Dawuda ná Goliyati kàshige
17
Filisi shiinbilʼà pi kàshikwɔɔnbii bínni kàshige mɛɛ na.
Pi à piye bínni Soko kànhe e Zhuda kùluni i,
maa sà pi tatɛɛnge yaa Efɛsi-Damimu i,
Soko ná Azeka shwɔhɔlʼe.
2 Ka Soli ná Izirayɛli shiinbii mú si piye bínni maa sà pi tatɛɛnge yaa Ela tafage e,
maa piye bégele kàshige mɛɛ na si Filisi shiinbii tùn.
3 Filisi shiinbii mpyi ɲaŋke kà na,
Izirayɛli shiinbii sí ɲyɛ ɲaŋke kabɛrɛ na.
Ɲaɲyi shwɔ̀hɔŋi tafage mpyi pi shwɔhɔlʼe.
4 Ka kàshikwɔnmpege kà si fworo Filisi shiinbii shwɔhɔlʼe mà pa yyére Izirayɛli shiinbii yyaha yyére.
U mɛgɛ na mpyi Goliyati.
Gati kànhe shin u mpyi u wi.
U tɔɔnre mpyi kàsinmɛɛni sinagii baani ná kampelaaga niŋkin.
5 Dàɲyɛ tɔɔnnɔ ɲùntoŋɔ mpyi u à tò maa tɔɔnnɔ vàanntinŋɛ le.
Kuru mpyi kwooyo,
fyákwooyo fiige,
ku dugumpe mpyi cúlii beetaanre (60).
6 Dàɲyɛtɔɔnnte mpyi a tɛ̀gʼa u tooyi tò,
ŋaga dàɲyɛtɔɔnnɔ wogo sí ɲyɛ u tùbuŋi i.
7 U tàanŋi cinŋke mpyi soocinŋi vàanmyigile cinŋke fiige,
ku pyàŋi kanni dugumpe mpyi a cúlii baashuunni kwɔ̀.
Ŋge u mpyi a u tɔɔnnte yabeŋke cû ke,
uru mpyi u yyaha yyére.
8 Ka uru Filisi shinŋi si sà yyére Izirayɛli shiinbii yyaha yyére maa jwo pi kàshikwɔɔnbilʼá:
«Ɲaha kurugo yii à fworʼa taanna kàshige mɛɛ na yɛ?
Mii bà u ɲyɛ Filisi shinŋi,
yii sí ɲyɛ Soli báarapyii mà?
Yii shin niŋkin cwɔɔnrɔ u u ntîge naha na fye e,
u u mpa na tùn.
9 U aha jà mii na,
maa mii bò,
wuu sí n-pyi yii bilii.
Ŋka,
mii aha jà u na maa u bò,
yii sí n-pyi wuu bilii sʼa báare wuu á.»
10 Ka Filisi shinŋi si núrʼa jwo:
«Izirayɛli kàshikwɔɔnbii,
kampyi yii na ɲyɛ nàmbaa niɲjaa,
yii shin niŋkin yige naha,
mii ná uru sí wuye cû.»
11 Soli ná Izirayɛli shiinbii punʼà Filisi shinŋi jwumpe lógo ke,
ka pi zòompii si ŋkwòro,
ka pi i fyá sèlʼe.
12 Dawuda na mpyi Efirati shin mà yîri Bɛtilɛhɛmu kànhe,
Zhuda kùluni i.
U tuŋi mɛgɛ mpyi Zhese.
Jyaa baataanre na mpyi Zhese á.
Soli tèni mpyi a u ta u à lyɛ sèlʼe.
13 Zhese jyaabii niɲjyeebii taanreŋi mpyi ná Soli i kàshige cyage e.
Pire e,
niɲjyeŋi mɛgɛ mpyi Eliyabu,
shɔnwuŋi mɛge mpyi Abinadabu,
tanrewuŋi mɛge sí ɲyɛ Sama.
14 Dawuda u mpyi pi puni cɔɔnŋi.
Tèni i u yyahafeebii taanreŋi mpyi ná Soli i kàshige cyage e ke,
15 Dawuda mpyi maha yîri Soli pyɛnge e maha si na u tuŋi mpàabii nâha Bɛtilɛhɛmu i.
16 Filisi shinŋi mpyi maha fwore na uye cyêre canŋa maha canŋa,
ɲyɛ̀ge ná yàkoŋke,
mà sà nta canmpyaa beeshuunni.
