Lɛtɛrɛŋi Poli à tun Filipi kànhe dánafeebilʼá ke
Mpe yii à yaa yii cè mà jwo yii jyè lɛtɛrɛŋi funŋɔ jwumpe e ke
Filipi kànhe na mpyi Masedoni kùluni kànhe kà. Yahutuubii mpyi a ɲyaha wani mɛ, pi mú bá mpyi a shiin kɛ kwɔ̀ si nta nɔ pi Kile Jwumpe kàlambaga faanra mɛ.
Tèni i Poli à sà Jwumpe Nintanmpe jwo wani ke, lire tooyʼe pìlʼà piye kan Yesu á maa mpyi dánafee (Kapyiiŋkii 16.11-40). Dánafeebii kuruŋke shiinbii fànha mpyi supyishiŋi sanŋi, Yahutuubii mpyi a ɲyaha pi e mɛ. Lire kàntugo u kùsheeni là tooyʼe, fànhafeebilʼà u cû a tò kàsuŋi i Jwumpe Nintanmpe ɲjwuŋi kurugo. Filipi dánafeebilʼà yire lógo ke, maa wà tun ná bùɲyɛ yaayʼi, u sà ŋkan u á kàsuŋi i. Ɲyɛ Poli à ŋge lɛtɛrɛŋi sémɛ mà u yaha kàsuŋi i, maa fwù kan pi á. U jwumpʼà yyaha tíi ná funntange e, ŋkemu i dánafeebilʼà yaa pi pyi yyefuge tèrigilʼe ke.
Poli à li cya Filipi dánafeebilʼá pi mbèŋi yaha u kwòro pi ná piye shwɔhɔlʼe. Yesu Kirisita à uye tîrige pyiŋkanni ndemu na ke, maa li cya pi á, pi piye tîrige piyʼá lire pyiŋkanni na.
Cyelentiibii kafinivinibii pìi mú na mpyi wani, pire la mpyi si fànha cyán dánafeebii na pi raa Yahutuubii saliyaŋi kurigii ɲaare. Pìi sí na mpyi wani, pire mpyi na pi ɲyii karigii kanni pyi. Poli à ɲje yɛrɛyi kan dánafeebilʼá mà taha cyire kapyaagii shuunniŋi na, bà pi si mpyi sʼa piye kàanmucaa mɛ.
Ŋge lɛtɛrɛŋi funŋɔ jwumpʼà li cyêe na Filipi dánafeebii kyalʼà táan Poli á sèe sèlʼe.