùpyire ɲyii na.
14 Lire pyiŋkanni na,
fànhe ku mpyi a kan kʼà kakyanhala karigii pyi sige yapege niɲcyiige ɲyii na ke,
ku mpyi a diɲyɛŋi sùpyire wurugo ná cyire karigilʼe.
Kàshikwɔnŋwɔɔni mpyi a sige yapege ŋkemu bânni,
ka ku u núrʼa cùuŋɔ ke,
ku mpyi a diɲyɛŋi sùpyire pyi na ti kuru nàɲjaŋi yaa ti raa ku pêre.
15 Ɲyɛ sige yapege niɲcyiige nàɲjaŋi sùpyirʼà yaa ke,
fànhʼà kan sige yapege shɔnwogʼá,
ka ku u múnaa le uru nàɲjaŋi i,
bà u si mpyi sʼa yu,
mpiimu ká ɲcyé si u pêe ke,
u u pire bò mɛ.
16 Ka ku u fànha cyán sùpyire puni na,
bà fyè si mpyi si bwɔ̀n pi shin maha shin kàniŋɛ cyɛge,
lire ɲyɛ mɛ u byaani na mɛ,
shinbilere bâra shinbwo na,
yaarafoo bâra yaara baafoo na,
biliwe bâra shinŋi u ɲyɛ u ɲyɛ biliwe mɛ.
17 Sùpya mpyi na sì n‑jà zhwo pyi,
lire ɲyɛ mɛ mà pɛrɛmɛ pyi,
ná ŋke sige yapege fyèŋi ɲyɛ urufoo na mɛ.
Uru fyèŋi u ɲyɛ sige yapege mɛge,
lire ɲyɛ mɛ tɔrɔmpe pu sí n‑bɛ̂ ná ku mɛge e ke.
18 Nde na ɲyɛ yákilifee kyaa.
Tɔrɔmpe pu sí n‑bɛ̂ na sige yapege mɛge ɲwɔhʼi ke,
shinŋi u ɲyɛ yákilifoo ke,
urufoo u puru ɲwɔhe cya a cè.
Sùpya mɛgɛ ku ɲyɛ ku ki.
Kuru ku ɲyɛ ŋkwuu baani ná beetaanre ná baani (666).