17 Canŋka,
ka Zhese si u jyaŋi Dawuda pyi «Ŋke sùmafwɔge boɲyɛge niŋkinŋke lwɔ́ ma bâra ɲje bwúuru ɲùɲyi kɛŋi na ma a fyâa ma a si ma sà ŋkan ma yyahafeebilʼá kàshige cyage e.
18 Ŋge nùyeŋi yìrigii kɛŋi lwɔ́ mú ma sà ŋkan pi kàshikwɔɔnbii yyaha yyére shinŋʼá.
Ká mpyi mu yyahafeebilʼà cùuŋɔ,
mu sí yire cè si mpa jwo mii á.
19 Pi ná Soli ná Izirayɛli kàshikwɔɔnbii puni na ɲyɛ Ela tafage e kàshige na,
ná Filisi shiinbilʼe.»
20 Ka Dawuda si sôlʼa yîri,
maa mpàabii yaha nàhafooŋi wà cye e,
maa u yaayi lwɔ́ mà kàre bà u tuŋi Zhese mpyi a yi jwo u á mɛ.
U à sà nɔ kàshikwɔɔnbii tatɛɛnge e mà pire ta pi i fwore sʼa ŋkɛ̀ɛge kàshigʼá,
maa kàshige kwuuyi wàa.
21 Ka Izirayɛli shiinbii kàshikwɔɔnbii ná Filisi shiinbii wuubii si fworʼa yyérʼa yyaha kan piyʼá kàshige mɛɛ na.
22 Ka Dawuda si u yaayi tîrigʼa kan yaayi kàanmucyafooŋʼá,
maa fê a kàre kàshikwɔɔnbii cyage e,
maa sà u yyahafeebii yíbe pi ticuumpe na.
23 Mà u yaha jwumpe na ná pi e,
ka Filisi shiinbii kàshikwɔnmpege,
Gati kànhe shinŋi Goliyati si fworo pi shwɔhɔlʼe mà pa yyére,
maa núru u jwuɲjyempe kurugo.
Ka Dawuda si puru lógo.
24 Izirayɛli shiinbilʼà uru nàŋi ɲya ke,
ka fyagare si sàa pi puni ta,
ka pi i fê u yyaha na.
25 Pi mpyi na ŋko piyʼá:
«Yii à ŋge nàŋi ɲya la?
Izirayɛli shiinbii ɲwɔcwoore kurugo u à fworo.
Ŋgemu ká jà a u bò ke,
saanŋi sí nàfuu niɲyahaga kan urufolʼá,
si u pworoŋi kan urufolʼá,
si u pyɛngɛ shiinbii nàzhan yige múnalwɔɔre ŋgwùŋi i Izirayɛli shiinbii shwɔhɔlʼe.»
26 Nàampii pi mpyi a yyére Dawuda taan ke,
ka u u pire pyi:
«Ŋgemu ká jà a Filisi shinŋi ŋge bò,
maa Izirayɛli shiinbii shwɔ ŋke silige na ke,
ɲaha shi ku sí n-pyi urufolʼá yɛ?
Ɲaha shi ku ɲyɛ ŋge Filisi shinŋi niŋkwɔnmbaaŋi,
sʼa Kile ɲyii wuŋi kàshicyɛge fare yɛ?»
27 Ka pi i núru cyire karigii kurugo mà jwo Dawuda á,
na ŋgemu ká jà a u bò ke,
cyire cyi sí n-pyi urufolʼá.
28 Dawuda yyahafooŋi Eliyabu à Dawuda jwumpe lógo ke,
ka uru lùuni si yîri u taan maa jwo:
«Ɲaha shi mu à pa mpyi naha yɛ?
Jofolʼá mu à mpàgare yaha sige e yɛ?
Mii à mu yàmpeente ná mu cwɔ̀ɔre cè.
Kàshige tawiige e mu à pa.»
29 Ka Dawuda si jwo:
«Ɲaha shi mii à pyi yɛ?
Mii mú kʼàha n-yíbe mà?»
30 Ka u u yîri u yyahafooŋi taan maa ŋkàre wabɛrʼá,
maa yibige ninuge pyi uru na.
Ka sùpyire si u ɲwɔ shwɔ toɲcyiige fiige.
