Izirayɛli shiinbii ná Amalɛki shiinbii kàshige
15
Samuwɛli à Soli pyi:
«Mii Kafooŋi à tun mii i sìnmpe tìri mu na si mu pyi u shiinbii,
Izirayɛli saanŋi.
Ɲyɛ,
ɲje Kafooŋi à jwo ke,
yire lógo numɛ.
2 Síŋi foo Kafooŋi à jwo:
“Amalɛki shiinbilʼà ndemu pyi Izirayɛli shiinbii na,
mà kuni kwɔ̀n pi na pi tèefworoni i Misira kìni i ke,
lire na ɲyɛ mii funŋʼi.
3 Ta sì numɛ ma a sà pi tùn,
ma a pi cyeyaayi puni kɛ̀ɛgɛ,
maa pi bò ɲùɲaara bàa:
Nàmbaabii ná cyeebii ná nàŋkopyire ná pùnmpunɲyɛɛre ná nìiyi ná mpàabii ná ɲwɔ́hɔɲyi ná dùfaanɲyi.”»
4 Ka Soli si kàshikwɔɔnbii wà piye na Telayimu kànhe e,
maa pi tɔ̀rɔ.
Pi tɔɔrɔfeebii mpyi shiin kampwɔhii ŋkwuu shuunni (200.000),
Zhuda tùluge wuubii sí ɲyɛ shiin kampwɔhii kɛ (10.000).
5 Ka Soli si yîri ná pi e mà kàrʼa sà mbàŋi le bafage e,
Amalɛki shiinbii kànhe taan.
6 Ka Soli si Keni shiinbii pyi:
«Yii fworo Amalɛki shiinbii shwɔhɔlʼe,
mii àha ŋkwɔ̀ yii kakyara ná pi e mɛ,
ɲaha kurugo yɛ,
yii à kacɛnnɛ pyi Izirayɛli shiinbii puni na pi nivworobii Misira kìni i.»
Ɲyɛ ka Keni shiinbii si fworo Amalɛki shiinbii shwɔhɔlʼe.
7 Ka Soli si Amalɛki shiinbii tùn mà lwɔ́ Avila kànhe na mà sà nɔ fo Suri kànhe na.
Kuru na ɲyɛ Misira kìni yyetiimpe na.
8 U à Amalɛki shiinbii saanŋi Agagi ɲyii wuŋi cû,
maa pi sanmpii puni kakyara ná kàshikwɔnŋwɔɔni i.
9 Ŋka,
Soli ná sùpyirʼà Agagi yaha bòmbaa mà bâra mpàabii sìnmɛ wuubii ná sikyaabii sìnmɛ wuubii ná nìiyi sìnmɛ wuyi ná nunayi sìnmɛ wuyi ná mpàpyire sìnmɛ woore puni na.
Pi ɲyɛ a yacɛnŋke kà tufiige kɛ̀ɛgɛ mɛ.
Tɔ̀ɔn ɲyɛ yaayi ɲjemu na mɛ,
ná ɲje yi ɲyɛ yi ɲyɛ a ɲwɔ mɛ,
yire kanni pi à kɛ̀ɛgɛ.
Soli à Kile ɲwɔmɛɛni yaha
10 Ɲyɛ ka Kafooŋi si Samuwɛli pyi:
11 «Mii à naye cɛ̂ɛgɛ Soli ntìŋɛŋi i mà pyi saanwa,
ɲaha kurugo yɛ,
u à mii ɲwɔmɛɛni yaha,
mii à mpemu jwo u à ke,
u ɲyɛ a puru lógo mɛ.»
Ka lire si sàa Samuwɛli funŋɔ pɛn,
ka u u numpilage puni pyi na Kafooŋi ɲáare.
12 Ɲyɛ̀sɔɔge na,
ka Samuwɛli si yîri na wà Soli yyére.
Mà u yaha kuni na,
ka wà si u pyi na Soli à kàre Karimɛli kànhe e mà sà funɲcwugo nàɲja yaa uye mɛgɛ na,
lire kàntugo,
maa yîri wani mà kàre Giligali kànhe e.
13 Samuwɛli à nɔ Soli yyére ke,
ka Soli si u pyi:
«Kafooŋi u jwó lwɔ́ ma na.
Mii à Kafooŋi jwumpe puni kuni ɲaara.»
14 Ka Samuwɛli si u yíbe:
«Mpàabii ná nìiyi myahigii mii ɲyɛ na núru ke,
taa cyi ɲyɛ na fworo ke?»
15 Ka Soli si jwo:
«Sùpyirʼà yîri ná yʼe Amalɛki shiinbii cyage e.
Pi à mpàabii sìnmɛ wuubii ná nìiyi sìnmɛ wuyi yaha si mpa yi pyi sáraga Kafooŋi mu Kileŋi á.
Wuu à yi sanɲyi puni bò.»
16 Ka Samuwɛli si Soli pyi:
«Ma ɲwɔge tò.
Ɲje Kafooŋi à jwo mii á pìlaga ke,
mii sí yire jwo mu á.»
Ka Soli si jwo:
«Yi jwo.»
