Kile à Dawuda cwɔɔnrɔ mà pyi saanwa
16
Ka Kafooŋi si Samuwɛli pyi:
«Mu sí yyahe tanha n-yaha Soli kurugo zà nɔ fo ɲaha tère na yɛ?
Mii yabiliŋi u à cyé u na,
u sàha sì n-pyi Izirayɛli shiinbii saanŋi mɛ.
Ɲɛni ɲî sìnmpe na,
ma a kuni lwɔ́.
Mii sí mu tun Zhese yyére Bɛtilɛhɛmu kànhe e,
ɲaha kurugo yɛ,
mii à na ɲyii saanŋi cwɔɔnrɔ u jyaabii shwɔhɔlʼe.»
2 Ka Samuwɛli si jwo:
«Di mii sí ŋkàre ɲjwo yɛ?
Soli ká yi lógo,
u sí mii bò.»
Ka Kafooŋi si u pyi:
«Nùpyaŋi wà cû ma a sì ma a sà yi jwo na mu à pa mpa sáraga wwû Kafooŋi á.
3 Ma a Zhese yyére sárage ŋgùŋi na,
nde mu à yaa mu u pyi ke,
mii sí lire cyêe mu na.
Mii aha ŋgemu cyêe ke,
ma a uru tìri ma pyi saanwa.»
4 Ka Samuwɛli si li pyi Kafooŋi li jwuŋkanni na,
maa ŋkàre Bɛtilɛhɛmu i.
Ka Samuwɛli mpaŋi si kànhe kacwɔnribii pyi pi à fyá.
Ka pi i jwo:
«Kʼà táan la?»
5 Ka u u jwo:
«Ɔɔn!
Mii à pa mpa sáraga wwû Kafooŋi á.
Yii yiye fíniŋɛ yii raa ma sárage tawwuge e ná mii i.»
Ka u u Zhese ná u jyaabii fíniŋɛ,
maa pi yyere na pi a sì sárage tawwuge e.
6 Pi à nɔ wani ka u u Eliyabu ɲya ke,
ka u u jwo uye funŋʼi:
«Nàkaana bàa,
Kafooŋi niɲcwɔnrɔŋi u ɲyɛ ŋge u yyaha taan.»
7 Ka Kafooŋi si Samuwɛli pyi:
«Ma hà ŋgíi u cyerekyaanni ná u tɔɔnre na mɛ,
ɲaha kurugo yɛ,
uru bà mii à cwɔɔnrɔ mɛ.
Sùpyire kàanmucyage pyiŋkanni ná Kafooŋi woge pyiŋkanni ɲyɛ niŋkin mɛ.
Nde sùpyaŋi sí n-jà ɲya u ɲyiigii na ke,
lire u maha wíi,
ŋka Kafooŋi maha zòmbilini wíi.»
8 Ɲyɛ ka Zhese si Abinadabu yyere u sà ntòro Samuwɛli yyaha yyére.
Ka Samuwɛli si jwo:
«Kafooŋi mú ɲyɛ a ŋge cwɔɔnrɔ mɛ.»
9 Ka Zhese si jwo na Sama u sà ntòro.
Ka Samuwɛli si jwo:
«Kafooŋi mú ɲyɛ a ŋge cwɔɔnrɔ mɛ.»
10 Ka Zhese si u jyaabii baashuunniŋi puni pyi pi à sà ntòro Samuwɛli yyaha yyére,
ka Samuwɛli si u pyi:
«Ŋge wà bà Kafooŋi à cwɔɔnrɔ mɛ.»
11 Lire kàntugo,
ka Samuwɛli si Zhese pyi:
«Mu jyaabii puni pi ɲyɛ mpii la?»
Ka Zhese si u pyi:
«Pi puni kàntugowuŋi u à kwôro numɛ,
ŋka uru na ɲyɛ mpàabii tanahage e.»