31 Sùpyirʼà Dawuda jwumpe niɲjwumpe lógo ke,
maa ŋkàrʼa sà pu paara Soli á.
Ka uru si pi pyi pi à u yyerʼa pa.
32 Ka Dawuda si Soli pyi:
«Wà kà zìi n-fyá ŋge Filisi shinŋi na mɛ.
Mu báarapyiŋi sí n-sà u tùn.»
33 Ka Soli si Dawuda pyi:
«Mu sì n-jà ŋge Filisi shinŋi tùn mɛ,
ɲaha kurugo yɛ,
mu na ɲyɛ nàŋkocyaawa uru sí ɲyɛ kàshikwɔnwɔ mà lwɔ́ fo u nàŋkocyawuŋi na.»
34 Ka Dawuda si Soli pyi:
«Tèni i mu báarapyiŋi mpyi na u tuŋi mpàabii nâha ke,
cànraga lire ɲyɛ mɛ,
urusia ná mpyi a pa mpàŋi wà cû mpàkuruŋke shwɔhɔlʼe,
35 mii mpyi maha ɲcyán u fye e,
maa u bwɔ̀n,
maa mpàŋi dìrʼa wwû u ɲwɔge e.
U ná mpyi a yyaha kɛ̂ɛnŋɛ mii kurugo,
mii mpyi maha u cû u jwòŋi na maa u bwɔ̀n a bò.
36 Mu báarapyiŋi mpyi maha cànrage ná urusiŋi bò boŋkanni ndemu na ke,
amuni u sí ŋge Filisi shinŋi niŋkwɔnmbaaŋi bò,
ɲaha kurugo yɛ,
u à Kile ɲyii wuŋi kàshicyɛge faha.»
37 Ka Dawuda si núrʼa jwo:
«Kafooŋi u à mii shwɔ cànrage ná urusiŋi na ke,
uru sí mii shwɔ ŋge Filisi shinŋi na mú.»
Ka Soli si Dawuda pyi:
«Ta sì,
Kafooŋi u ma tɛ̀gɛ.»
38 Ka Soli si u kàshikwɔnvaanɲyi le Dawuda na,
maa dàɲyɛŋi ɲùntoŋɔ tò u ɲùŋke na,
maa tɔɔnnɔ vàanntinŋɛ le u na.
39 Ka Dawuda si Soli kàshikwɔnŋwɔɔni mɛɛre tɛ̀gʼa uye cyîbi yire vàanɲyi ɲuŋʼi,
maa sɔ̂nŋi si ɲaare ŋgíi ná yʼe,
ɲaha kurugo yɛ,
u mpyi na sàha ntêlʼa lire shi pyi mɛ.
Ka u u Soli pyi:
«Mii naha na sì n-jà ɲaara ná ɲje kàshikwɔnyaayʼe mɛ,
ɲaha kurugo yɛ,
mii sàha ntêlʼa lire shi pyi mɛ.»
Ka u u yi wwû.
40 Ka u u u kàbiini lwɔ́,
maa sà kafaaya niŋgɔgɔyɔ kaŋkuro cwɔɔnrɔ dùge ɲwɔge na mà le u mpànaha boni,
maa u nàmuruŋke cû cyɛge e,
maa file Filisi shinŋi na.
Dawuda à Goliyati bò
41 Ka Filisi shinŋi mú si wá na filili Dawuda na,
u tɔɔnnte yabeŋke cùvooŋi sí ɲyɛ u yyaha yyére na wà.
42 Ka Filisi shinŋi si Dawuda wíi mà li ɲya na nàŋkocyaawa wi,
u sʼà ɲáaŋa,
u lemɛ sʼà ɲwɔ.
Ka u u ɲcwô u e.
43 Ka Filisi shinŋi si Dawuda pyi:
«Pwun u ɲyɛ mii ka mu u kàbiige lwɔ́ na ma mii á la?»
Ka u u Dawuda láŋa ná u kacyanhigii cyìi mɛyʼe,
44 maa núrʼa jwo:
«Pa naha,
mii sí mu kyaare kan nìɲyiŋi saɲcyɛɛnre ná sigeyaarʼá.»
45 Ka Dawuda si Filisi shinŋi pyi:
«Mu à pa mii mɛɛ na ná kàshikwɔnŋwɔɔni ná ŋaga ná tàanʼi,
ŋka mii sí zhà mu mɛɛ na,
ná Síŋi foo Kafooŋi,
Izirayɛli u Kileŋi mɛge e,
uru ŋgemu mu à faha ke.
