Lɛtɛrɛŋi Poli à tun Filipi kànhe dánafeebilʼá ke
Jwumpe tasiige
1
Mii Poli ná Timɔti,
wuu pi ɲyɛ Yesu Kirisita báarapyii ke,
wuu pi à ŋge lɛtɛrɛŋi sémɛ,
si ŋkan yii Kile wuubii ná yii kàanmucyafeebii ná tɛgɛfeebilʼá,
yii pi ɲyɛ Yesu Kirisita wwoɲɛɛge e,
Filipi kànhe e ke.
2 Wuu Tuŋi Kile ná wuu Kafooŋi Yesu Kirisita pi ɲwɔ yii na,
pi i yyeɲiŋke kan yii á.
Poli à li cyêe Filipi dánafeebii na na pi kyalʼà táan urʼá
3 Tère o tère e mii à sɔ̂nŋɔ yii kyaa na ke,
mii maha fwù kan Kile á.
4 Mii aha a Kile ɲáare yii kyaa na tère o tère e ke,
mii maha u ɲáare ná funntange e,
5 ɲaha na yɛ mà lwɔ́ ku tasiige e mà pa nɔ fo numɛ na,
yii à mii tɛ̀gɛ Jwumpe Nintanmpe ɲjwuŋi na.
6 Kileŋi u à uru báaraŋi niɲcɛnŋi sìi yii e ke,
mii à tɛ̀ɛn ná lʼe na u sí uru pyi yii e,
zà nɔ u tɛgɛni na Yesu Kirisita cannuruge.
7 Mii à yaa mii u a sɔ̂nŋi lire sɔ̀nŋɔŋkanni na yii kyaa na,
ɲaha na yɛ yii kyalʼà waha mii na sèlʼe.
Mà mii yaha kàsuŋi i,
lire ɲyɛ mɛ mà mii yaha mii u Jwumpe Nintanmpe báami maa pu pyàagii sɛ́nmɛge na ɲcyêre sùpyire na,
Kile à ɲwɔ mii na maa uru báaraŋi ŋgemu kan mii á ke,
yii à pyi mii wwoɲɛɛ uru báaraŋi i.
8 Kile yabiliŋʼà li cè na bà Yesu Kirisita à wuu kyaa táan uyʼá mɛ,
amuni yii kyalʼà táan mii á sèe sèlʼe.
9 Nde mii na ɲáare Kile á ke,
lire li ɲyɛ,
tàange ku ɲyɛ yii ná yiye shwɔhɔlʼe ke,
kuru kʼa sì yyaha na,
yii i yákilifente ná ɲcèŋi sèe wuŋi ta,
10 bà li si mpyi ndemu lʼà yaa ná yii e ke,
yii i lire cè mɛ.
Lire e yii sí n‑pyi sùpyii mpiimu pi à tíi,
maa mpyi tìgire cyaga baa,
fo zà nɔ Yesu Kirisita cannuruge na ke.
11 Yii karigii puni sí raa n‑pyi ntìiŋi funŋke e ná Yesu Kirisita fànhe e.
Lire li sí mɛtange ná pèente taha Kile na.
Poli kàsuŋi ɲjyìŋʼà Jwumpe Nintanmpe pyi pʼà nɔ cyeye niɲyahayʼe
12 Mii cìnmpyiibii,
mii la ɲyɛ yii i li cè na kyaage kʼà mii ta ke,
kuru bá à pyi kaɲuŋɔ mà shinɲyahara pyi tʼà Jwumpe Nintanmpe lógo.
13 Ɲaha kurugo yɛ saanbwɔhe pyɛngɛ shiinbii ná sùpyire sannte punʼà li cè na Kirisita kurugo pi à mii cû a pwɔ naha kàsuŋi i.
14 Lire e mii kàsuŋi ɲjyìŋi kurugo,
mpii pi à dá Kafooŋi Yesu na ke,
pire niɲyahara à piye waha Kile jwumpe ɲjwuŋi na sùpyirʼá,
fyagara baa.
15 Sèe wi,
pìi maha Kirisita kyaa yu mii báaraŋi yiɲcyɛge ná u ɲyipɛɛnni na,
ŋka pìi maha u kyaa yu ná funvyinge e.
16 Pire maha uru báaraŋi pyi tàange funŋke e,
ɲaha na yɛ pi à li cè na mii ɲyɛ naha kàsuŋi i sʼa Jwumpe Nintanmpe báami sùpyirʼá.
