Poli à lɛtɛrɛŋi niɲcyiiŋi ŋgemu tun Tesaloniki kànhe dánafeebilʼá ke
Jwumpe tasiige
1
Yii dánafeebii kuruŋke ku ɲyɛ wuu Tuŋi Kile ná wuu Kafooŋi Yesu Kirisita wuubii Tesaloniki kànhe e ke,
mii Poli ná Silivɛn ná Timɔti,
wuu pi à ŋge lɛtɛrɛŋi sémɛ si ŋkan yii á.
Kile u ɲwɔ yii na,
u u yyeɲiŋke kan yii á.
Tesaloniki kànhe dánafeebii Kile kuni ɲaaraŋkannʼà Poli yyaha ɲî
2 Wuu maha fwù kaan Kile á yii kyaa na tèrigii puni i.
Wuu aha a si raa u ɲáare tère o tère e ke,
wuu funŋɔ ɲyɛ na wwùu yii na mɛ.
3 Kacɛnŋkii yii à pyi maa li cyêe na yii à dá Yesu Kirisita na ke,
ná báaraŋi yii à pyi maa li cyêe na Kile kyalʼà táan yii á ke,
ná pyiŋkanni na yii à yiye waha maa yii sɔ̀nŋɔre taha wuu Kafooŋi Yesu Kirisita na ke,
wuu aha a Kile ɲáare,
wuu funŋɔ ɲyɛ na wwùu cyire na mɛ.
4 Wuu cìnmpyiibii,
wuu à li cè na Kile à yii kyaa táan uyʼá maa yii cwɔɔnrʼa pyi u wuu.
5 Yii li cè na tèni i wuu à Jwumpe Nintanmpe jwo yii á ke,
li ɲyɛ a mpyi a dá ɲwɔjwumpe kanni na mɛ,
ŋka Kile Munaani fànhe mú mpyi a bâra maa yii pyi yii à dá na wuu jwumpe na ɲyɛ sèe.
Ɲaaraŋkanni na wuu mpyi na ɲaare yii shwɔhɔlʼe yii ntɛ̀gɛŋi kurugo ke,
yii à lire cè.
6 Wuu ɲaaraŋkanni ná Kafooŋi wuuni ɲyɛ niŋkin,
lire ɲaaraŋkanni yii sʼà lwɔ́.
Kile Munaani fànhʼà yii pyi yii à ɲɛɛ Kile jwumpe na ná funntange e yii yyefuge tèrigilʼe.
7 Lire pyiŋkanni na,
yii à pyi yyecyeenɛ Masedoni ná Akayi kùligii dánafeebii punʼá.
8 Yii à pyi kaɲuŋɔ mà Kafooŋi Jwumpe pyi pʼà caala mà lwɔ́ yii yyére,
mà sà nɔ fo Masedoni ná Akayi kùligii na,
mà bâra lire na,
dániyaŋi yii à pyi Kile na ke,
uru kyalʼà jwo cyeyi puni i.
Lire kurugo wuu saha ɲyɛ na wuye kànre na yii kyaa yu sùpya á mɛ.
9 Tèni i wuu à shà yii yyére ke,
pyiŋkanni na yii à wuu ɲùŋɔ bɛ̂,
ná pyiŋkanni na yii à kàntugo wà yii yasunɲyʼá ke,
mà bâra lire na,
Kileŋi ɲyii wuŋi u ɲyɛ Kileŋi sèe wuŋi ke,
yii à ɲɛɛ uru na maa u pêre,
sùpyire puni na yire yu.
10 Pi à li cè mú na yii na Kile Jyaŋi Yesu sigili.
Kile à u ɲɛ̀ a yige kwùŋi i,
uru u sí n‑yîri nìɲyiŋi na mpa wuu shwɔ Kile lùyirini nimpani na.