Kile na ɲyɛ ɲwɔmɛɛfoo
12
Mɛceŋkuruŋke yyaha yyére shinŋʼá,
mɛɛni Dawuda à cêe Kile á ná ŋkɔ̀nnɔŋi mɛɛpyaa baataanre wuŋʼi ke.
2 Wuu shwɔ,
Kafooŋi Kile.
Ɲaha na yɛ,
wà saha sì n-jà u cyage taha sùpya na mɛ.
3 Pi maha finni piyʼá.
Pi maha sùpyire báama báama jwumpe yu pi ɲwɔyi i,
ŋka pi maha yu ná funɲyɔ shuunni i.
4 Mpii pi ɲyɛ na sùpyire báami marii kèebwoyi yu ke,
Kafooŋi u pire ɲwɔseeyi kwɔ̀n
5 Mpii pi maha jwo:
«Wuu à yaayi puni ta wuu sìnɲcyiimɛ jwumpe cye kurugo.
Wuu ɲjìrigii cye kurugo wuu à pyi mɛgɛfee.
Wuu ɲwɔge maha wuu tɛ̀gɛ.
Wuu sàha ɲyɛ na fyáge wà yyaha na mɛ.»
6 Ŋka numɛ,
pi maha fànhe cyáan mpimu na ke,
pire ná fòŋɔfeebii pi na myahii súu ke,
Kafooŋi à jwo,
mii sí sùsuro le pire kurugo.
7 Kafooŋi jwumpʼà fíniŋɛ,
pu na ɲyɛ mu à jwo wyɛ́rɛfyin sêe wu,
ŋgemu u à le nage e maa u kàanmucya fo tooyo baashuunni i ke.
8 Mu,
Kafooŋi,
mu maha wuu kàanmucaa,
mu maha wuu shwuu mpii shinpiibii na tèrigii puni i.
9 Pire shinpiibii na ɲaare cyeyi puni i.
Pegʼà fànha ta Adama pyiibii shwɔhɔlʼe.