Poli à lɛtɛrɛŋi niɲcyiiŋi ŋgemu tun Tesaloniki kànhe dánafeebilʼá ke
Mpe yii à yaa yii cè mà jwo yii jyè lɛtɛrɛŋi funŋɔ jwumpe e ke
Tesalonike kànhe na mpyi Masedoni kùluni i. Silasi ná Timɔti à Poli tɛ̀gɛ Jwumpe Nintanmpe ɲjwuŋi na wani, ka pìi si piye kan Yesu á. Poli ɲyɛ a jà a tère nimbwoo pyi wani kuru kànhe na mɛ, ɲaha kurugo yɛ Yahutuubilʼà u kyérege wani (Kapyiiŋkii 17).
Poli yìriŋkwooni kàntugo lire kùluni i, u à Timɔti tun Tesaloniki kànhe e, u sà dánafeebii kàanmucya kampyi yyefuge ɲyɛ a pi pyi pi à sàa le Kile kuni ɲaaraŋi na mɛ. Ɲyɛ tèni i Timɔti à núrʼa pa maa jwuntanma jwo Poli á mà yyaha tíi ná dánafeebilʼe ke, ka Poli funntanga wuŋi si ŋge lɛtɛrɛŋi sémʼa tun pi á.
Ŋge lɛtɛrɛŋi funŋke e u à fwù kan Kile á, maa màban le dánafeebilʼe, bà pi si mpyi si ŋkwôro Kile kuni i sʼa sì yyaha na mɛ.
U à pi funŋɔ cwo u báaraŋi pyiŋkanni na tèni i u mpyi pi shwɔhɔlʼe ke. U funŋkʼà táan, ɲaha kurugo yɛ u à li ɲya na dánafeebilʼà kwôro Kile kuni i, ali mà li ta ŋgahaŋi ɲyɛ pi ɲuŋʼi. U la ɲyɛ si núru pi ɲya (1--3). U à pi funŋɔ cwo u kàlaŋi na mà yyaha tíi ná ɲaaraŋkanni niɲcɛnni i. U à li cya pi á na pi a piye kàanmucaa katupwɔhɔyi na (4.1-12).
Dánafeebii kuruŋke e, pìi funmpɛn wuu pi mpyi mà yyaha tíi ná dánafeebii niŋkwuubilʼe. Ka Poli si màban le pi e maa li cyêe pi na na Yesu à ɲɛ̀ a fworo kwùŋi i pyiŋkanni ndemu na ke, dánafeebii pi à kwû ke, Kile sí pire ɲɛ̀ Yesu fiige. U à jwo na Yesu sí núru n‑pa canŋka. U aha mpa, dánafeebii puni sí n‑pyi ná u e fo tèekwombaa (4.16-17).