Lɛtɛrɛŋi Poli à tun Kɔlɔsi kànhe dánafeebilʼá ke
Poli à Kɔlɔsi dánafeebii shɛ́ɛre
1
Mii Poli u ɲyɛ Yesu Kirisita tùnntunŋɔ mà tàanna ná Kile ɲyii wuuni i ke,
mii ná wuu cìnmpworoŋi Timɔti,
2 u à ŋge lɛtɛrɛŋi tun Kile wuubilʼá Kɔlɔsi kànhe e.
Yii pi ɲyɛ wuu cìnmpyiibii pi à taha Kirisita fye e tèrigii puni i ke,
wuu Tuŋi Kile u ɲwɔ yii na,
u u yyeɲiŋke kan yii á.
Poli à fwù kan Kile á Kɔlɔsi dánafeebii kyaa na
3 Ɲyɛ tèrigii puni i wuu aha a si raa Kile ɲáare yii kyaa na,
uru ŋgemu u ɲyɛ wuu Kafooŋi Yesu Kirisita Tuŋi ke,
wuu maha u shɛ́ɛre,
ɲaha na yɛ
4 pyiŋkanni na yii à dá Yesu Kirisita na ke,
ná pyiŋkanni na Kile wuubii puni kyalʼà táan yii á ke,
wuu à yire lógo.
5 Yii à yii sɔ̀nŋɔre taha yaage ŋkemu na,
ná yii sí kuru ta nìɲyiŋi na ke,
kuru ku ɲyɛ yii dániyaŋi ná yii tàange ɲùŋke.
Jwumpe Nintanmpe pu ɲyɛ sèeŋi,
ná pʼà fyânha a nɔ yii na ke,
purʼà ku kyaa jwo.
6 Puru jwumpʼà nɔ diɲyɛŋi puni na bà pʼà nɔ yii na mɛ,
pʼà yasɛrɛ pyi,
maa mpúgo.
Pu na lire pyi yii shwɔhɔlʼe mú,
mà lwɔ́ yii à Kile kacɛnni kyaa lógo,
maa li cè sèe sèlʼe ke.
7 Wuu ntàannamabaarapyiɲɛɛŋi Epafirasi à yii kâla yire cyeyi na.
Kirisita báarapyi niɲcɛnŋɛ u ɲyɛ u wi yii shwɔhɔlʼe.
8 Kile Munaani à tàange ŋkemu le yii e ke,
u à kuru kyaa jwo wuu á.
Poli na Kile ɲáare Kɔlɔsi dánafeebii kyaa na
9 Lire lʼà li ta,
mà lwɔ́ canŋke wuu à yii kyaa lógo ke,
wuu na Kile ɲáare yii á tèrigii puni i.
Wuu na u ɲáare,
nde u la ɲyɛ yii a mpyi ke,
bà yii si mpyi si lire sɛ́nmɛgɛ ɲcè mɛ.
U u yákilifente kan yii á,
bà yii si mpyi sʼa u karigii ɲaa sʼa ɲcwúu mɛ.
10 Lire e yii toroŋkanni sí Kafooŋi Kile wuuni lwɔ́,
sʼa u ɲyii wogigii kanni pyi,
sʼa kacɛnŋkii shiŋi puni pyi,
sʼa sì yyaha na Kile ɲcèŋi i.
11 Kile Siŋi Punifoo sí raa fànhe kaan yii á,
bà yii si mpyi si yii kaleŋkii puni kwú ná funntange ná funɲiŋke e mɛ.
Kirisita ɲyɛ diɲyɛŋi puni ɲùŋɔ na
12 Yaayi Tufooŋi Kile à yaha u bɛ̀ɛnmpe e nìɲyiŋi na,
u wuubii mɛɛ na ke,
yii a fwù kaan u á yire kurugo,
ɲaha na yɛ u à yii le yire tafeebilʼe.
13 U à wuu dìrʼa yige numpini fànhe e mà le u Jyaŋi saanre e,
uru ŋgemu kyaa lʼà táan u á ke.
14 Uru cye kurugo Kile à wuu ɲùŋɔ wwû kapegigii bilere e,
maa cyi yàfa wuu na.
