Poli à Timɔti tun Tesaloniki kànhe dánafeebilʼá
3
Ɲyɛ wuu à mɔ a yii kyaa lógo fo li ɲyɛ a pa ɲwɔ mɛ,
ka wuu u li lwɔ́ wuye funŋʼi,
maa ntɛ̀ɛn naha Atɛni kànhe e,
2 maa wuu cìnmpworonaŋi Timɔti tun yii á,
bà u si mpyi si yii tɛ̀gɛ yii a sì yyaha na Kile kuni i,
si màban le yii e mɛ.
Kile báarapyiɲɛɛ u ɲyɛ u wi Jwumpe Nintanmpe ɲjwuŋi kurugo,
puru mpemu pu ɲyɛ na Kirisita kyaa yu ke.
3 Wuu à lire pyi bà li si mpyi yyefuge ku ɲyɛ yii ɲuŋʼi ke,
kuru kà ŋkwɔ̀ màban fô yii e mɛ.
Yii yabilimpilʼà li cè na kuru yyefuge yahare e wuu ɲyɛ.
4 Mà wuu yaha wani yii yyére,
wuu mpyi maha yi yu yii á na yyefugo karii sí n‑pa wuu dánafeebii ta.
Ɲyɛ bà yii ɲyɛ na li ɲaa mɛ,
kuru yyefuge e yii ɲyɛ numɛ.
5 Lire kurugo lʼà pa tayyérege fô mii na,
ka mii i Timɔti tun yii yyére u u sà yii Kile kuni ɲaaraŋkanni kàanmucya u pa jwo na á,
ɲaha na yɛ mii mpyi na fyáge Sitaanniŋi kà ŋkwɔ̀ yii sɔ̀n n‑yige Kile kuni i,
si wuu báaraŋi pyi ɲùŋɔ baa mɛ.
6 Ŋka Timɔti à núrʼa pa a yîri yii yyére ke,
jwumpe u à jwo wuu á mà yyaha tíi ná yii Kile kuni ɲaaraŋkanni ná yii ntàannamagare e ke,
purʼà wuu funɲyi ɲíŋɛ.
U à jwo wuu á mú na yii funŋɔ wà à wwɔ̀ wuu na mɛ,
na bà wuu la ɲyɛ si yii ɲya mɛ,
amuni yii la mú ɲyɛ si wuu ɲya.
7 Lire kurugo wuu cìnmpyiibii,
wuu à yire lógo ke,
ali mà li ta wuu ɲyɛ yyefuge ná nàvunŋke e,
yii Kile kuni ɲaaraŋkannʼà wuu funɲyi pyi yʼà ɲíŋɛ.
8 Numɛ,
wuu yákilibilʼà tɛ̀ɛn,
ɲaha na yɛ yii à kwôro Kafooŋi wwoɲɛɛge e.
9 Yii kanʼà wuu funɲyi táan pyiŋkanni ndemu na ke,
wuu bá naha à cè pyiŋkanni na wuu sí Kile shɛ́ɛre n‑jwo mɛ.
10 Wuu na Kile ɲáare sèe sèlʼe pìlaga bâra canŋa na,
bà u si mpyi si wuu yaha wuu núrʼa sà fworo yii na mɛ,
lire cye kurugo cyeyi yi ɲyɛ yii sàha ŋkwɔ̀ a yire cè Kile kuni i mɛ,
bà wuu si mpyi si yii taanna yire na mɛ.
11 Lire kùluni tɔɔge wuu sí n‑lwɔ́ si ŋkàre yii yyére ke,
wuu Tuŋi Kile ná wuu Kafooŋi Yesu u kuni pwɔ́ wuu á.
12 Ntàannamagare ti ɲyɛ yii ná yiye shwɔhɔlʼe ná yii ná sùpyire sannte shwɔhɔlʼe ke,
Kafooŋi u là bâra tire na sèlʼe,
bà u a là bâra wuu woore na mà yyaha tíi ná yii e mɛ.
13 Lire ká mpyi,
yii sí fànha ta,
si ŋkwôro tufeempe e si mpyi tìgire cyaga baa wuu Tuŋi Kile yyahe taan,
Kafooŋi Yesu cannuruge e ná u wuubii puni i.