17 Ka Samuwɛli si jwo:
«Mà mu yaha mu u sɔ̂nŋi na mu ɲyɛ yafyin mɛ,
mu ɲyɛ a pyi Izirayɛli shiinbii puni saanŋi mà?
Kafooŋi à sìnmpe tìri mu na maa mu pyi Izirayɛli shiinbii saanŋi.
18 Kafooŋi à mu tun na ma sà Amalɛki shiinbii kakyara,
ma a pire kapimpyiibii shi tò feefee.
19 Ɲaha kurugo mu ɲyɛ a Kafooŋi tùnnture pyi mà yɛ?
Ɲaha kurugo mu à kà a jyè pi cyeyaayi i mà kuu maa Kafooŋi kafuun pyi yɛ?»
20 Ka Soli si Samuwɛli pyi:
«Mii à Kafooŋi ɲwɔmɛɛni cû dɛ.
Kafooŋi à mii tun ndemu na ke,
mii à lire pyi.
Mii à Amalɛki shiinbii puni kakyara maa pi saanŋi Agagi cû mà pa.
21 Yaayi yi mpyi a yaa yi shi tò ke,
kàshikwɔɔnbilʼà mpàabii sìnmɛ wuubii ná nìiyi sìnmɛ wuyi yà cû yire e kàshige kwɔ̀nŋkwooni kàntugo si mpa mpyi sáraga Kafooŋi mu Kileŋi á Giligali i.»
22 Ka Samuwɛli si u pyi:
«Sárayi nizogoyi ná sárayi sanɲyi yʼà táan Kafooŋi á,
mà tòro u ɲwɔmɛɛni ɲcùŋi na la?
Ɔnhɔ,
ɲwɔmɛcunnʼà pwɔ́rɔ sárage na.
Mà maye tîrige u á,
lirʼà pwɔ́rɔ mpàpooŋi sìnmpe na.
23 Ɲùŋkyaanre na ɲyɛ kapii céepyiini fiige.
Niŋgyiwaani na ɲyɛ kapii kacyinzunni fiige.
Ná mu sʼà cyé Kafooŋi jwumpe na,
Kafooŋi mu sí n-cyé mu na,
mu sàha sì n-pyi saanwa mɛ.»
24 Ka Soli si Samuwɛli pyi:
«Mii à kapii pyi,
mii ɲyɛ a Kafooŋi tùnnture pyi mɛ,
mii mú ɲyɛ a mu yɛrɛge lógo mɛ.
Mii mpyi a fyá sùpyire yyaha na maa pi ɲyii wuuni pyi.
25 Numɛ,
mii na mu ɲáare,
na kapiini yàfa na na,
ma a núrʼa shà ná mii i,
si sà Kafooŋi pêe.»
26 Ka Samuwɛli si u pyi:
«Mii sì núru zhà ná mu i mɛ,
ɲaha kurugo yɛ,
mu à cyé Kafooŋi jwumpe na.
Kafooŋi mú a cyé mu na.
Mu sàha sì n-pyi Izirayɛli shiinbii saanŋi mɛ.»
27 Samuwɛli à kàntugo wà sʼa ŋkɛ̀ɛge ke,
ka Soli si u vàanntinmbwɔhe ɲwɔhɔntaanŋi cû,
ka ku u ŋkwɔ̀n.
28 Ka Samuwɛli si u pyi:
«Kafooŋi à Izirayɛli shiinbii saanre kwɔ̀n mu na niɲjaa mà kan wà á ŋgemu u à pwɔ́rɔ mu na ke.
29 Kafooŋi u ɲyɛ Izirayɛli sìnampe ke,
uru ɲyɛ na finni mɛ,
u ɲwɔmɛɛni mú ɲyɛ na fáre mɛ,
ɲaha kurugo yɛ,
u ɲyɛ sùpya fiige sʼa u ɲwɔmɛɛni fáre mɛ.»
30 Ka Soli si núrʼa jwo:
«Mii à kapii pyi,
ŋka mii na mu ɲáare,
ɲjire taha na na mii shiinbii kacwɔnribii ná Izirayɛli shiinbii sanmpii shwɔhɔlʼe.
Núrʼa shà ná mii i si sà Kafooŋi mu Kileŋi pêe.»
31 Ka Samuwɛli si núrʼa kàre ná Soli i,
ka Soli si sà Kafooŋi pêe.
32 Lire kàntugo,
ka Samuwɛli si jwo:
«Ta ma ná Amalɛki shiinbii saanŋi Agagi i naha.»
Ka Agagi funntangawuŋi si wá na filili u na,
ɲaha kurugo yɛ,
u mpyi na ŋko uye funŋʼi:
«Nàkaana bàa,
kwùŋi zoroŋi laagʼà tɔɔn mii na.»
33 Ka Samuwɛli si jwo:
«Bà mu kàshikwɔnŋwɔɔnʼà cyeebii pìi pɔ̂ɔn pi pyìibilʼe mɛ,
amuni mu nuŋi mú sí n-pɔ̂ɔn u pyàŋi i.»
Ka Samuwɛli si Agagi bò Kafooŋi yyahe taan Giligali i.