Ka Samuwɛli si Zhese pyi:
«Wà tun u sà u yyere,
ɲaha kurugo yɛ,
ná u ɲyɛ a pa mɛ wuu sì sárage lyî mɛ.»
12 Ɲyɛ ka Zhese si wà tun u à sà u jyaŋi Dawuda yyerʼa pa.
Nàɲjyisinaana li mpyi li li maa ɲáaŋa.
U ɲyiigii lemɛ mpyi a ɲwɔ.
Ka Kafooŋi si Samuwɛli pyi:
«Yîri maa u tìri,
ŋge wi.»
13 Ka Samuwɛli si ɲɛni lwɔ́ ná sìnmpe e,
maa u tìri u yyahafeebii ɲyii na.
Mà lwɔ́ kuru canŋke na,
ka Kafooŋi Múnaani si ntîge Dawuda ɲuŋʼi.
Ka Samuwɛli si yîrʼa kàre Arama kànhe e.
Dawuda à yyerʼa kàre Soli yyére
14 Kafooŋi Munaani à pa fworo Soli i,
ka Kafooŋi si múnapiini là pyi lʼà jyè u e na ŋkyérege.
15 Ka Soli báarapyiibii si u pyi:
«Wíi,
Kile à múnapiini là pyi lʼà jyè mu i na mu kyérege.
16 Wuu ɲùŋufooŋi,
yà jwo.
Wuu,
mu báarapyiibii na ɲyɛ mu yahare e.
Wuu sí sùpya cya mu á ŋgemu u ɲyɛ na jìni ŋkɔ̀nnɔbwɔɔnni na ke.
Múnapiini Kile à pyi lʼà jyè mu i ke,
lire ká mu cyán,
ŋkɔ̀nnɔbwɔnŋi sí raa ŋkɔ̀nnɔŋi bwùun,
lire sí n-yaa ná mu i.»
17 Ka Soli si u báarapyiibii pyi:
«Ɲyɛ,
yii wà cya yii a ma,
ŋgemu u ɲyɛ na jìni ŋkɔ̀nnɔnbwɔɔnni na sèlʼe ke.»
18 Ka u báarapyiŋi wà si jwo:
«Mii à Bɛtilɛhɛmu kànhe shinŋi Zhese jyaŋi wà cè ŋgemu u ɲyɛ na jìni ŋkɔ̀nnɔnbwɔɔnni na sèlʼe ke.
U ɲùŋkʼà waha,
u na jìni kàshige na,
u à jwumpe cè,
u lemɛ mú à ɲwɔ.
Kafooŋi na ɲyɛ ná u e.»
19 Ka Soli si pìi tun Zhese á pi i sà yi jwo u á:
«Mu jyaŋi Dawuda u ɲyɛ na mpàabii nâha ke,
u yaha u u pa mii yyére.»
20 Ka Zhese si dùfaanŋke kà cû,
maa ku tugo bwúuru ná ɛrɛzɛn sinmɛ na sɛɛgɛ borʼe,
mà bâra sikabile na,
mà kan u jyaŋi Dawuda á,
u sà ŋkan Soli á.
21 Ka Dawuda si ŋkàre Soli yyére,
ka Soli si u yaha báaraŋi na.
Ka u kyaa si ntáan Soli á,
ka u u u pyi u kàshikwɔnyaayi lwófooŋi.
22 Ka Soli si tùnntunŋɔ tun u sà yi jwo Zhese á:
«Mii à mu ɲáare maa Dawuda yaha u tɛ̀ɛn naha mii yyére báaraŋi na,
ɲaha kurugo yɛ,
u kyalʼà táan mii á.»
23 Kile ná mpyi a múnapiini pyi lʼà Soli cyán tère o tère e ke,
Dawuda mpyi maha ŋkɔ̀nnɔŋi lwɔ́ na bwùun u á.
Lire mpyi maha yaa ná Soli i,
u mpyi maha uye ta,
múnapiini mpyi maha láha u na.