15 Uru u ɲyɛ Kileŋi niɲyambaaŋi nàɲjaŋi,
uru u à fànha tò Kileŋi yayaayi puni na,
16 ɲaha na yɛ uru cye kurugo Kile à diɲyɛŋi yaayi puni dá,
nìɲyiŋi wuyi ná ɲìŋke wuyi,
yaayi niɲyayi ná niɲyambaayi,
mu à jwo ɲje yi ɲyɛ saanre ná kafente ná ɲùŋufente ná fànhafente e ke,
yire yaayi punʼà dá u cye kurugo,
maa dá u mɛɛ na.
17 Uru u ɲyɛ yaayi puni yyaha na,
uru cye kurugo yaayi punʼà yiye cû.
18 Uru u ɲyɛ dánafeebii kuruŋke ɲùŋkea.
Kuru na ɲyɛ sùpyaŋi cyeere fiige,
uru u ɲyɛ kuru tasiige,
ɲaha na yɛ uru u à pyi shincyiiwe mà ɲɛ̀ a fworo kwùŋi i.
Lire na,
u à yyahayyereŋi lwɔ́ karigii puni i.
19 Lʼà táan Kile á,
cyeyi puni yi ɲyɛ urʼe ke,
na yire yi pyi u Jyaŋi i.
20 Uru cye kurugo Kile à mbèŋi cya ná yaayi puni i.
Sìshange u à wu kworokworocige na ke,
ná kurʼe Kile à yyeɲiŋke kan ɲìŋke ná nìɲyiŋi yaayi punʼá.
21 Tèecyiini i,
yii sɔ̀nŋɔpeere ná yii kapyiiŋkii mpyi a li cyêe na yii laage mpyi a tɔɔn Kile na,
maa mpyi u zàmpɛnmii.
22 Ŋka u Jyaŋi à pa mpyi sùpya maa ŋkwû.
U kwùŋi cye kurugo,
Kile à yii ná uru shwɔ̀hɔŋi yalʼa ɲwɔ.
Lirʼà pyi bà Kile si mpyi si yii fwɔnrɔ baa wuubii ná yii tìgire baa wuubii yaha yii yyére u yyahe taan si ɲɛɛ yii na mɛ.
23 Ŋka fo yii aha yiye pwɔ Kile kuni i,
maa tayyérege niɲcɛnŋɛ wwû,
yaage na yii sɔ̀nŋɔrʼà taha nìɲyiŋi na ke,
maa mpyi yii ɲyɛ a funŋɔ wwɔ̀ kuru na mɛ.
Kuru yaage kyaa Jwumpe Nintanmpe ɲyɛ na yu.
Yii à pu lógo,
pʼà jwo ɲìŋke sùpyire punʼá mú.
Puru jwumpe ɲjwuŋi kurugo,
Kile à mii Poli pyi u báarapyi.
Poli na zhìŋi leni dánafeebii kurugo
24 Ɲyɛ mii cìnmpyiibii,
yyefuge e mii ɲyɛ naha numɛ yii kurugo ke,
kurʼà táan mii i,
ɲaha na yɛ Kirisita ná dánafeebii kuruŋkʼà kwôro kuru yyefuge e fo mà sà nɔ tèni là na,
mii sí na nàzhanŋi pyi kurʼe,
bà dánafeebii kuruŋke si mpyi sʼa sì yyaha na mɛ.
25 Mii à pyi dánafeebii kuruŋke báarapyi,
Kile u à mii yaha uru báaraŋi na yii á.
Mii à yaa mii u Kile jwumpe puni jwo yii á.
26 Lʼà mɔ,
puru jwumpe mpyi a ŋwɔhɔ sùpyire puni na,
ŋka numɛ pʼà jwo a nɔ Kile sùpyiibii na.
27 U la mpyi si lire kaŋwɔhɔni nisinani nimbwooni cyêe supyishiŋi puni na.
Lire kaŋwɔhɔni li ɲyɛ:
Kirisita ɲyɛ yii e,
lire lʼà yii pyi yii à tɛ̀ɛn ná lʼe na yii sí n‑pyi shinbwoo Kile yyére.
28 Wuu na Kirisita kyaa yu sùpyire punʼá,
marii pi yɛrɛge maa pi kâlali ná yákilifente e,
bà pi si mpyi si fûnŋɔ Kile kuni i,
Kirisita wwoɲɛɛge cye kurugo mɛ.
29 Lire kurugo mii ɲyɛ na báaraŋi pyi.
Kirisita à fànhe ŋkemu kan mii á ke,
ná kure e mii na zhìŋi leni.
Kuru fànhe ku maha síŋi kaan mii á.