Kile báaraŋi Poli à pyi Tesaloniki kànhe e ke
2
Wuu cìnmpyiibii,
yii yabilimpilʼà li cè na wuu kasheeni ɲyɛ a pyi yii yyére ɲùŋɔ baa mɛ.
2 Yii à li cè na Filipi kànhe shiinbilʼà wuu kyérege,
maa wuu cyahala,
ŋka lire ná li wuuni mú i,
Kile baragʼe,
wuu à wuye waha maa ŋkàrʼa sà Jwumpe Nintanmpe jwo yii á,
ali mà li ta wuu zàmpɛɛnbilʼà ɲyaha.
3 Jwumpe wuu à jwo sùpyirʼá maa pi le kuni niɲcɛnni i ke,
wuu ɲyɛ a puru jwo pi á ná pi ŋgurugo funŋʼi,
lire ɲyɛ mɛ ná funŋkyaange e,
lire ɲyɛ mɛ ná nàɲwɔhɔrɔ funŋʼi mɛ.
4 Ŋka Jwumpe Nintanmpe Kile à kan wuu á ke,
puru wuu ɲyɛ na yu.
Ɲaha kurugo yɛ u à wuu kàanmucya mà li ɲya na wuu sí n‑jà uru báaraŋi pyi,
lire e u à wuu pyi wuu u mpe Jwumpe Nintanmpe yu sùpyirʼá.
Wuu ɲyɛ na pu yu wuu kyaa si ntáan sùpyirʼá mɛ,
ŋka wuu na pu yu wuu kyaa si ntáan Kile á.
Uru u à wuu zòompii cè.
5 Yii yabilimpilʼà li cè kàyituwɔgɔrɔ bà wuu à jwo yii á mɛ,
là nta kurugo bà wuu mú sʼà pu jwo mɛ.
Kile u ɲyɛ wuu shɛ̀rɛfooŋi.
6 Mɛcyara kurugo bà wuu ɲyɛ na puru Jwumpe Nintanmpe yu yii á,
lire ɲyɛ mɛ sùpyire sanntʼá mɛ.
7 Mà li ta wuu mpyi na sí n‑jà fànha cyán yii na,
ɲaha na yɛ Kirisita tùnntunmii pi ɲyɛ wuu.
Ŋka lire ná li wuuni mú i,
wuu à pyi ɲùmpiŋɛfee yii shwɔhɔlʼe,
bà pyàŋi nuŋi ɲùŋke maha mpi ná u e,
maa yaha u na mɛ.
8 Ɲyɛ yii ntàannamagare tʼà sìi wuu e ke,
tire tʼà wuu pyi wuu à Jwumpe Nintanmpe jwo yii á,
puru mpemu pʼà fworo Kile e ke.
Lire kanni bà mɛ,
wuu mpyi a sàa li ta kacɛnnɛ si yii tɛ̀gɛ pyiŋkannigii puni na,
ali li mɛ́ɛ ká bɛ̂ ná wuu múnahigilʼe,
ɲaha na yɛ yii kyalʼà waha wuu na sèlʼe.
9 Mii cìnmpyiibii,
tèni i wuu à sà Kile jwumpe jwo wani yii yyére ke,
kanhaŋkanni ná báarawage wuu à pyi pìlaga bâra canŋa na,
bà li si mpyi wuu àha bú ŋkwɔ̀ mpyi tuguro yii ɲuŋʼi mɛ,
yii funŋɔ ɲyɛ a wwɔ̀ lire na mà kɛ!
10 Yii à li ɲya,
Kile mú à li ɲya,
ɲaaraŋkanni na wuu mpyi na ɲaare yii shwɔhɔlʼe ke,
lire mpyi a ɲwɔ maa ntíi,
wuu mú mpyi tìgire cyaga baa.
11 Yii mú à li cè na bà tufooŋi maha u pyìibii cû mɛ,
amuni wuu à yii puni niŋkin niŋkinŋi cû.
12 Wuu mpyi maha yii yɛrɛge maa màban leni yii e,
maa yi yu na wahage yii á,
na yii yii ɲaaraŋkanni yaha li yyaha tíi ná Kile ɲyii wuuni i,
uru ŋgemu u à yii yyere,
bà yii si mpyi si jyè u Saanre sìnampe e mɛ.
13 Lire kurugo wuu fwù ɲyɛ Kile na tèrigii puni i,
ɲaha na yɛ Jwumpe Nintanmpe wuu à jwo yii á ke,
yii ɲyɛ a pu pyi sùpyire jwumɔ mɛ.
Ŋka bà pu ɲyɛ mɛ,
yii à pu cû amuni,
maa li cè na Kile jwumpe pu ɲyɛ pu pi,
yii pi à dá Yesu na ke,
na puru pu ɲyɛ na yii sɔ̀nŋɔre kɛ̂ɛnŋi.
14 Wuu cìnmpyiibii,
Kile à mpiimu yyere ka pi i dá Yesu Kirisita na Zhude kùluni i ke,
yii ná pire mú à pyi niŋkin,
ɲaha na yɛ bà Yahutuubii pìlʼà pire kyérege mɛ,
amuni yii yabilimpii sùpyiibilʼà yii kyérege.
15 Pire Yahutuubilʼà Kile mùmpɛnmɛ pyi maa Kafooŋi Yesu ná Kile tùnntunmpii bò,
maa wuu kyérege.
Pi à piye pyi sùpyire puni zàmpɛnmii.
16 Jwumpe wuu ɲyɛ na yu supyishiŋi sanŋʼá,
bà pi si mpyi si shwɔ mɛ,
pi la ɲyɛ si wuu sige puru ɲjwuŋi na.
Lire mpyiŋi cye kurugo,
pi à là bâra pi kapegigii na,
fo Kile lùunʼà pa yîri pi taan maa bégele pi ntùnŋi mɛɛ na.
Tesaloniki kànhe dánafeebii lage ɲyɛ Poli na
17 Cìnmpyiibii,
wuu pi ke,
wuu à yîri yii taan si tère pyi,
wuu ɲyɛ na yii ɲaa mɛ.
Ŋka wuu na sɔ̂nŋi yii kyaa na.
Mà pu fíniŋʼa jwo,
wuu la ɲyɛ si yii ɲya sahaŋki.
18 Lire kurugo wuu la ɲyɛ si sà fworo yii na.
Mii Poli yabiliŋʼá lire kùsheeni kyalʼà yaha tooyo niɲyahayʼe,
ŋka Sitaanniŋi à wuu pyi wuu ɲyɛ a jà a lire kùluni tɔɔge lwɔ́ mɛ.
19 Ɲyɛ jofoo u ɲyɛ wuu sɔ̀nŋɔre tatahage yɛ?
Jofoo u ɲyɛ wuu funntange ɲùŋke yɛ?
Jofoo u ɲyɛ wuu pèente ɲùŋke yɛ?
Yii pi.
Wuu Kafooŋi Yesu cannuruge,
yii pi sí n‑pyi wuu sɔ̀nŋɔre tatahage,
si mpyi wuu funntange ɲùŋke,
si mpyi wuu pèente ɲùŋke Yesu yyahe taan.
20 Sèeŋi na,
yii pi ɲyɛ wuu pèente ná wuu funntange ɲùŋke.