Lɛtɛrɛŋi Poli à tun Kɔlɔsi kànhe dánafeebilʼá ke
Mpe yii à yaa yii cè mà jwo yii jyè lɛtɛrɛŋi funŋɔ jwumpe e ke
Poli wwoɲɛɛŋi Epafurasi u à Jwumpe Nintanmpe jwo Kɔlɔsi kànhe e, ka pìi si piye kan Yesu á. Poli yabiliŋi ɲyɛ a nɔ wani kuru kànhe na mɛ, ŋka u mpyi maha Kile ɲáare pire dánafeebilʼá, ali mà u yaha kàsuŋi i.
Ɲyɛ mà Poli yaha kàsuŋi i, Epafurasi à kàrʼa sà yi jwo u á na cyelentiibii kafinivinibii pìi na wá na ɲyàhaŋguruguŋi pyi dánafeebii shwɔhɔlʼe Kɔlɔsi kànhe e. Pire kafinivinibii mpyi na dánafeebii ɲùɲyi tare, mà lire ɲùŋke pyi na pi ɲyɛ na pi yalyire ná pi kataangii karigii cwɔɔnre mà tàanna ná Yahutuubii làdaabilʼe mɛ, na pi ɲyɛ na Kile mɛ̀lɛkɛɛbii pêre mɛ.
Ɲyɛ Poli à yire lógo ke, ka li i u funŋɔ pɛn. Lire e u à ŋge lɛtɛrɛŋi sémʼa tun Kɔlɔsi kànhe dánafeebilʼá maa pi funŋɔ cwo Yesu Kirisita fànhe na, maa li cyêe pi na na Yesu Kirisita à fànha tò mɛ̀lɛkɛɛbii na. Uru cye kurugo, Kile à pi dá. Yesu ká mpyi ná ŋgemu i ke, urufoo saha ɲyɛ a yaa u a Kile mɛ̀lɛkɛɛbii pêre mɛ.
Lire e Poli à li cyêe pi na na pi kàntugo wà diɲyɛŋi ɲyii karigilʼá, bà pi kyaa si mpyi si ntáan pi ɲùŋufooŋi Yesu á mɛ, pi a yàfani piye na, pi i piye kyaa táan piyʼá, mpii pi ɲyɛ pi ɲyɛ Kile kuni i ná pi e mɛ, pi i jwuŋkanna cè ná pire e.