17 Ŋka mpii pi ɲyɛ na Kirisita kyaa yu ná mii báaraŋi yiɲcyɛge e ke,
pire funzɔnŋɔre ɲyɛ a ɲwɔ mɛ,
pi maha lire pyi si nta là bâra mii yyefuge na naha kàsuŋi i.
18 Ŋka pi na lire pyi ná funɲcɛnŋʼi yo,
pi ɲyɛ na li pyi ná funɲcɛnŋʼi mà yo,
mii kuro ɲyɛ yire e mɛ.
Kirisita kyaa na yu sùpyirʼá mà kwɔ̀ ke,
lirʼà mii funŋke táan.
Là bá sí n‑bâra mii funntange na,
19 ɲaha na yɛ mii à li cè na yii Kileɲarege ná Yesu Kirisita Munaania fànhe sí cyire kawaagii kɛ̂ɛnŋɛ mpyi mii á,
sí ta kuro.
20 Nde mii ɲyɛ na sigili ná na zòmbilini puni i,
maa na sɔ̀nŋɔre taha li na ke,
lire li ɲyɛ,
mii sì n‑sìi n‑sílege si raa Kirisita pêre ná naye puni i mɛ.
Mii sí raa lire pyi fyagara baa bà mii à li pyi taɲjaa fo mà pa nɔ niɲjaa na mɛ,
ali li mɛ́ɛ ká sàa bɛ̂ ná mii múnaani i.
21 Ɲaha kurugo yɛ mii múnaani ɲyɛ a taha yafyin na ŋke ɲìŋke na Yesu Kirisita wwoɲɛɛge kàntugo na mɛ.
Mii aha ŋkwû,
mii sí kuru wwoɲɛɛge tɔ̀ɔnŋi ta.
22 Ŋka mii u mɔ shì na,
kampyi lire sí n‑jà mii pyi mii u báara niɲcɛnŋɛ pyi sahaŋki,
ɲyɛ mii sàha naha a niɲjwuyo cè mɛ.
23 Mii funŋke na mii shwɔ́hɔli cyire ɲcyii kapyaagii shuunniŋi shwɔhɔlʼe.
Mà kwû,
maa mpyi ná Kirisita e,
lire lʼà táan mii á,
lire tɔ̀ɔnŋi mú u à pêe.
24 Ŋka mii u pyi shì na,
lire li sí n‑pwɔ́rɔ yii á sèlʼe.
25 Mii mú sʼà tɛ̀ɛn ná lire e.
Lire kurugo mii à li cè na mii sí tère pyi yii puni taan,
si yii tɛ̀gɛ,
bà yii si mpyi sʼa sì yyaha na Kile kuni i ná funntange e mɛ.
26 Lire e mii aha núrʼa kàre yii yyére tèni ndemu i ke,
lire sí yii ɲùɲyi yîrige Yesu Kirisita wwoɲɛɛge e.
27-28 Ŋka Jwumpe Nintanmpe pʼà jwo Kirisita kyaa na ke,
yii kapyiiŋkii punʼà yaa cyi yyaha tíi ná purʼe.
Mii ɲyɛ yii shwɔhɔlʼe yo,
mii laagʼà tɔɔn yii na yo,
li tɛgɛni li ɲyɛ mii u lógo na yii na wá a kwôro ɲwɔmɛɛ niŋkin nab,
maa yii sɔ̀nŋɔre pyi niŋkin,
maa yii fànhe pyi niŋkin báaraŋi na,
mpii pi ɲyɛ na Jwumpe Nintanmpe tùnni ke,
bà yii fyagara baa wuubii si mpyi si pire sige lire na mɛ.
Pire u kapyiiŋkilʼà li cyêe na Kile sí pi shi bò,
yii kapyiiŋkii sʼà li cyêe na Kile sí yii shwɔ.
Kile mú sí u à lire yaa,
29 ɲaha na yɛ u à ɲwɔ yii na,
maa yii pyi yii à dá Kirisita na,
lire kanni bà mɛ,
maa yii pyi yii à kyaala u kurugo mú.
30 Mpii pi ɲyɛ na Jwumpe Nintanmpe tùnni ke,
zhìŋi yii mpyi a ɲya mii u leni ná pire e,
ná mii saha na u leni numɛ ke,
uru zhìŋi shiŋi yii na leni numɛ.