46 Niɲjaa,
Kafooŋi sí mu le mii cye e.
Mii sí mu bò,
si mu ɲùŋke kwɔ̀n.
Niɲjaa,
mii sí Filisi kàshicyɛge shiinbii kyaare kan nìɲyiŋi saɲcyɛɛnre ná sigeyaayʼá.
Ɲìŋke sùpyire puni sí li cè na Kile na ɲyɛ ná Izirayɛli shiinbilʼe.
47 Nte supyiɲyahare puni mú sí li cè na Kafooŋi ɲyɛ na ɲcáa kàshikwɔnŋwɔɔ,
lire ɲyɛ mɛ tàan na kàshige e,
si nɛɛ kajampe kan mɛ.
Ɲaha kurugo yɛ,
kàshige kajampe ɲyɛ Kafooŋi cye e,
u mú sí yii le wuu cye e.»
48 Ka Filisi shinŋi si ntílʼa yîrʼa tíi Dawuda na,
ka Dawuda si fê a tíi zàmpɛɛnbii kàmpanŋke na Filisi shinŋi kurugo.
49 U à cyɛge le u boni i,
maa kafaaga niŋkin wwû mà le lèmuruŋke e mà tɛ̀gʼa Filisi shinŋi byɛɛni wà a fûru fo kafaagʼà jyè byɛɛni i.
Ka Filisi shinŋi si ɲcwo a yyahe cyígile ɲìŋke na.
50 Lire pyiŋkanni na Dawuda à jà Filisi shinŋi na,
ná lèmuruŋɔ ná kafaaga niŋkin i.
U à u bò,
kàshikwɔnŋwɔɔ mpyi u á mɛ.
51 Ka u u fê a file Filisi shinŋi na,
maa uru kàshikwɔnŋwɔɔni dìrʼa wwû mà tɛ̀gʼa u ɲùŋke kwɔ̀n.
Filisi shiinbilʼà pi kàshikwɔnmpege ɲya kʼà kwû ke,
ka pi i fê.
52 Ka Izirayɛli shiinbii ná Zhuda shiinbii si ŋkwúulo,
maa ɲcyán Filisi shiinbii fye e mà sà nɔ fo Gati kànhe na,
maa ŋkàre fo Ekurɔn ɲwɔ na.
Filisi shiinbii pi mpyi a bò ke,
pire kwùubii mpyi a cwo cwo Sarayimu kuni na mà sà nɔ fo Gati ná Ekurɔn kànyi na.
53 Izirayɛli shiinbilʼà Filisi shiinbii kɔ̀rʼa kwɔ̀ ke,
maa núrʼa kàre Filisi shiinbii kàshicyɛge tatɛɛnge e,
maa sà pi cyeyaayi kuu.
54 Ka Dawuda si Filisi shinŋi Goliyati ɲùŋke niŋkwɔnge lwɔ́ a kàre Zheruzalɛmu i,
maa Goliyati kàshikwɔnyaayi lwɔ́ a yaha uru yabiliŋi vàanŋke bage e.
55 Tèni i Soli à Dawuda ɲya u u ŋkɛ̀ɛge zà ntùŋke taha Goliyati na ke,
ka u u u kàshicyɛge yyaha yyére shinŋi Abinɛri yíbe:
«Jofoo jya u ɲyɛ ŋge nàɲjiiŋi yɛ?»
Ka Abinɛri si u pyi:
«Saanŋi,
mà sèeŋi jwo,
mii ɲyɛ a cè mɛ!»
56 Ka saanŋi si u pyi:
«Sùpyire yíbe maa ŋge nàɲjiiŋi tuŋi cè a jwo na á.»
57 Ɲyɛ,
Dawuda à Filisi shinŋi bò a kwɔ̀ maa núrʼa pa kàshikwɔɔnbii tatɛɛnge e ke,
ka Abinɛri si u cû a shà Soli yyére.
Filisi shinŋi ɲùŋke mpyi Dawuda cye e.
58 Ka Soli si Dawuda pyi:
«Nàɲjiiwe,
jofoo jya u ɲyɛ mu yɛ?»
Ka Dawuda si u pyi:
«Mu báarapyiŋi Zhese jya u ɲyɛ mii,
mà yîri Bɛtilɛhɛmu i.»