Ŋkèeŋi mɛɛni
135
Yii Kafooŋi kêe!
Yii Kafooŋi Kile mɛge kêe!
Yii u kêe,
yii pi ɲyɛ na báare Kafooŋi à ke,
2 yii pi ɲyɛ na báare Kafooŋi bage e,
wuu Kile bage ntaani na ke.
3 Yii Kafooŋi kêe,
ɲaha na yɛ Kafooŋi à ɲwɔ,
yii u mɛge kêe myagilʼe,
ɲaha na yɛ,
u mɛgʼà táan.
4 Kafooŋi à Yakuba cwɔɔnrʼa pyi uye wu,
maa Izirayɛli pyi uye nàzhan.
5 Sèeŋi na,
mii à li cè na Kafooŋi à pêe,
na wuu Kafooŋi à pêe kilebii puni na.
6 Nde lʼà táan Kafooŋi á ke,
lire u maha mpyi,
nìɲyiŋi ná ɲìŋke na,
mà bâra suumpe lwɔhe ná kacyewyicuguyi na.
7 U maha ɲahaɲi yîrige fo ɲìŋke tɛgɛni na,
u maha kileɲini pyi zànhe tooyʼe,
maa kafɛɛge yige ku tabegege e.
8 Uru u à Misira kìni pyìcyiibii bò,
mà lwɔ́ sùpyiibii na mà sà nɔ yatɔɔre na.
9 U à kacyeeŋkii ná kakyanhala karigii pyi Misira shinbii shwɔhɔlʼe,
maa Farɔn ná u báarapyiibii puni kyaala.
10 U à supyishi niɲyahawa bwɔ̀n,
maa saanbii fànhaɲyahaga wuubii pìi bò,
11 pire pi ɲyɛ:
Siyɔni,
Amɔri shiinbii saanŋi
ná Ɔgi,
Basan saanŋi
ná Kana kìni saanbii puni.
12 U à pire u kìni taare kan kɔɔgɔ,
u à ti kan kɔɔgɔ u wuubii,
Izirayɛli shiinbilʼá.
13 Kafooŋi,
mu mɛge sí n-kwôro fo tèekwombaa,
Kafooŋi,
yyeɲwɔyi puni sí raa sɔ̂nŋi mu kyaa na.
14 Kafooŋi sí u shiinbii tanga kan,
si ɲùɲaara ta u báarapyiibii na.
15 Sùpyire kacyanhigii na ɲyɛ wyɛ́rɛfyin ná sɛɛn wogii,
sùpyaŋi cyɛge kʼà cyire yaa.
16 Ɲwɔge na ɲyɛ cyi á,
ŋka cyi ɲyɛ na yu mɛ,
ɲyiigii na ɲyɛ cyi á,
ŋka cyi ɲyɛ na ɲaa mɛ.
17 Niŋgyiigii na ɲyɛ cyi á,
ŋka cyi ɲyɛ na núru mɛ,
ŋɔnɔ ɲyɛ a sìi na fwore cyi ɲwɔyʼi mɛ.
18 Cyi yaafeebii ná mpii pi à pi sɔ̀nŋɔre taha cyi na ke,
pire sí n-pyi cyi fiige.
19 Izirayɛli bage,
yii a Kafooŋi kêre.
Arɔn bage,
yii a Kafooŋi kêre.
20 Levi bage,
yii a Kafooŋi kêre.
Yii pi ɲyɛ na fyáge Kafooŋi yyaha na ke,
yii a Kafooŋi kêre.
21 Kafooŋi mɛge ku kêe Siyɔn e,
uru u à Zheruzalɛmu pyi u tatɛɛnge.
Yii Kafooŋi kêe.